¹ Pagkatapos adto, ang isa sa pito nga anghel nga may pito nga hambawan hay nagpalapit sa akon kag naghambay, “Kari diri kay ipakità ko sa imo kung pauno pagaparusahan ang bantog nga hostis nga imaw ang mabahoy nga siyudad nga nagapungkò malapit sa madamò nga subà. ² Nag-ubay sa ini nga babayi ang mga harì sa dutà kag ang mga tawo nga nagaistar sa kalibutan hay nabayong ng iya ilimnanon nga imaw ang pagsunod sa iya imoral nga pakipag-relasyon.”

³ Pagkatapos adto, nag-abot ang Espiritu ng Dios sa akon kag gingdaya ako sa malangkag nga lugar, Nakità ko didto ang babayi nga nakasakay sa makahiyadlok nga hayop nga granate ang kolor. Ini nga hayop hay may pito nga uyo kag may napuyò nga sungay. Kag may nakasulat sa iya bilog nga lawas ang tanan nga hambay nga kalain-lain kuntra sa Dios. ⁴ Ang babayi hay nakabarò ning kolor maron kag granate nga may dikurasyon nga bulawan, kamahay-mahay nga mga bato kag mga perlas, pareho ng ginasuksok ng rayna. May ginabitbit siya nga tasa nga bulawan, punò ning kalaw-ay law-ay kag kahigkò-higkò nga mga butang nga imaw ang iya imoral nga pakipag-relasyon. ⁵ Kag sa iya agtang hay igwa ning nakasulat nga pangayan nga nakatagò ang gusto hambayon. Imaw ini ang nakasulat, “Ang bantog nga Babilonia, ang nanay ng tanan nga hostis^a kag ang ginahalian ng tanan nga kalaw-ay-law-ay sa bilog nga kalibutan.” ⁶ Kag nakità ko ang babayi nga nabayong sa dugò ng mga banal nga tawo ng Dios para sa iya kay sinda hay nagpamatuod parti kay Hesus.

Pagkakità ko sa iya, tudo gid ang akon katingaya. ⁷ Pero naghambay ang anghel sa akon, “Ayaw matingaya. Balitaan ta ikaw kung ano ang gusto hambayon ng babayi kag ng makahiyadlok nga hayop nga iya ginasakyan nga may pito nga uyo kag napuyò nga sungay. ⁸ Ang makahiyadlok nga hayop nga imo nakità hay buhì nang una, pero niyan patay na. Kag magaluwas naman siya liwat halin sa pinakamadayom nga buhò^b, pero pagaparusahan siya hasta san-o. Ang mga tawo nga nagaistar sa kalibutan, nga ang inda pangayan hay wayà nakasulat sa Libro ng Kabuhì, tunà pa nang ginghuman ang kalibutan, hay matitingaya gid pag nakità ninda ang makahiyadlok nga hayop kay buhì siya nang una, niyan patay na, pero nabuhì liwat.

⁹ “Kahinangyan diri ng kamayad para maintindihan ini. Ang pito nga uyo hay imaw ang pito nga bukid nga ginapungkuan ng babayi. Sinda da ang pito nga harì. ¹⁰ Patay na ang lima sa inda, ang isa hay nagaharì pa gihapon kag ang isa naman hay wayà pa nagaabot. Kung mag-abot siya kag magharì, indì siya magdugay. ¹¹ Ang makahiyadlok nga hayop nga buhì nang una pero arinyan patay na hay imaw ang ikawayo nga harì. Imaw gida siya ang isa sa pito nga harì. Pero siya da hay pagaparusahan hasta san-o.

¹² “Ang napuyò nga sungay nga imo nakità hay ang napuyò nga harì, nga wayà pa nakatunà ng inda paghaharì. Taw-an sinda ning otoridad nga magharì kaibahan ng makahiyadlok nga hayop pero kaisot lang nga tiyempo. ¹³ Ining napuyò hay may isa lang nga plano, nganì itao ninda ang inda gahom kag otoridad sa makahiyadlok nga hayop. ¹⁴ Girahon ninda ang Karnero pero mapeperdi sinda, kay ang Karnero imaw ang Ginoo nga mas mataas sa tanan nga ginoo kag Harì nga mas mataas sa tanan nga harì. Kaibahan ng Karnero sa pagdaog ang mga gingpilì, gingtawag kag matutom nga tagasunod niya.”

¹⁵ Ginghambay sa akon ng anghel, “Ang madamò nga tubì nga imo nakità, nga ginapungkuan ng hostis hay ang mga tawo halin sa tanan nga mga inapo, mga nasyon, kag mga nagahambay sa iba-iba nga lingguahe. ¹⁶ Ang imo nakità nga napuyò nga sungay kag ang makahiyadlok nga hayop, hay tudo gid ang inda kahangit sa hostis. Kag aagawon ninda ang tanan niya nga pagkabutang kag pabay-an siya nga nakauba. Pagkatapos kaunon ninda ang iya lawas kag sunugon ang mabibilin. ¹⁷ Kay gingbutang ng Dios ang iya plano sa inda isip, gingtugutan niya ini kay imaw ini ang iya gusto. Nganì sinda hay nagkaisa nga gingpasakop sa makahiyadlok nga hayop ang inda gahom sa pagdumaya bilang harì, hasta matabò ang tanan nga ginghambay ng Dios.

¹⁸ “Ang babayi nga imo nakità hay wayà ning iban kundì ang mabahoy nga siyudad nga nagdumaya sa mga harì sa bilog nga kalibutan.”