¹ Pagkatapos adto ginghuyop ng ikalima nga anghel ang iya trumpita, kag nakità ko ang isa ka bituon nga nahuyog sa dutà halin sa langit kag gingta-o sa iya ang lyabi para sa puwertahan ng pinakamadayom nga buhò^a. ² Ging-abrihan niya ang puwertahan kag nagluwas paibabaw ang aso nga pareho sa aso nga halin sa kabahoy-bahoy nga hurnuhan. Nagduyom ang adlaw kag ang langit tungod sa aso nga halin sa pinakamadayom nga buhò.

³ Pagkatapos halin sa aso hay may nagluwas nga mga apan kag nagtugpò sa dutà kag gingtaw-an sinda ning abilidad para manakit pareho ng mga iwi sa dutà. ⁴ Gingsugò sinda nga indì ninda pagsira-on ang mga gunahon, o ang abir ano nga nagatubò sa dutà, o ang mga kahoy, kundì adtong mga tawo lang nga wayà mamarkahi ng Dios sa inda agtang. ⁵ Gingbilinan sinda ng Dios nga indì patyon ini nga mga tawo kundì pahugaan ning tudo sa suyod ng lima ka bulan nga ang kasakit nga inda mababatyagan hay pareho sa kalaya ng sugod ng iwi. ⁶ Kag sa suyod nang adto nga mga adlaw, pangitaon ninda ang kamatayon, pero indì ninda ini makità. Abir gusto na gid ninda mamatay, pero indì sinda mamatay.

⁷ Ang hitsura ng adto nga mga apan hay daw sa mga kabayo nga preparado na sa gira. Sa inda mga uyo hay daw may mga korona nga bulawan, kag ang inda mga uyahon hay pareho ng uyahon ng mga tawo. ⁸ Ang inda mga buhok hay pareho sa buhok ng mga babayi kag ang inda mga ngipon hay daw sa ngipon ng mga leon. ⁹ Kag ang inda mga dughan hay daw may panagang nga saysayon kag ang tunog ng inda mga pakpak hay pareho sa kalingaw ng madamò nga karwahi nga ginaguyod ng mga kabayo pakadto sa inaway. ¹⁰ May mga ikog sinda pareho ng mga iwi nga nagapangsugod kag ang inda ikog hay may abilidad para manakit ng mga tawo sa suyod ng lima ka bulan. ¹¹ May harì nga nagadumaya sa inda, ini hay ang anghel nga nagabantay sa pinakamadayom nga buhò. Ang iya pangayan sa Hebreo hay ‘si Abaddon’ kag sa Griego hay ‘si Apollyon’.^b

¹² Natapos na ang una nga makahiyadlok. Tandai pagkatapos ini, may duha pa nga mas makahiyadlok nga magaabot.

¹³ Pagkatapos adto, ginghuyop ng ikaunom nga anghel ang iya trumpita kag nabatian ko ang isa nga bosis halin sa upat nga sungay ng altar nga bulawan nga yadto sa atubangan ng Dios. ¹⁴ Hambay sa ikaunom nga anghel nga may trumpita, “Buhii ang upat nga anghel nga nakagapos sa mabahoy nga subà ng Eufrates.” ¹⁵ Nganì gingbuhian ang upat nga anghel, agud magpatay sinda ng ikatuyo ka parte ng mga tawo sa dutà. Gingpreparar sinda para sa adto nga oras, adlaw, bulan kag tuig agud magpangpatay. ¹⁶ Gingbalità sa akon ang bilang ng kadamo-damò nga mga sundalo nga nagasakay sa kabayo hay 200,000,000.

¹⁷ Kag nakità ko ang mga kabayo sa akon panan-awon, kag ang mga nagasakay didto nga may panagang sa inda dughan nga puya ang kolor pareho ng kalayo, asul pareho ng sapiro^c kag duyaw pareho ng asupre. Ang uyo ng mga kabayo hay daw sa uyo ng mga leon. Kag ang nagaluwas sa inda mga babà hay kalayo, aso kag asupre. ¹⁸ Namatay ang ikatuyo ka parte ng mga tawo paagi sa ining tuyo nga salot: ang kalayo, aso kag asupre nga nagluwas sa inda mga babà. ¹⁹ Ang abilidad ng mga kabayo hay sa inda babà kag sa inda mga ikog nga pareho sa mga sawa nga may mga uyo nga imaw ang ginagamit sa pagpanakit ng mga tawo.

²⁰ Ang nabilin nga mga tawo nga wayà mapatay ng tuyo nga mga salot hay wayà magtalikod sa mga malain nga ginghuman ng inda mga kamot, pareho ng: nagpadayon sinda sa pagsamba sa malain nga mga espiritu kag sa mga dios-diosan nga bulawan, pilak, bronsi, bato kag kahoy, nga indì makakità, makabatì o makapanaw. ²¹ Ini nga mga tawo hay wayà magtalikod sa inda pagpinangpatay, pagpinangbarang, sa inda imoral nga pakipag-relasyon, kag sa pagpinangawat.