¹ Pagkatapos adto, nakità ko ang makahiyadlok nga hayop nga nagahaw-as halin sa dagat, nga may napuyò nga sungay kag may pito nga uyo. May korona sa kada sungay kag sa iya kada uyo hay may pangayan ng pagpang-insulto sa Dios. ² Ang makahiyadlok nga hayop nga akon nakità hay pareho sa leopardo. Ang iya mga siki hay daw sa oso kag ang iya babà hay pareho sa babà ng leon. Gingtao ng dragon sa makahiyadlok nga hayop ang iya sarili nga gahom kag ang iya dakò nga otoridad sa pagdumaya bilang harì.

³ Ang isa sa mga uyo ng makahiyadlok nga hayop hay daw napilas nga hayos ikinamatay niya, pero nag-ayo ini nga pilas. Kag ang tanan nga tawo sa kalibutan hay natingaya gid, nganì nagsunod sinda sa iya. ⁴ Gingsamba ng mga tawo ang dragon kay gingtao niya ang gahom sa makahiyadlok nga hayop. Gingsamba da ninda ang makahiyadlok nga hayop, siling ninda, “Sin-o ang makapareho ng makahiyadlok nga hayop kag sin-o ang puydi lumaban sa iya?” Wayà gid!

⁵ Kag gingtugutan ng Dios ang makahiyadlok nga hayop nga magpinahambog kag maghinambay ning pang-insulto sa iya, kag magdumaya sa suyod ng 42 ka bulan. ⁶ Kag naghambay siya ning mga kalain-lain kuntra sa Dios, ging-insulto niya ang pangayan ng Dios, ang ginaistaran ng Dios kag ang tanan nga nagaistar didto. ⁷ Gingtugutan siya para girahon kag pirdihon ang mga tawo nga ginglain ng Dios para sa iya. Kag gingtaw-an da siya ning otoridad para magdumaya sa tanan nga mga tribo, mga inapo, mga nagahambay ning iba-iba nga lingguahe, kag mga nasyon. ⁸ Ang tanan nga tawo nga nagaistar sa dutà hay magasamba sa iya, puyra lang sa mga tawo nga ang pangayan hay nakasulat sa Libro ng Kabuhì, magtunà pa nang ginghuman ang kalibutan. Ini nga libro hay sa Karnero nga gingpatay. ⁹ Kamo nga nagapamatì, dapat intindihon gid nindo ang imo nabatian.

¹¹ Pagkatapos nakità ko ang isa pa nga makahiyadlok nga hayop nga nagaluwas halin sa dutà. Igwa ini ning duha nga sungay pareho ng sungay ng karnero, pero ang iya bosis hay pareho ng huni ng dragon. ¹² Ginagamit niya ang tanan nga otoridad ng una nga makahiyadlok nga hayop sa pagserbisyo sa iya. Ginapilit niya ang tanan nga tawo sa kalibutan nga magsamba sa una nga hayop nga napilas nga ikinamatay niya pero nabuhì liwat. ¹³ Nakahuman ning pambihirà nga mga makatitingaya ining pangaduha nga makahiyadlok nga hayop. Nahuhuman niya abir magpababà sa dutà ning kalayo halin sa langit sa panirò ng mga tawo. ¹⁴ Gingtugutan siya nga maghuman ning mga makatitingaya sa pagserbisyo sa nauna nga hayop. Kag paagi sa mga ini, nadayà niya ang mga tawo nga nagaistar sa kalibutan. Gingsugò niya ang mga tawo sa kalibutan nga maghuman ning imahen ng nauna nga hayop nga napilas ng espada, pero wayà siya mamatay. ¹⁵ Kag gingtugutan da ang pangaduha nga makahiyadlok nga hayop para taw-an ning kabuhì ang imahen ng una nga hayop. Nganì nakahambay ang imahen kag ginapapatay niya ang tanan nga indì magsamba sa iya.

¹⁶ Kag gingpuwersa ng ikaduha nga hayop para tatakan sa tuo nga kamot o agtang ang tanan nga tawo: dungganon kag bukon, manggaranon kag pubre, ulipon kag bukon. ¹⁷ Kag wayà gid ning may makabakay o makabaligyà puyra lang sa mga tawo nga may tatak ng pangayan ng una nga makahiyadlok nga hayop o ng numero ng iya pangayan. ¹⁸ Kahinangyan diri ng kamayad para maintindihan ini. Puydi masayuran ang numero ng hayop ng abir sin-o nga mayad kung sumahon ini. Kag ini hay numero ng tawo. Ang numero hay 666.