¹ Niyan may nagtao sa akon ning pangsukat nga daw sungkod kag siling niya sa akon, “Kadto! Sukuya ang templo ng Dios kag ang altar kag bilanga da ang mga nagasamba didto. ² Pero ayaw na magsukuya ang dya-ag sa luwas ng templo, kay gingtao na ini sa mga bukon Judio. Pagadumayahan ninda ning malain ang banal nga siyudad nga Jerusalem sa suyod ng 42 ka bulan. ³ Taw-an ko ning otoridad ang akon duha nga testigo nga nakabarò ning kustal, para magwali ng akon matuod nga mensahe sa suyod ng 1,260 ka adlaw.”

⁴ Ining duha nga tawo hay magatindog sa atubangan ng Ginoo nga nagagahom sa bilog nga kalibutan. Sinda nga duha hay ginatawag nga kahoy nga olibo^a kag butangan ning lana nga iwagan. ⁵ Ang abir sin-o nga gusto magsakit sa inda, magaluwas ang kalayo sa inda babà agud sunugon ang inda mga kaaway. Tyad ini ang matatabò sa sin-o man nga gusto magsakit sa inda, dapat siya patyon. ⁶ Gingtaw-an sinda ng Dios ning otoridad para indì pauyanon ang langit sa mga adlaw nang inda pagwali ng mensahe ng Dios. Gingtaw-an da sinda ning otoridad agud ang tubì sa mga subà kag tuburan hay humanon nga dugò. May gahom da sinda sa paghuman ning iba-iba nga salot agud siraon ang dutà. Himuon ninda ini permi basta gusto ninda.

⁷ Pagkatapos ninda magpamatuod, ang makahiyadlok nga hayop hay magaluwas halin sa pinakamadayom nga buhò^b, para labanan sinda. Mapeperdi ang duha nga miyugwali kag mapapatay. ⁸ Kag ang inda patay nga lawas hay magahayang sa tungà ng karsada ng mabahoy nga siyudad. Ini nga siyudad hay ginakumpara sa Sodoma o Ehipto^c kung sa diin didto da ginglangsang sa krus ang inda Ginoo. ⁹ Sa suyod ng tuyo ka adlaw kag tungà, ang inda lawas hay pagasiruon ng mga tawo halin sa iba-iba nga mga inapo, mga tribo, mga nagahambay sa iba-iba nga lingguahe kag mga nasyon. Kag indì magsugot ang mga tawo nga ibutang sa lubungan ang inda lawas. ¹⁰ Kag ang mga tawo nga nagaistar sa kalibutan hay magakalipay, magasilibrar kag magtinaw-anan sinda ning regalo sa isa kag isa kay ining duha nga miyugbalità ng mensahe ng Dios hay nagtao ning tudo nga pasakit sa inda.

¹¹ Pero pagkalipas nang tuyo ka adlaw kag tungà, ibabalik liwat ng Dios ang inda kabuhì, kag magatindog sinda. Tudo gid ang kahadlok ng mga makakità sa inda. ¹² Pagkatapos nabatian ng duha nga miyugbalità ng mensahe ng Dios ang makusog nga bosis halin sa langit nga nagahambay sa inda, “Sakà diri!” Kag nagpalangit sinda sa isa ka panganod mintras nagatan-aw ang inda mga kaaway.

¹³ Nang adto nga oras, nagkaigwa ning kakusog-kusog gid nga linog kag nagkagubà ang ikanapuyò ka parte ng siyudad. Ang napatay sa linog hay 7,000 ka tawo kag ang wayà napatay hay hinadlukan gid kag nagtao ning himayà sa Dios sa langit.

¹⁴ Nagligad na ang ikaduha nga makahiyadlok. Tandai ang ikatuyo nga makahiyadlok hay magaabot nga daan.

¹⁵ Pagkatapos adto, ginghuyop ng ikapito nga anghel ang iya trumpita kag igwa ning makusog nga mga bosis halin sa langit nga nagahambay, “Niyan ang bilog nga kalibutan hay naging gingharian ng aton Ginoo kag ng iya gingpilì nga Mesias^d. Magaharì siya hasta sa wayà katapusan.” ¹⁶ Kag ang baynti kuwatro nga miyugdumaya^e nga nagapungkò sa trono sa atubangan ng Dios hay nagluhod kag nagsamba sa Dios, ¹⁷ nga nagahambay,

¹⁹ Pagkatapos adto, may nagbukas ng templo ng Dios sa langit kag nakità ang iya Kaban ng Kasugtanan sa suyod ng templo. Pagkatapos nagpinangilat, nagkinalingaw, nagpinangdayugdog, naglinog kag may madakò nga uyan ng yelo.