¹ Pagkatapos adto, nakità ko ang isa pa nga anghel nga nagababà halin sa langit. Siya hay may madakò nga otoridad kag nahayagan ng iya kasilaw ang kalibutan. ² Nagsinggit siya ning makusog nga nagasiling, “Nasirà na! Nasirà na ang bantog nga Babilonia! Ini hay naging istaran na lang ng malain nga mga espiritu kag ng tanan nga klasi ng mahigkò nga espiritu, kag pugaran na lang ng tanan nga klasi ng mga mahigkò nga pispis kag panaguan ng tanan nga klasi ng makangingil-ad nga hayop. ³ Natabò ini sa Babilonia kay gingpainom niya ang tanan nga nasyon ning ilimnanon ng iya malain nga handom nga imaw ang iya imoral nga pakipag-relasyon. Nag-ubay sa iya ang mga harì sa dutà kag ang mga negosyanti sa kalibutan hay nagmanggaranon tungod sa iya pagpasuba-suba sa manggad halin sa mga negosyo.”

⁴ May nabatian pa gid ako nga bosis halin sa langit nga nagahambay, “Magpalayò kamo sa iya, akon mga gingpilì! Agud indì kamo makalakot sa iya mga salà nga ginahuman kag para indì kamo maumid sa pagparusa sa iya! ⁵ Kay ang iya mga salà, pag luntod-lunturon hay daw abot na hasta sa langit. Kag wayà gid nalimuti ng Dios ang iya mga kalainan. ⁶ Himua nindo sa iya ang ginghuman niya sa indo. Bayusi nindo ning dubli ang iya ginghuman. Preparahan nindo ang iya tasa ning ilimnanon nga dubli ang kaisog kaysa iya gingpreparar sa indo. ⁷ Kung pauno siya nagpahambog kag nagpasuba-suba sa iya manggad, ipabatyag da nindo sa iya ang subra nga pagpasakit kag pagkalisod. Kay hambay niya sa sarili, ‘Ako hay rayna nga nagadumaya nga may otoridad! Wayà gid ako kabatyag ning kalisod pareho ng bayo.’ ⁸ Tungod diri, sa suyod ng isa ka adlaw dungan nga magaabot sa iya ang mga salot: ang kamatayon, kalisod, kag kagutom. Kag pagasunugon siya sa kalayo kay makagagahom ang Ginoo nga Dios nga magahusga sa iya.

⁹ “Magauwang kag magadanguyngoy ang mga harì sa kalibutan nga nag-ubay sa iya kag nagpasuba-suba sa iya manggad, pag makità ninda ang aso ng siyudad nga nasusunog. ¹⁰ Sa malayò lang sinda magalantaw kay nahadlok sinda nga maumid sa iya subra gid nga pagpasakit. Magasiling sinda, ‘Kanugon! Kanugon ang mabahoy nga siyudad nga Babilonia! Kay sa suyod lang nang matag-od nga tiyempo hay matatabò ang parusa sa bantog nga siyudad!’

¹¹ “Sa matatabò sa iya, magauwang kag magakalisod ang mga negosyanti sa kalibutan, kay wayà na gid ning may mabakay sa inda mga baligyà ¹² nga mga bulawan, mga pilak, mga bato nga kamahay-mahay, mga perlas; mga maayo nga klasi ng tela nga putì, maron, granate kag seda; tanan nga klasi ng tabla nga mahumot kag tanan nga gamit nga himò sa sungo ng elepanti, mga gamit nga himò sa kahoy nga kamahay-mahay, sa bronsi, sa saysayon, kag sa marbol. ¹³ Wayà na ning abir sin-o nga mabakay ng sinamon, pahumot nga kamahay-mahay, insenso, mahumot nga mira kag kamangyan nga mamahayon. Imaw da ang ilimnanon, lana, arina, kag trigo; ang mga baka, karnero, kabayo kag kalisa, kag patì ang inda mga ulipon nga mga tawo. ¹⁴ Magahambay sa iya ang mga negosyanti, ‘Wayà na ang tanan nga maayo nga mga bagay nga imo ginahandom. Ang tanan nga mga manggad kag mga kaayo-ayo nga mga butang hay naduyà na. Indì mo na makikità ang mga ini liwat.’

¹⁵ “Ang mga negosyanti nga magmanggaranon paagi sa iya hay magatindog sa malayò kay nahadlok sinda nga maumid sa iya subra nga pagpasakit. Magauwang sinda kag magadanguyngoy, ¹⁶ nga ang hambay, ‘Kanugon! Kanugon ang natabò sa mabahoy nga siyudad! Dati siya hay nakabarò ning maayo nga tela, kolor maron kag granate, nga may dikurasyon nga bulawan, mga kamahay-mahay nga bato kag mga perlas, pareho ng ginasuksok ng rayna! ¹⁷ Pero sa suyod lang nang matag-od nga tiyempo, adto tanan nga manggad hay maduduyà!’

“Ang mga kapitan ng mga bapor, mga pasahiro, mga tripulanti kag ang tanan nga may pangabuhì sa dagat hay magatan-aw sa malayò. ¹⁸ Mintras ginalantaw ninda sa malayò ang aso ng nasusunog nga siyudad nga nagapaibabaw, nagasinggit sinda, ‘Wayà gid ning makapareho sa inà nga mabahoy nga siyudad!’ ¹⁹ Kag isabwag ninda ang abo sa inda mga uyo kag magasinggit. Magauwang sinda kag magakalisod, nga ang hambay, ‘Kanugon! Kanugon ang natabò sa mabahoy nga siyudad! Tungod sa iya manggad, nagmaggaranon ang tanan nga may mga salakyan sa dagat nga nagpakignegosyo sa iya! Pero sa suyod lang nang matag-od nga tiyempo, maduduyà ang tanan!’

²⁰ “Magkalipay kamo nga yarà sa langit sa natabò sa iya! Magkalipay da kamo nga mga banal nga tawo ng Dios, mga apostol kag mga miyugbalità ng mesahi ng Dios kay gingsintinsyahan na siya ng Dios sa iya mga gingpanghuman sa indo!”

²¹ May isa nga mamakagagahom nga anghel ang nagbuoy ning bato pareho sa mabahoy nga gilingan. Gingtagbong niya ini sa dagat kag naghambay, “Tyad gid ini itagbong ang bantog nga siyudad ng Babilonia kag indì na gid ini makità liwat. ²² Indì na gid mabatian liwat sa siyudad ang tunog ng mga sunata ng mga miyug-alpa, ng mga miyugkanta, ng mga miyugpatunog ng plawta kag ng mga miyugpatunog ng trumpita! Kag indì na da makità ang mga trabahador sa abir ano nga klasi ng patrabahuan kag bisan ang tunog ng gilingan hay indì na gid mabatian. ²³ Wayà na gid ning may makikità ang mga tawo nga kahayag ng imo iwagan. Wayà na ning may mababatian pa nga mga silibrasyon ng ginakasay. Pagaparusahan ang Babilonia kay ang mga negosyanti didto hay masyado ka matinaas-taason kag tungod ang miyugpangbarang didto hay dinayà ang mga nasyon sa bilog nga kalibutan.”

²⁴ Gingparusahan ang Babilonia kay salabton niya ang pagpatay sa mga miyugbalità ng mensahe ng Dios, sa iya mga banal nga tawo kag sa tanan nga gingpatay sa bilog nga kalibutan.