5
Ang Kasulatan kag ang Karnero
1 Pagkatapos adto, may nakità ako nga kasulatan nga nakalukot sa tuo nga kamot ng nagapungkò sa trono kag may nakasulat sa magkabuak nga naselyuhan ng pito nga selyo.
2 Kag may nakità ako nga isa ka makagagahom nga anghel nga nagapasayod sa makusog nga bosis. “Sin-o ang angay nga makasirà ng mga selyo kag makabukas ng kasulatan nga nakalukot?” 3 Pero wayà gid ning abir isa sa langit o sa dutà o sa idayom man ng dutàa nga angay makabukas o makabasa ng kasulatan nga nakalukot. 4 Nganì nagtangis gid ako kay wayà ning abir isa nga angay makabukas o magtan-aw ng kasulatan nga nakalukot. 5 Niyan ang isa sa miyugdumayab hay naghambay sa akon, “Ayaw magtangis! Tan-awa, ang ginatawag nga ‘Leon sa tribo ni Juda’, halin sa inapo ng Hari nga si David. Siya ang Mandadaog. Siya ang makakasirà ng pito nga selyo kag makakabukas ng kasulatan nga nakalukot.”
6 Pagkatapos nakità ko ang isa ka Karnero nga nagatindog sa atubangan ng iya trono nga ginapalibutan ng upat nga buhì nga hayop kag ng mga miyugdumaya. Kung tan-awon, daw siya ang pinatay. May pito siya nga sungay kag pito nga mata nga imaw ang pito nga Espiritu ng Dios nga gingpadaya sa bilog nga kalibutan. 7 Nagpalapit ang Karnero kag iya gingbu-oy ang kasulatan sa tuo nga kamot ng nagapungkò sa trono. 8 Pagkabuoy niya ng kasulatan nga nakalukot, ang upat nga buhì nga hayop kag ang baynti kuwatro nga miyugdumaya hay nagluhod sa atubangan ng Karnero. Ang kada isa sa inda hay may alpa kag hambawan nga bulawan nga punò ning insenso nga imaw ang mga pangamuyò ng mga banal nga tawo ng Dios. 9 Kag nagakanta sinda ning bag-o nga kanta:
“Ikaw ang angay nga magbuoy ng kasulatan nga nakalukot kag magbukas ng mga selyo.
Kay gingpatay ka kag tungod sa imo dugò gingtubos mo para sa Dios ang mga tawo halin sa tanan nga mga tribo, mga nagahambay sa iba-iba nga lingguahe, mga inapo kag mga nasyon.
10 Ginglakot mo sinda sa imo paghaharì kag ginghuman mo sinda nga mga parì para magserbisyo sa Dios.”
11 Pagkatapos nakità ko kag nabatian ang bosis ng kadamo-damò nga mga anghel nga nagapalibot sa trono, sa mga buhì nga hayop kag sa mga miyugdumaya. Ang bilang ng mga anghel hay libo-libo kag milyon-milyon. 12 Kag nagakanta sinda ning may makusog nga bosis:
“Ang Karnero nga gingpatay hay angay nga amon tahuron, himayaon kag dayawon, kay siya hay makagagahom, manggaranon, mayad kag makusog.”
13 Kag nabatian ko ang tanan nga may kabuhì sa langit, sa dutà, sa idayom ng dutà kag sa dagat. Ang tanan nga ginghuman ng Dios hay nagakanta:
“Aton dayawon, tahuron kag himayaon ang nagapungkò sa trono kag ang Karnero,
kag dapat kilayahon nga nagadumaya sa tanan hasta sa wayà katapusan!”
14 Ang upat nga buhì nga hayop hay nagsabat, “Kabay pa!” Kag ang mga miyugdumaya hay nagluhod kag nagsamba.