¹ Niyan nakità ko ang Karnero nang gingsirà niya ang isa sa pito nga selyo. Kag nabatian ko ang isa sa upat nga buhì nga hayop nga ang bosis hay daw tunog ng dayugdog nga nagahambay, “Kari!” ² Nagtan-aw ako kag nakità ko ang isa ka putì nga kabayo kag ang nagasakay didto nga may daya nga panà^a kag gingtaw-an siya ning korona. Nagbabà siya sa kalibutan halin sa langit para magdaog kag padayon sa pagpandaog.

³ Nang gingsirà ng Karnero ang ikaduha nga selyo, nabatian ko ang ikaduha nga buhì nga hayop nga nagahambay, “Kari!” ⁴ Kag nag-abot ang isa ka puya nga kabayo kag ang nagasakay didto hay gingtaw-an ning mabahoy nga espada kag gingtaw-an da ning gahom para magtunà ning gira sa kalibutan, agud ang mga tawo hay magpinatyanan.

⁵ Nang gingsirà ng Karnero ang ikatuyo nga selyo, nabatian ko ang ikatuyo nga buhì nga hayop nga nagahambay, “Kari!” Nagtan-aw ako kag nakità ko ang isa ka itom nga kabayo kag ang nagasakay didto nga may daya nga kiluhan sa iya kamot. ⁶ Nabatian ko ang daw bosis halin sa upat nga buhì nga hayop nga nagahambay, “Pamahaya ang inda pagkaon. Isa lang ka takos^b ng trigo nga arina ang mababakay para sa isa ka adlaw nga suweldo, kag tuyo ka takos nga barli^c nga arina ang mababakay ng sa isa ka adlaw nga suweldo. Ayaw pag-uyaki ang lana ng olibo kag ilimnanon.”

⁷ Nang gingsirà ng Karnero ang ikaupat nga selyo, nabatian ko ang bosis ng ikaupat nga buhì nga hayop nga nagahambay, “Kari!” ⁸ Nagtan-aw ako kag nakità ko ang isa ka mapus-aw nga kolor ng kabayo kag ang nagasakay didto nga ang pangayan hay si Kamatayon kag nagasunod sa iya ang Hades^d. Gingtaw-an sinda ning otoridad agud mangpatay ng mga tawo sa upat ka parte ng kalibutan paagi sa gira, gutom, sakit^e kag sa mapintas nga mga hayop.

⁹ Nang gingsirà ng Karnero ang ikalima nga selyo, nakità ko sa ubos ng altar^f ang mga espiritu ng tawo nga gingpatay tungod sa inda pagwali sa Hambay ng Dios kag sa inda padayon nga pagpamatuod. ¹⁰ Kag nagsinggit sinda ning makusog, “Ginoo nga makagagahom, banal kag masaligan, hasta san-o mo pagahusgahan kag pagabayusan ang mga tawo sa kalibutan nga nagpangpatay sa amon?” ¹¹ Kag ang kada-isa sa inda hay gingtaw-an ning putì nga barò nga mahabà. Ang siling sa inda hay magpahuway anay sinda ning matag-od nga tiyempo hasta nga makumplito ang bilang ng mga kapareho ninda nga ulipon ni Kristo kag ng inda mga kauturan, nga pagapatyon da pareho sa inda.

¹² Pagkatapos nakità ko nang gingsirà ng Karnero ang ikaunom nga selyo. Kag naglinog ning subra ka kusog kag nag-itom ang adlaw pareho sa barò nga luto kag ang bulan hay nagpuya pareho ng dugò. ¹³ Nagkahuyog sa dutà ang mga bituon sa langit, pareho ng bukon pa hinog nga mga igos nga nagakalarag kung huyupon ng makusog nga hangin. ¹⁴ Ang langit hay naduyà pareho ng papel nga nilukot. Ang mga bukid kag mga isla hay nahalin sa inda mga pwesto. ¹⁵ Pagkatapos ang mga harì sa dutà, mga miyugdumaya, mga pinunò ng mga sundalo, mga manggaranon, mga maimpluwensiya nga tawo kag ang mga ulipon kag bukon, hay nagpanagò sa mga kuyba kag sa mga madagkò nga mga bato sa mga bukid. ¹⁶ Naghambay sinda sa mga bukid kag mga bato, “Tumpagi kag tabuni kami agud indì kami makità ng nagapungkò sa trono kag agud indì namon mabatyagan ang parusa ng Karnero. ¹⁷ Kay ang grabi nga Adlaw nga pagparusa ng Dios kag ng Karnero hay nag-abot na! Sin-o ang makaantos diri?”