¹ Pagkatapos adto, may makatitingaya nga palatandaan ang nakità sa langit. Nakità ko ang isa ka babayi nga nakabarò ning adlaw kag may bulan sa idayom ng iya mga siki kag sa iya uyo hay may korona nga 12 nga bituon. ² Siya hay malapit na mag-ongà, nganì nagasinggit siya sa subra nga kasakit nga iya nababatyagan sa iya pag-ongà.

³ May isa pa nga palatandaan ang nakità sa langit. Nakità ko ang isa nga kabahoy-bahoy nga dragon nga puya ang kolor, may pito ini nga uyo. Napuyò ang iya sungay kag may korona sa kada uyo. ⁴ Gingkahig ng iya ikog paubos ang ikatuyo ka parte ng mga bituon sa langit kag gingpilak sa dutà. Ang dragon hay nagtindog sa atubangan ng babayi nga malapit na mag-ongà, agud kaunon ang lapsag pag maiongà ini.

⁵ Niyan nag-ongà siya ning lyaki nga imaw ang magadumaya nga may kumplito nga otoridad sa tanan nga nasyon sa kalibutan. Adto nga daan, gulpi nga may nag-agaw sa iya ongà kag gingdaya sa Dios, didto sa iya trono. ⁶ Pagkatapos ang babayi hay nagdyagan sa malangkag nga lugar nga gingpreparar ng Dios para sa iya, agud diparahon siya didto sa suyod ng 1,260 ka adlaw.

⁷ Pagkatapos adto, nagtunà ang gira sa langit. Si Miguel kag ang iya mga kaibahan nga anghel hay nagpakig-away sa dragon. Nagbatò da ang dragon kag ang iya tagasunod nga mga anghel. ⁸ Pero naperdi ang dragon kag ang iya mga anghel nganì gingpalayas sinda sa langit. ⁹ Kag gingpilak ang kabahoy-bahoy nga dragon. Siya ang sawa nang una nga tiyempo nga ang pangayan hay ‘Diyablo’ o ‘Satanas’ nga nangdayà sa mga tawo sa bilog nga kalibutan. Gingpilak siya sa dutà patì ang iya tagasunod nga mga anghel.

¹⁰ Pagkatapos nabatian ko ang makusog nga bosis halin sa langit nga nagahambay, “Niyan, nag-abot na ang oras nga luwason ng aton Dios ang iya mga tawo! Ginagamit na niya ang iya gahom sa pagdumaya bilang harì sa bilog nga kalibutan! Ginapakità na niya ang otoridad ni Kristo nga iya gingpilì! Kay gingpilak na ang miyug-akusar sa aton mga kauturan. Siya hay nagaakusar sa inda adlaw kag gab-i sa atubangan ng aton Dios. ¹¹ Sinda hay nagdaog laban sa iya tungod sa pagkamatay ng Karnero kag paagi sa paghambay ng inda pamatuod. Kag wayà sinda nahadlok nga mapatay tungod sa inda pagtuo. ¹² Nganì kalangitan kag kamo nga mga nagaistar dirà, magkalipay kamo! Pero makaluluoy gid kamo nga mga nagaistar sa dutà kag sa dagat, kay ang tudo nga kahangit ng Diyablo hay magaabot sa indo kay sayod niya nga matag-od na lang gid ang oras nga mahuman niya ang iya gusto.”

¹³ Kag nang nasayuran ng dragon nga gingpilak siya sa dutà, nilahay niya para pasakitan ang babayi nga nag-ongà ning lyaki. ¹⁴ Pero gingtaw-an ang babayi ning duha nga pakpak pareho sa mabahoy nga agila agud makalupad siya palayò sa atubangan ng sawa pakadto sa malangkag nga lugar kung sa diin diparahon siya didto nang tuyo ka tuig kag tungà.

¹⁵ Pagkatapos nagbuga ang sawa halin sa iya babà ning madamò nga tubì nga daw sa bahà pakadto sa babayi agud maanod siya. ¹⁶ Pero gingtabangan ng dutà ang babayi, nag-abri ang babà ng dutà kag gingsuyop ang tubì nga gingbuga ng dragon. ¹⁷ Sa kahangit ng dragon sa babayi, ging-atubang niya ang mga nabilin sa iya inapo para girahon sinda. Ini nga mga inapo hay ang tanan nga nagasunod sa mga sugò ng Dios kag nagtuman sa kamatuuran nga gingtudlò ni Hesus.

¹⁸ Kag nagtindog ang dragon sa baybay ng dagat.