¹ Pagkatapos adto, nakità ko sa akon panan-awon ang isa pa nga makagagahom nga anghel nga nagababà halin sa langit nga naputos ning panganod nga daw sa iya barò kag may bayangaw sa iya uyo. Ang iya uyahon hay masilaw pareho sa adlaw kag ang iya mga siki hay daw sa haligi nga kalayo. ² May bitbit siya nga maisot nga kasulatan nga nakabukas. Pag-abot niya sa kalibutan, gingtimak niya ang iya tuo nga siki sa dagat kag ang waya hay sa dutà. ³ Nagsinggit siya ning makusog gid pareho sa nagangurob nga leon. Pagkasinggit niya, nagsabat ning pito ka beses ang dayugdog. ⁴ Nang nagsabat ning pito ka beses ang dayugdog, masulat na kuntà ako. Pero may nabatian ako nga bosis halin sa langit nga nagahambay, “Ayaw magpasayuran abir kay sin-o ang gingsabat ng dayugdog nga pito ka beses kag ayaw ini pagsulata.”

⁵ Kag ang anghel nga nakità ko nga nagatindog sa dagat kag sa dutà hay gingtaas ang iya tuo nga kamot sa langit, ⁶ kag nagpangakò siya sa pangayan ng Dios nga wayà kamatayon, nga naghuman ng langit, ng dutà, ng dagat kag ng tanan nga bagay nga yari diri. Ang hambay ng anghel, “Indì na gid padugayon ng Dios ang iya plano! ⁷ Pag huyupon ng ikapito nga anghel ang iya trumpita, ang wayà gingpasayod nang una nga plano ng Dios hay matatabò na gid sunò sa gingbalità niya nang una sa iya mga ulipon nga mga miyugbalità ng mensahe ng Dios.”

⁸ Kag ang bosis nga akon nabatian halin sa langit hay naghambay liwat sa akon nga nagasiling, “Kadto sa anghel nga nagatindog sa dagat kag sa dutà para buy-on ang iya ginahawiran nga kasulatan nga nakabukas.” ⁹ Nganì nagkadto ako sa anghel kag naghambay sa iya nga itao niya sa akon ang maisot nga kasulatan. Nagsabat siya sa akon, “Buy-a kag kauna. Matam-is ini sa imo babà pareho ng dugos pero mapait ini sa imo tiyan.” ¹⁰ Gingbu-oy ko ang maisot nga kasulatan sa kamot ng anghel kag gingkaon. Matam-is ini sa akon babà pareho ng dugos, pero nang natuyon ko, mapait ini sa akon tiyan. ¹¹ Pagkatapos may naghambay sa akon, “Dapat magpropesiya ka liwat ng gingplano ng Dios parti sa mga inapo, mga nasyon, mga nagahambay sa iba-iba nga lingguahe, kag sa madamò nga harì.”