¹ Pagkatapos adto, nakità ko ang isa pa nga makatitingaya kag pambihirà nga palatandaan sa langit. May pito nga anghel nga nagadaya ng pito nga parusa. Nang natapos na ng Dios ang pagparusa sa mga tawo paagi sa ini nga mga salot, naduyà na ang iya kahangit kuntra sa mga tawo sa kalibutan.

² Nakità ko ang daw dagat nga matin-aw kag daw nahaluan ning kalayo nga nagadayab. Kag nakità ko ang mga nagdaog laban sa makahiyadlok nga hayop kag sa iya imahen kay wayà sinda nagasamba sa iya kag wayà nagpamarka ng numero ng iya pangayan. Ini sinda hay gatindog sa daw dagat nga matin-aw kag may ginahawiran nga mga alpa nga gingta-o sa inda ng Dios. ³ Ginakanta ninda ang kanta ni Moises nga ulipon ng Dios kag ang kanta ng Karnero. Imaw ini ang inda kanta:

⁵ Pagkatapos ninda magkanta, nakità ko nga nagbukas ang templo sa langit, pareho ng Tolda nga sambahan kung sa diin nakabutang ang mga bato nga pantay nga gingsulatan ng mga sugò ng Dios. ⁶ Kag nagluwas sa templo ang pito nga anghel nga may pito nga salot. Nakasuksuk sinda ning malimpyo kag makintab nga barò, kag may hagkos nga bulawan nga nakapalibot sa inda dughan. ⁷ Kag ang isa sa upat nga buhì nga hayop hay nagta-o sa pito nga anghel ning pito nga hambawan nga bulawan. Ini hay punò gid ning kahangit ng Dios nga nagakabuhì hasta sa wayà katapusan. ⁸ Ang templo hay napunò ning aso nga halin sa himayà kag gahom ng Dios. Kag wayà ning may makasuyod sa templo mintras wayà pa matapos ang pito nga salot nga halin sa pito nga anghel.