¹ Nang una, igwa da ning bukon matuod nga mga mensahiro ng Dios sa Israel. Imaw da sa indo, may magaluwas halin sa indo nga bukon matuod nga mga manunudlò sa hambay ng Dios. Magapakunokuno sinda ning maayo nga pagpanudlò pero imaw ini ang makakasirà ng indo pagtuo kay Kristo. Wayà nganì ninda makikilay-a ang Ginoo nga nagtubos sa inda. Nganì sinda ang magadaya ning pagparusa sa inda nga daan halin sa Dios. ² Kag madamò ang magapatuyad ng inda pag-inuyag. Kag tungod diri, ang mga tawo hay magahambay ning malain sa kamatuuran nga aton ginasunod. ³ Ining bukon matuod nga mga manunudlò hay magahuman ning mga istoistorya agud makuwartahan ninda kamo. Wayà sinda kasayod nga madugay na sinda nga ginghusgahan kag ang magaparusa sa inda hay preparado na.

⁴ Wayà nganì pagkaluy-i ng Dios ang mga anghel nga nagpakasalà anay dati, kundì gingpriso sinda sa kaduyom-duyom kag kadayom-dayom gid nga buhò kag didto ginatagana sinda hasta sa Adlaw nga Paghusga. ⁵ Wayà nganì pagkaluy-i ng Dios ang mga tawo nang una nga wayà nagasunod sa iya kabubut-on, kundì gingpadaya niya ang bahà sa kalibutan kag nagkamatay sinda tanan. Pero gingluwas niya si Noe nga miyugwali ng pagkamatarong kag ang pito niya nga kaibahan. ⁶ Ang mga banwa ng Sodoma kag Gomorra hay galì gingparusahan kag gingpaday-an ng Dios ning kalayo, para masunog hasta naging abo sinda bilang husga sa makasasalà nga mga tawo didto. Ginghuman niya ini agud ipakità kung ano ang matatabò sa mga wayà nagasunod sa Dios. ⁷ Pero gingtabangan niya si Lot tungod matarong siya nga tawo kag nalilisod gid sa mga nagaistar didto kay puro na lang inuyag kag kalainan ang inda pagkabuhì. ⁸ Nakikità kag nababatian ni Lot ang inda malain nga mga ginahuman nang nagaistar siya sa inda tungà, kag adlaw-adlaw hay nakakapalain gid ini ng iya pamatyag kay matarong siya nga tawo. ⁹ Nganì sayod ng Ginoo kung pauno luwason ang mga nagasunod sa iya kabubut-on kung mag-abot sa inda ang pagtilaw, kag sayod da niya kung pauno parusahan ang mga malain hasta mag-abot ang Adlaw nga Paghusga, ¹⁰ labi na gid sa mga tawo nga nagakabuhì lang sa inda malaw-ay nga ginahandom ng lawas kag wayà nagapasakop sa otoridad.

Ining bukon matuod nga mga manunudlò nga akon ginamitlang hay mga maisog kag hambugon. Wayà sinda nahahadlok manglibak sa mga espiritu sa langit^a. ¹¹ Abir nganì ang mga anghel nga mas makusog kag makagagahom kaysa bukon matuod nga mga manunudlò hay wayà naggamit ning malain nga mga hambay ning akusasyon kuntra sa mga espiritu sa langit sa atubangan ng Ginoo. ¹² Pero ini nga mga tawo hay pareho sa ilahas nga mga hayop nga indì makaisip. Gingpitò sinda para dakpon kag patyon. Abir ang mga butang nga wayà ninda naiintindihi hay inda ginalibak, nganì papatyon gid ini nga mga tawo pareho sa ilahas nga hayop. ¹³ Kasiraan ang bayos sa inda ginahuman nga malain sa iban. Kay ang inda ginakabig nga kalipay hay imaw ang paghuman ng abir ano nga malain nga handom ng lawas bisan adlaw. Pareho sinda sa mga buling kag may mga deperensya nga nagatao ning kahuy-anan sa indo kung makità sinda sa indo pagtililipon! Sa matuod lang, ginakalipay gid ninda kamo nga dayaon mintras nagapangaunan sinda sa indo. ¹⁴ Kung sinda magsirò sa babayi, ang hunahunà ninda hay puro pagpanginbabayi. Wayà sinda ginasubhi sa pagpakasalà kag ginatintar pa ninda ang mga tawo nga maluya sa pagtuo agud magpakasalà. Batasan na ninda ang pagkahakog. Tungod sa ini nga mga malain nga butang, ginasumpà gid sinda ng Dios! ¹⁵ Gingbayaan ninda ang tamà nga mga pagpanudlò, nganì nagtayang sinda. Gingpatuyaran ninda ang ginghuman ni Balaam nga ongà ni Bosor^b, nga nagluyag sa kuwarta nga suhoy sa paghuman ning malain. ¹⁶ Kag tungod gingsuway niya ang sugò ng Dios, gingsabyaw siya ng iya asno abir indì makamitlang. Pero naghambay ini sa bosis ng tawo para pugungon ang miyugbalità ng mensahe ng Dios sa iya kabuangan nga iya paghumanon.^c

¹⁷ Ining bukon matuod nga mga manunudlò hay pareho sa mga tuburan nga nauga kag daw sa mga panganod nga ginapadpad ng makusog nga hangin.^d Nganì ginatagana na para sa inda ng Dios ang lugar nga subra gid kaduyom. ¹⁸ Daw kaayo-ayo kag nagapahambog gid ang inda hambay kung magpanghambay sinda, pero wayà gid ini ning puyos. Ginagamit ninda ang mga malaw-ay nga ginahandom ng lawas, agud masulay ninda liwat ang mga tawo nga bag-o pa lang nakalikaw sa mga nagakabuhì sa salà. ¹⁹ Ginapangakò ninda ang kahilwayan sa inda mga nakukombinsi, pero sinda mismo hay mga ulipon ng salà nga imaw ang makakasirà sa inda kay ang tawo hay ulipon ng abir ano nga nagagahom sa iya. ²⁰ Nahilway na sa malain nga mga himò nga nagagahom sa mga tawo diri sa kalibutan ang abir sin-o nga nakakilaya na sa Ginoong Hesu-Kristo nga aton Manluluwas. Pero kung sa ulihi magbalik naman sinda sa inda malain nga mga himò kag maging ulipon naman sinda ng inda mga salà, tapos mas maging malain pa gid ang inda kamutangan kaysa wayà pa sinda nagtuo kay Kristo. ²¹ Maayo pa nga wayà na lang sinda nakasayod ng tamà nga paagi nga gusto ng Dios sa inda pagkabuhì kaysa pagkatapos nga nakasayod sinda tapos matalikod sinda sa mga sugò ng Dios nga inda gingbaton. ²² Ang inda ginahuman hay pareho sa mga hambayanon nga nagahambay,

kag