7
Ang 144,000 nga Ulipon ng Dios nga Gingtatakan
1 Pagkatapos adto, may nakità ako nga upat nga anghel, nagatindog sa upat nga kanto ng dutà nga nagapugong ng upat nga hangin sa kalibutan, agud wayà ning hangin nga magahuyop sa dutà, sa dagat, kag sa abir ano nga kahoy. 2 Kag nakità ko ang isa pa nga anghel nga nagapaibabaw halin sa esti nga may pangtatak ng Dios nga buhì. Kag gingsinggitan niya ning makusog ang upat nga anghel nga gingtaw-an ng Dios ning gahom para magsirà sa dutà kag sa dagat. 3 Siling niya, “Ayaw anay pagsiraa ang dutà, ang dagat, imaw da ang mga kahoy hasta nga mamarkahan namon ang agtang ng mga ulipon nga nagaserbisyo sa aton Dios.”
4 Kag nabatian ko ang bilang ng gingpangmarkahan hay 144,000 halin sa 12 ka tribo ng Israel.
5 Sa tribo ni Juda 12,000;
sa tribo ni Ruben 12,000;
sa tribo ni Gad 12,000;
6 sa tribo ni Aser 12,000;
sa tribo ni Neftali 12,000;
sa tribo ni Manases 12,000;
7 sa tribo ni Simeon 12,000;
sa tribo ni Levi 12,000;
sa tribo ni Isacar 12,000;
8 sa tribo ni Zabulon 12,000;
sa tribo ni Jose 12,000;
sa tribo ni Benjamin 12,000.
Ang Pagtao ng Premyo sa mga Nagdaog
9 Pagkatapos adto, nagtan-aw ako kag nakità ko ang kadamo-damò gid nga mga tawo nga wayà ning puydi makabilang. Sinda hay halin sa tanan nga mga nasyon, mga tribo, mga inapo, mga nagahambay sa iba-iba nga lingguahe ang nagatindog sa atubangan ng trono kag ng Karnero. Nakabarò sinda ning putì nga mahabà kag may bitbit nga mga dahon ng palma. 10 Kag nagasinggit sinda ning makusog nga nagasiling, “Ang kaluwasan hay halin sa aton Dios nga nagapungkò sa trono kag halin sa Karnero.”
11 Ang tanan nga anghel hay nagtindog palibot sa trono kag ang mga miyugdumayaa kag sa upat nga buhì nga hayop. Pagkatapos nagluhod ang mga anghel nga ang inda mga hitsura hay nagasayad hasta sa dutà nga nagaatubang sa trono kag nagsamba sinda sa Dios nga 12 nagahambay,
“Kabay pa! Dayawon naton kag himayaon ang aton Dios kay siya hay mayad.
Aton siya pasalamatan kag tahuron hasta sa wayà katapusan kay siya hay makagagahom kag makusog. Kabay pa!”
13 Ang isa sa mga miyugdumaya hay nagpangutana sa akon, “Sin-o inà nga mga tawo nga nakabarò ning putì nga mahabà kag diin baya sinda halin?”
14 Nagsabat ako sa iya, “Nong, ikaw ang nakakasayod.” Naghambay siya sa akon, “Imaw inà ang mga tawo nga nakaantos sa ina nga grabi nga mga pagpahugà tungod sa inda pagtuo. Ginglabhan ninda ang inda barò kag gingpaputì sa dugò ng Karnero.b 15 Nganì yarà sinda sa atubangan ng trono ng Dios kag nagaserbisyo sa iya adlaw kag gab-i sa templo niya. Kag ang Dios nga nagapungkò sa trono hay ginabaton sinda nga mag-istar kaibahan niya. 16 Nganì indì na gid sinda magugutom o mauuhaw. Indì da sinda mapasò o mainitan ng adlaw. 17 Kay ang Karnero nga yadto sa alihid ng trono, imaw ang magabantay sa inda. Kag siya ang magadaya sa inda pakadto sa mga tuburan nga nagatao ning kabuhì. Kag pagapahiron ng Dios ang kada luha sa inda mga mata.”