¹ “Isulat mo ini para sa anghel ng iglesya sa Sardis:

Imaw ini ang mensahe nga ginahambay ng may pito nga Espiritu ng Dios kag may pito nga bituon. Sayod ko ang indo mga ginghuman, ginabantog kamo nga daw matutom sa akon pero ang matuod, kamo hay bukon.^{a 2} Nganì magbatì kamo kag pakusuga ang nabilin nindo nga pagtuo, nga hayos malapit na mamatay. Kay nasayuran ko nga ang indo mga ginghuman hay bukon pa kumplito sa panirò ng akon Dios. ³ Nganì dumduma ang gingtudlò sa indo nga indo gingbaton kag tumana inà, kag talikuri ang indo mga salà. Kay kung indì kamo magbatì, makarà ako sa indo pareho ng isa ka miyugpangawat kay indì nindo masayuran kung ano nga oras ang akon pag-abot. ⁴ Pero may pila sa indo nga taga-Sardis hay wayà pagmantsahi ang inda barò^b. Magapanaw sinda kaibahan ko nga nakabarò ning putì kay angay gid sinda nga magbarò ini. ⁵ Ang magadaog hay pagabaruan da ning putì nga barò kag indì ko pagpayaon ang iya pangayan sa Libro ng Kabuhì. Ipakilaya ko siya sa atubangan ng akon Amay kag sa iya mga anghel. ⁶ Kamo nga nagapamatì, dapat intindihon gid nindo ang ginahambay ng Espiritu ng Dios sa mga iglesya.”

⁷ “Isulat mo ini para sa anghel ng iglesya sa Filadelfia:

Imaw ini ang mensahe nga ginahambay niya nga banal kag masasaligan. Siya ang nagadaya ng lyabi ng Hari nga si David, kag ang iya abrihan hay wayà na ning may makasara, kag ang iya sarahan hay wayà ning may makaabri.

⁸ Sayod ko ang indo mga ginahuman. Siroa! May ging-abrihan ako nga puwertahan para sa indo, nga wayà ning may makasara kay nasayuran ko nga ginasunod nindo ang akon pagpanudlò, kag permi kamo matutom sa akon abir maluya kamo. ⁹ Pamatì! Pakaraon ko kag paluhuron sa atubangan nindo ang mga tawo nga nagahambay nga sinda kuno hay Judio pero mga bakakon kag kaibahan ni Satanas, agud masayuran ninda nga ginahigugmà ko kamo. ¹⁰ Tungod kay gingtuman nindo ang akon sugò nga may pagtiis, bantayan ko kamo sa pagtilaw, nga magaabot sa bilog nga kalibutan, kung sa diin tistingon ko da ang tanan nga tawo sa dutà. ¹¹ Maabot na ako nga daan, nganì padayuna gid maayo ang pagtuman sa matuod nga pagpanudlò, para wayà ning abir sin-o nga makaagaw ng indo premyo^c. ¹² Ang abir sin-o nga magdaog hay humanon ko nga daw sa haligi ng templo ng akon Dios kag magiging permamenti na gid siya didto. Isulat ko sa iya ang pangayan ng akon Dios kag magiging pumuluyò siya ng siyudad ng akon Dios. (Imaw ini nga siyudad ang bag-o nga Jerusalem nga nagababà halin sa akon Dios sa langit.) Isulat ko da sa iya ang akon bag-o nga pangayan.^{d 13} Kamo nga nagapamatì, dapat intindihon gid nindo ang ginahambay ng Espiritu ng Dios sa mga iglesya.”

¹⁴ “Isulat mo ini para sa anghel ng iglesya sa Laodicea:

Imaw ini ang mensahe nga ginahambay niya, nga ang pangayan hay ‘Amen’, ang matutom kag matuod nga testigo, ang gingtunaan ng mga ginghuman ng Dios. ¹⁵ Sayod ko ang indo mga ginghuman. Sayod ko nga bukon kamo pareho sa malamig o mainit nga tubì^e. Gusto ko kuntà nga malamig kamo o mainit. ¹⁶ Tungod kamo hay maayabaab, bukon mainit o bukon malamig, nganì ibugwak ko kamo. ¹⁷ Kay ginahambay nindo, ‘Manggaranon kami, asensado kag wayà na ning kahinangyan pa’. Pero wayà kamo kasayod nga kamo hay misirabli, makaluluoy, pubre, buta kag borlis. ¹⁸ Nganì ginalaygayan ko kamo nga magbakay kamo sa akon ning bulawan nga gingpaagi sa kalayo agud magmanggaranon kamo. Magbakay kamo da ning putì nga barò nga indo isuksok para matabunan ang indo makahuhuyà nga lawas nga borlis. Kag magbakay kamo da ning buyong nga pangpahid sa indo mga mata para makakità kamo. ¹⁹ Ginasabyaw ko kag ginadisiplina ang tanan nga akon ginahigugmà. Nganì magtinguhà kamo gid kag talikuran nindo ang indo mga salà.

²⁰ Tan-awa! Nagatindog ako sa luwas ng puwertahan kag nagapanuktok. Ang abir sin-o nga makabatì ng akon bosis kag mag-abri ng puwertahan, masuyod ako sa iya bayay kag magakaon ako kaibahan niya.

²¹ Ang abir sin-o nga magdaog hay taw-an ko ning pribilihiyo nga makapungkò kaibahan ko sa akon trono. Pareho da sa akon nga nagdaog kag niyan nagapungkò kaibahan ng akon Amay sa iya trono.

²² Kamo nga nagapamatì, dapat intindihon gid nindo ang ginahambay ng Espiritu ng Dios sa mga iglesya.”