¹ Pagkatapos adto, nabatian ko ang makusog nga bosis halin sa templo nga nagahambay sa pito nga anghel, “Kadto na kag ibubò sa kalibutan ang suyod ng pito nga hambawan ng kahangit ng Dios!”

² Nganì nagpanaw ang una nga anghel kag gingbubò ang suyod ng iya hambawan sa kalibutan. Nang gingbubò niya, nagkaigwa ning hubag nga kahilas-hilas kag makaluluad ang mga tawo nga may tatak ng makahiyadlok nga hayop kag nagasamba sa iya imahen.

³ Gingbubò ng ikaduha nga anghel ang suyod ng iya hambawan sa dagat, kag ang dagat hay naging dugò pareho ng dugò ng patay nga tawo. Kag ang tanan nga nagakabuhì sa dagat hay namatay.

⁴ Pagkatapos gingbubò ng ikatuyo nga anghel ang suyod ng iya hambawan sa mga subà, kag sa mga tuburan, kag ang tanan nga tubì naging dugò. ⁵ Nabatian ko ang anghel nga nagapamahayà sa tubì nga nagahambay,

⁸ Pagkatapos gingbubò ng ikaupat nga anghel ang suyod ng iya hambawan sa adlaw, kag nag-init gid ini, nganì ang mga tawo hay nagkapasò sa subra nga kainit. ⁹ Pero abir ang mga tawo hay nagkapasò sa subra nga kainit, naghambay pa gid sinda ning mga kalain-lain kuntra sa Dios nga imaw ang may otoridad nga nagpadaya ng ini nga mga salot. Kag wayà sinda nagtalikod sa salà, kag wayà da sinda nagdayaw sa Dios.

¹⁰ Pagkatapos adto, gingbubò ng ikalima nga anghel ang suyod ng iya hambawan sa trono ng makahiyadlok nga hayop, kag nagduyom ang lugar kung sa diin siya ang nagaharì. Ginakagat ng mga tawo ang inda dilà tungod sa kasakit ng mga salot. ¹¹ Kag naghambay pa gid sinda ning mga kalain-lain kuntra sa Dios nga nagaistar sa langit kay kasakit-sakit gid ang inda nababatyagan tungod sa inda mga hubag, pero wayà sinda nagtalikod sa inda malain nga mga ginahuman.

¹² Pagkatapos gingbubò ng ikaunom nga anghel ang suyod ng iya hambawan sa mabahoy nga Subà ng Eufrates, kag ang tubì sa subà hay nahubas agud makapreparar ang pag-agi para sa mga harì nga halin sa esti. ¹³ Pagkatapos nakità ko ang tuyo nga malain nga espiritu nga pareho sa pakà. Nagaluwas sinda sa babà ng dragon, sa babà ng makahiyadlok nga hayop, kag sa babà ng bukon matuod nga miyugbalità ng mensahe ng Dios. ¹⁴ Ini ang malain nga mga espiritu nga nagahuman ning mga makatitingaya nga milagro. Nagakadto sinda sa mga harì sa bilog nga kalibutan agud tipunon sinda para magpakiggira kuntra sa Dios nga makagagahom sa Adlaw nga Paghusga.

^15,16 Kag gingtipon ng malain nga mga espiritu ang mga harì kaibahan ang inda mga sundalo sa lugar nga ginatawag sa Hebreo nga ‘Harmagedon’.

Pero naghambay ang Ginoo, “Pamatì! Ako hay maabot pareho ng isa ka miyugpangawat kay indì mo masayuran kung ano ang oras nang akon pag-abot. Malipayon ang tawo nga permi nagabantay kag nagapreparar ng iya mga nuog agud indì siya magpanaw nga borlis kag para indì siya mahuy-an kung makità siya ng mga tawo!”

¹⁷ Pagkatapos adto, gingbubò ng ikapito nga anghel ang suyod ng iya hambawan sa hangin, kag nabatian ko ang makusog nga bosis halin sa trono didto sa suyod ng templo nga nagahambay, “Natabò na ang katapusan!” ¹⁸ Kag nagpinangilat, nagkinalingaw, nagpinangdugsak, kag naglinog ning makusog. Imaw gid ini ang pinakamakusog nga linog nga natabò tunà pa nang nahuman ang mga tawo sa kalibutan. Subra gid ini kakusog! ¹⁹ Natungà ang mabahoy nga siyudad sa tuyo ka parte kag nagkagubà ang mga siyudad ng tanan nga nasyon. Wayà gid nalimuti ng Dios ang malain nga ginghuman ng bantog nga Babilonia, nganì pinainom ini ning ilimnanon nga imaw ang tudo nga kahangit ng Dios. ²⁰ Pagkatapos ng makusog nga linog, nagpanglugdang ang tanan nga isla kag nagpantay ang mga bukid, nganì wayà na ini makità. ²¹ Nagkahuyog ang madagkò nga mga yelo nga ang isa hay nagatimbang ning mga 50 ka kilo halin sa langit kag natamaan ang mga tawo. Tungod sa makahiyadlok nga parusa sa inda ng Dios, naghambay sinda ning mga kalain-lain kuntra sa Dios.