¹ Ini hay pasayod ni Hesu-Kristo nga gingtao ng Dios sa iya, agud ipasayod naman niya sa iya mga miyugserbisyo ang mga butang nga malapit na gid matabò. Gingpasayod ini ni Kristo paagi sa iya gingsugò nga anghel para sa iya miyugserbisyo nga si Juan. ² Ako si Juan hay nagapamatuod sa tanan nga gingpakità sa akon parti sa ginghambay ng Dios kag sa gingpamatuod ni Hesu-Kristo.

³ Malipayon ang nagabasa sa mga mensahe sa ini nga propesiya, kag ang mga nagapamatì kag nagatuman ng ini nga mga mensahe nga nakasulat diri. Kay ini tanan hay malapit na matabò.

^4,5 Nagapangamusta ako sa indo nga yara sa pito nga iglesya sa probinsya ng Asya^a.

Kabay pa nga mabaton nindo ang grasya kag katawhayan halin sa Dios, sa Espiritu, kag kay Hesu-Kristo. Sa Dios, nga imaw siya niyan, nang una, kag ang magaabot. Sa pito nga Espiritu,^b nga yadto sinda sa atubangan ng iya trono. Kag kay Hesu-Kristo, siya ang matutom nga testigo, ang panganay nga nabuhì liwat sa mga patay, kag siya ang pinunò ng mga harì sa dutà. Ginahigumà niya kita kag ginghilway sa aton mga kasal-anan paagi sa iya dugò^c. ⁶ Ginglakot kita sa iya paghaharì kag ginghuman niya kita nga mga parì para magserbisyo sa Dios nga iya Amay. Kay Hesu-Kristo ihalad naton ang paghimayà kag dapat kilayahon nga nagadumaya sa tanan hasta sa wayà katapusan. Kabay pa!

⁷ Tandai nindo! Magaabot si Hesus sa ibabaw ng mga panganod kag makikità siya ng tanan, patì ang mga nagpapatay sa iya kag ang tanan nga inapo sa dutà hay magatangis tungod sa iya. Matuod gid ini. Kabay pa!

⁸ “Ako ang Pang-una kag ang Pang-ulihi,”^d hambay ng Ginoo nga Dios nga imaw ang makagagahom sa tanan, nga imaw niyan, nang una, kag ang magaabot.

⁹ Ako si Juan nga indo utod sa Ginoo kag kaibahan sa kahugaan, sa paghaharì ng Dios kag sa pagtiis tungod sa pagtuo kay Hesus. Gingtapok ako bilang isa ka priso sa isla nga ginatawag nga ‘Patmos’ tungod gingwali ko ang hambay ng Dios kag gingpamatuod ko ang parti kay Hesus. ¹⁰ Sa Adlaw nga pagsamba sa Ginoo, ang Espiritu ng Dios hay nag-abot sa akon kag nabatian ko sa akon likod hampig ang makusog nga tunog nga daw trumpita, ¹¹ nga nagasiling, “Isulat mo sa papel^e ang imo nakità kag ipadaya mo sa pito nga iglesya: sa Efeso, Esmirna, Pergamo, Tiatira, Sardis, Filadelfia kag Laodicea.”

¹² Naglisò ako agud tan-awon kung sin-o ang nagahambay sa akon kag paglisò ko nakità ko ang pito nga butangan ning lana nga iwagan, nga himò sa bulawan. ¹³ Sa tungà ng mga butangan ning lana nga iwagan, hay may nagatindog nga daw sa tawo, nga nakabarò nga abot sa siki kag may hagkos nga bulawan nga nakapalibot sa iya dughan. ¹⁴ Ang iya buhok sa uyo hay subra gid kaputì kag ang iya mga mata hay nagadayab nga daw pareho sa kalayo. ¹⁵ Kag ang iya mga siki hay nagakintab nga daw sa bronsi nga gingtunaw sa hurnuhan kag ang iya bosis hay makusog gid pareho sa tunog ng mabahoy nga busay. ¹⁶ Ang iya tuo nga kamot hay may ginahawiran nga pito nga bituon kag sa iya babà hay nagaluwas ang espada nga magkabuak ang duyot. Ang iya uyahon hay pareho sa adlaw nga kasilaw-silaw gid.

¹⁷ Pagkakità ko sa iya, natumba ako sa iya atubangan nga daw sa patay. Gingtungtong niya ang iya tuo nga kamot sa akon kag naghambay siya, “Ayaw mahadlok! Ako ang Pang-una kag ang Pang-ulihi. ¹⁸ Ako ang may kabuhì nga wayà katapusan. Namatay ako, pero siroa, nabuhì ako liwat kag indì na mamatay abir san-o. Igwa ako ning gahom^f sa kamatayon kag sa Hades nga lugar ng mga espiritu ng patay. ¹⁹ Nganì isulat mo ang mga butang nga imo nakità, ang mga butang nga natatabò niyan, kag ang mga matatabò sa ulihi. ²⁰ Parti sa pito nga bituon nga nakità mo sa akon tuo nga kamot kag sa pito nga butangan ning lana nga iwagan nga himò sa bulawan, imaw ini ang gusto hambayon nga ginapasayod ko sa imo: ang pito nga bituon hay ang mga anghel ng pito nga iglesya kag ang pito nga butangan ning lana nga iwagan hay ang pito nga iglesya.”