¹ Pagkatapos adto, nagtan-aw ako kag nakità ko ang Karnero nga nagatindog sa Bukid ng Sion. Kaibahan niya ang 144,000 nga tawo nga may pangayan ng Karnero kag ng iya Amay nga nakasulat sa inda agtang. ² Kag nabatian ko ang tunog halin sa langit nga daw tunog ng mabahoy nga busay kag pareho sa makusog nga tunog ng dayugdog. Ini hay pareho ng tunog ng madamò nga mga miyug-alpa nga nagakayas ng inda alpa.

³ Sinda hay nagakanta ning bag-o nga kanta sa atubangan ng trono kag ng upat nga buhì nga hayop kag ng mga miyugdumaya^a. Wayà ning abir sin-o nga makaantigo ng adto nga kanta kundì adto lang ang 144,000 nga gingtubos sa kalibutan. ⁴ Imaw ini sinda ang mga lyaki nga wayà mahigko-i ang inda mga sarili ng mga babayi kay wayà sinda nag-asawa. Nagasunod sinda sa Karnero abir diin siya magkadto. Sinda hay gingtubos sa kalibutan para maging una nga halad sa Dios kag sa Karnero. ⁵ Wayà gid sinda naghambay ning pinusong kag wayà gid ning may maihambay laban sa inda.

⁶ Nakità ko ang isa pa nga anghel nga nagalupad sa ibabaw. Igwa siya ning wayà nagabaylo nga Maayo nga Balità para sa mga tawo sa bilog nga kalibutan: sa tanan nga nasyon, tribo, mga nagahambay sa iba-iba nga lingguahe kag inapo. ⁷ Nagasinggit siya ning makusog, “Tahura nindo ang Dios kag dayawa ang iya himayà! Kay nag-abot na ang oras para husgahan niya ang mga tawo. Sambaha nindo ang Dios nga naghuman ng langit, ng dutà, ng dagat kag ng mga tuburan.”

⁸ Pagkatapos, ang ikaduha naman nga anghel ang nagsunod nga nagahambay, “Nagubà na! Nagubà na ang bantog nga siyudad ng Babilonia! Kay gingpainom niya ang tanan nga nasyon ning maisog nga ilimnanon nga imaw ang pagsunod sa malain nga ginahandom ng imoral nga pakipag-relasyon.

⁹ Pagkatapos, ang pangtuyo naman nga anghel ang nagsunod nga nagahambay ning makusog, “Ang bisan sin-o nga nagasamba sa una nga makahiladlok nga hayop kag sa iya imahen kag nakabaton ning tatak sa iya agtang o sa iya kamot, ¹⁰ hay pinainom ning ilimnanon nga imaw ang tudo nga kahangit kag makahiyadlok nga parusa ng Dios nga wayà gid ning kaluoy nga iya gingpreparar. Pagaparusahan siya sa kalayo nga may asupre mintras nagasirò ang banal nga mga anghel kag ng Karnero. ¹¹ Ang aso ng kalayo nga magaparusa sa inda hay magapaibabaw hasta sa wayà katapusan. Adlaw o gab-i hay wayà gid ning pahuway ang mababatyagan nga kasakit ng adtong mga nagasamba sa makahiyadlok nga hayop kag sa iya imahen, sinda nga nagpatatak ng iya pangayan.”

¹² Nganì kahinangyan gid magpadayon abir pa sa kahugaan ang mga banal nga tawo ng Dios para sa iya nga magsunod sa mga sugò ng Dios kag magtuo kay Hesus.

¹³ Pagkatapos, may nabatian ako nga bosis halin sa langit nga nagahambay, “Isulat mo ini: malipayon ang mga nagasunod sa Ginoo hasta sa kamatayon tunà niyan.”

“Huo, matuod gid!” hambay ng Espiritu.

“Makapahuway na sinda sa inda mga pagpangabudlay kay taw-an sinda ning premyo tungod sa inda mga pagserbisyo.”

¹⁴ Pagkatapos adto, nagtan-aw ako kag nakità ko ang putì nga panganod kag sa ibabaw ng panganod hay may nagapungkò nga daw sa tawo, nga may korona nga bulawan sa uyo kag may bitbit nga maduyot nga karit.

¹⁵ Pagkatapos, isa pa nga anghel ang nagluwas sa templo nga nagasinggit ning makusog sa nagapungkò sa panganod, “Gamita ang imo karit kag mag-ani kay nag-abot na ang oras kag hinog na ang anihon sa kalibutan!” ¹⁶ Nganì gingkumpas ng nagapungkò sa panganod ang iya karit kag naani ang anihon sa kalibutan.

¹⁷ Pagkatapos may isa pa nga anghel ang nagluwas halin sa templo sa langit nga may bitbit da nga maduyot nga karit. ¹⁸ Pagkatapos may isa pa nga anghel ang nagluwas halin sa altar. Siya hay may otoridad para mamahayà sa kalayo. Ginghambay niya sa anghel nga may bitbit nga maduyot nga karit, “Gamita na ang imo karit kag imo na anihon ang mga ubas sa tanan nga ubasan sa dutà kay hinog na!” ¹⁹ Nganì gingkumpas ng anghel ang iya karit kag ging-ani ang mga ubas sa bilog nga kalibutan. Gingpuntok ini sa pugaan ning ubas^b. Ang halimbawà ng pagpugà hay ang tudo nga kahangit ng Dios. ²⁰ Ang mga ubas hay gingpugà sa ginapugaan sa luwas ng siyudad kag nagbahà ang dugò halin sa ginapugaan nga ang kalayò hay 300 kilomitro^c kag mga isa ka dupa ang kataas.