¹ Pagkatapos adto nga mga butang, nagtan-aw ako kag nakità ko ang bukas nga puwertahan sa langit kag nabatian ko liwat ang bosis nga daw sa tunog ng trumpita nga nagahambay sa akon, “Sakà diri kay ipakità ko sa imo ang mga kahinangyan nga matabò sa paabuton.” ² Adto nga daan ang Espiritu ng Dios hay nag-abot sa akon kag nakità ko sa langit ang isa ka trono kag ang nagapungkò didto. ³ Adtong nagapungkò didto hay makintab pareho ng mga bato, ng haspi nga berdi kag ng kornalina nga puya. Kag sa palibot ng trono hay may bayangaw nga makintab pareho ng ismeralda nga berdi kag silag. ⁴ Sa tungà nga trono, may nakapalibot nga baynti kuwatro nga trono kag may nagapungkò didto nga baynti kuwatro nga miyugdumaya^a nga nakabarò ning putì kag may korona nga bulawan sa inda uyo. ⁵ Halin sa trono may mga kilat kag makusog nga mga tunog kag mga dayugdog. Kag may pito nga muron nga nagadayab sa atubangan ng trono nga imaw ang pito nga Espiritu ng Dios. ⁶ Sa atubangan ng trono hay daw may matin-aw nga dagat pareho ng kristal. Sa tungà nga trono, may nakapalibot nga upat nga buhì nga hayop nga punò ning mga mata sa atubangan kag sa likod. ⁷ Ang una nga buhì nga hayop hay daw sa leon, ang ikaduha hay daw sa baka, ang ikatuyo hay daw sa tawo ang iya uyahon kag ang ikaupat hay daw sa agila nga nagalupad. ⁸ May tig-unom nga pakpak ang upat nga buhì nga hayop kag ang kada isa sa inda hay punò ning mga mata ang lawas, patì sa idayom ng mga pakpak. Wayà sinda nagaduyog adlaw kag gab-i ning kahahambay,