¹ Nang gingsirà ng Karnero ang ikapito nga selyo, nagsilensiyo sa langit ning mga tungà sa oras. ² Nakità ko ang pito nga anghel, nagatindog sa atubangan ng Dios kag ang kada isa hay gingtaw-an ning trumpita.

³ Isa pa nga anghel ang nagpalapit. May daya siya nga bulawan nga butangan ning insenso kag nagtindog sa atubanagan ng altar. Gingtaw-an siya ning madamò nga insenso agud ihalad sa altar nga bulawan nga yadto sa atubangan ng trono, kaibahan ng mga pangamuyò ng tanan nga banal nga tawo ng Dios. ⁴ Ang aso ng mga insenso hay nagpaibabaw sa atubangan ng Dios, kaibahan ang mga pangamuyò ng mga banal nga tawo ng Dios, nga ginghalad halin sa kamot ng anghel. ⁵ Pagkatapos gingbuoy ng anghel ang butangan ng insenso kag gingpunò niya ini ning kalayo halin sa altar kag gingpilak sa dutà kag adto nga daan nagpinangdayugdog, nagkinalingaw, nagpinangilat kag naglinog.

⁶ Niyan, ang pito nga anghel nga may pito nga trumpita hay nag-alisto na para huyupon ang inda trumpita.

⁷ Nang ginghuyop ng una nga anghel ang iya trumpita, nag-uyan ning yelo kag kalayo nga nahaluan ning dugò kag gingbubò ini sa kalibutan. Kag nasunog ang ikatuyo ka parte ng dutà, ang ikatuyo ka parte ng mga kahoy kag ang tanan nga gunahon.

⁸ Ginghuyop ng ikaduha nga anghel ang iya trumpita, kag ginghuyog sa dagat ang daw kabahoy-bahoy nga bukid nga nagadayab. Kag ang ikatuyo ka parte ng dagat hay naging dugò. ⁹ Kag ang ikatuyo ka parte ng mga ginghuman nga may kabuhì sa dagat hay nagkamatay kag ang ikatuyo ka parte ng mga bapor hay nagkasirà.

¹⁰ Ginghuyop ng ikatuyo nga anghel ang iya trumpita kag may nahuyog halin sa langit nga kabahoy-bahoy nga bituon nga nagadayab nga daw baybag. Nagtupà ini sa ikatuyo ka parte ng mga subà kag ng mga tuburan. ¹¹ Ang pangayan ng bituon hay Kapait. Ang ikatuyo ka parte ng tubì hay nagpait kag madamò nga mga tawo ang nagkamatay pagkainom ng ini nga tubì.

¹² Pagkatapos ginghuyop ng ikaupat nga anghel ang iya trumpita kag tinamaan ang ikatuyo ka parte ng adlaw, ng bulan kag ng mga bituon, kag nagduyom ang mga ini. Nganì ang ikatuyo ka parte ng adlaw kag gab-i hay bukon mahayag.

¹³ Pagkatapos adto nakità ko ang agila nga nagalupad sa ibabaw kag nabatian ko ini nga nagasinggit ning makusog, “Makaluluoy! Makaluluoy! Makaluluoy ang matatabò sa tanan nga nagaistar sa dutà kung patunugon pa gid ng tuyo nga anghel ang inda trumpita!”