19
1 Pagkatapos adto nga mga bagay, nabatian ko ang tunog nga daw sa bosis ng kadamo-damò nga mga tawo sa langit nga nagakanta ning makusog,
“Halleluia!a Ang kaluwasan hay halin lang gid sa aton Dios. Sa iya ang himayà kag gahom.
2 Kay matuod kag tamà ang iya paghusga!
Ginghusgahan ng Dios ang bantog nga hostis, tungod gingdaya niya ang mga tawo sa kalibutan nganì ginghuman ninda ang imoralidad sa iya.
Gingbayusan siya ng Dios kay gingpangpatay niya ang mga ulipon ng Dios.”
3 Nagkanta sinda liwat,
“Halleluia! Ang aso ng nasusunog nga siyudad hay nagapaibabaw hasta sa wayà katapusan!”
4 Ang baynti kuwatro nga miyugdumayab kag ang upat nga buhì nga hayop hay nagluhod kag nagsamba sa Dios nga nagapungkò sa trono. Hambay ninda,
“Kabay pa! Halleluia!”
Ang Punsyon sa Kasay ng Karnero
5 Pagkatapos may bosis halin sa trono nga nagahambay,
“Dayawa nindo ang aton Dios, kamo tanan nga mga ulipon nga nagaserbisyo sa iya, kag kamo nga mga nagarispito sa iya, bantog man o bukon.”
6 Pagkatapos adto, nabatian ko ang tunog nga daw sa bosis ng kadamo-damò nga mga tawo, pareho ng haganas ng mabahoy nga busay kag daw sa makusog nga tunog ng mga dayugdog nga nagahambay,
“Halleluia! Kay ang Ginoo nga aton Dios nga ang makagagahom hay nagaharì na sa tanan.
7 Magkalipay kag magsilibrar kita!
Himayaon naton siya kay nag-abot na ang oras ng Karnero para ikasay sa iya mapapangasawa nga babayi nga preparado na.
8 Gingtao sa iya ng Dios ang dapat niya nga isuksok nga maayo nga barò, makintab kag malimpyo.” (Ang maayo nga barò hay ang maayo nga mga ginghuman ng mga banal nga tawo ng Dios.)
9 Naghambay ang anghel sa akon, “Isulat mo ini: Malipayon ang mga ging-imbitar sa gingpreparar nga punsyon sa kasay ng Karnero.” Kag hambay pa gid niya, “Imaw gid ini ang matuod nga mga hambay ng Dios.”
10 Pagkatapos adto, nagluhod ako sa atubangan ng iya siki agud sambahon siya, pero naghambay siya sa akon, “Ayaw inà paghumana! Ang Dios lang gid ang dapat mo nga sambahon kay ako hay ulipon da ng Dios pareho mo kag ng imo mga kauturan nga nagapamatuod ng inda pagtuo kay Hesus. Ang gingpamatuod ni Hesus hay imaw ang kamatuuran nga gingpasayod sa miyugbalità ng mensahe ng Dios parti sa iya.”
Ang Pagdaog ng Mesias Kuntra sa Makahiyadlok nga Hayop
11 Pagkatapos adto, nagtan-aw ako kag nagbukas ang langit, gulpi na lang nga nakità ko ang isa ka putì nga kabayo kag ang nagasakay didto. Ginatawag siya nga, ‘Ang Matutom kag Matuod’ kay matarong ang iya paghusga kag pakipaggira sa mga kaaway. 12 Ang iya mga mata hay daw pareho sa kalayo nga nagadayab kag sa iya uyo hay may madamò nga korona. May pangayan nga nakasulat sa iya, pero wayà ning may nakasayod kung ano adto, kundì siya lang gid. 13 Nakasuksuk siya ning barò nga uyob gid ning dugò. Kag ang pangayan nga ginatawag sa iya, ‘Ang Hambay ng Dios.’ 14 Kag nagasunod sa iya ang mga sundalo ng langit, nga nagasakay sa putì nga mga kabayo kag nakabarò ning maayo nga tela, maputì kag malimpyo. 15 May nagaluwas nga maduyot nga espada sa iya babà. Ini ang iya gamiton sa pagperdi sa mga nasyon. Kag pagadumayahan niya sinda nga may kumplito nga otoridad kag pugaon niya sa pugaan ng ubasc ang ilimnanon. Ang halimbawà ng pagpugà hay ang tudo nga kahangit ng Dios nga makagagahom sa tanan. 16 Sa iya barò nga pangluwas kag hità hay may nakasulat nga pangayan, ‘Harì nga mas mataas sa tanan nga harì kag Ginoo nga mas mataas sa tanan nga ginoo.’
17 Pagkatapos adto, nakità ko naman ang isa nga anghel nga nagatindog sa adlaw. Gingsinggitan niya ning makusog ang tanan nga pispis nga nagalupad sa ibabaw. Ang hambay niya, “Kari kamo kag magtipon para sa ingrandi nga punsyon ng Dios! 18 Kari kag kaunon ang unod ng mga harì, ng mga sundalo kag ng inda mga pinunò, ng mga kabayo, kag ng mga nagasakay sa inda. Kauna nindo ang unod ng tanan nga tawo: ulipon kag hilway; bantog kag bukon!”
19 Pagkatapos nakità ko ang makahiyadlok nga hayop, ang mga harì sa kalibutan kag ang inda mga sundalo nga nagtipon-tipon agud girahon ang nakasakay sa kabayo nga putì kag ang kaibahan niya nga mga sundalo. 20 Nabihag ang makahiyadlok nga hayop, patì da ang bukon matuod nga miyugbalità ng mensahe ng Dios nga naghuman ning mga makatitingaya sa atubangan ng hayop. Paagi sa iya mga ginghuman, gingdayà niya ang mga tawo nga may marka ng hayop kag nagasamba sa imahen ng hayop. Sinda nga duha hay gingpilak nga buhì sa kalapad-lapad nga nagadabadaba ang kalayo nga may asupre. 21 Kag ang iban nga nagkabilin hay gingpatay ng nagasakay sa kabayo nga putì paagi sa espada nga nagluwas sa iya babà. Ang tanan nga pispis hay sinubhan sa pagkaon ng inda mga unod.