¹ Pagkatapos adto, nakità ko ang isa nga anghel nagababà halin sa langit nga may bitbit siya sa iya kamot nga mabahoy nga kadina kag lyabi ng pinakamadayom nga buhò^a. ² Kag gingdakop niya ang dragon, nga imaw ang sawa nang una nga tiyempo nga siya da ang Diyablo o Satanas, kag ginggapos siya sa suyod ng isa ka libo ka tuig. ³ Gingpilak siya ng anghel sa pinakamadayom nga buhò, gingkandaduhan kag gingselyuhan. Gingpriso siya agud indì na siya makapangdayà ng mga nasyon hasta nga matapos ang isa ka libo ka tuig. Pagkatapos adto, kahinangyan hay buhian siya sa suyod ng matag-od lang nga tiyempo.

⁴ Pagkatapos nakità ko ang mga trono. Kag ang mga nagapungkò didto hay gingtaw-an ning otoridad para sa paghusga. Nakità ko da ang espiritu ng adtong mga tawo nga gingpangpugutan ning uyo tungod sa inda pagpamatuod parti kay Hesus kag sa Hambay ng Dios. Sinda hay ang mga wayà nagsamba sa makahiyadlok nga hayop o sa imahen kag wayà nagbaton ning taktak ng hayop sa inda mga agtang o mga kamot. Gingbuhì sinda liwat agud magharì kaibahan ni Kristo sa suyod ng isa ka libo ka tuig. ⁵ Imaw ini ang una nga pagbuhì sa mga patay. (Wayà pa mabuhì ang iban pa nga mga patay hasta pagkaligad ng isa ka libo ka tuig.) ⁶ Malipayon ang iya mga banal nga tawo, nga nakaibahan sa una nga pagbuhì sa mga patay. Wayà na ning gahom sa inda ang pangaduha nga kamatayon. Sinda hay maging mga parì para magserbisyo sa Dios kag kay Kristo. Magaharì sinda kaibahan niya sa suyod ng isa ka libo ka tuig.

⁷ Pagkaligad ng isa ka libo ka tuig, buhian si Satanas sa iya kulungan. ⁸ Magaluwas siya para dayaon ang mga nasyon sa bilog nga kalibutan nga kung tawagon hay ‘Gog’ kag ‘Magog’. Pagatipunon sinda para day-on sa gira. Ang inda kadamò hay pareho ng baybay sa dagat. ⁹ Nagkadto sinda halin sa bilog nga kalibutan kag inda gingpalibutan ang kampo ng mga banal nga tawo ng Dios kag ang siyudad nga iya ginapalanggà. Pero nagpadaya ang Dios ning kalayo halin sa langit kag gingsunog sinda. ¹⁰ Kag ang Diyablo nga nagdayà sa inda hay gingpilak sa kalapad-lapad nga nagadabadaba ang kalayo nga may asupre kung sa diin gingpilakan da sa makahiyadlok nga hayop kag sa bukon matuod nga mga miyugbalità ng mensahe ng Dios. Sinda hay pahugaan didto adlaw kag gab-i hasta sa wayà katapusan.

¹¹ Pagkatapos adto, may nakità ako nga mabahoy kag maputì nga trono kag ang nagapungkò didto. Ang langit kag ang dutà hay naduyà sa iya atubangan kag wayà na gid makità. ¹² Kag nakità ko ang mga patay, mga kilaya kag bukon nga nagatindog sa atubangan ng trono. Pagkatapos gingbuksan ang mga libro kag ang isa pa gid nga libro nga imaw ang Libro ng Kabuhì. Kag ang mga patay hay ginghusgahan sunò sa inda mga ginghuman nga nakasulat sa mga libro. ¹³ Gingpaluwas ng dagat ang mga patay nga yadto sa iya. Gingpaluwas da ng Kamatayon kag Hades^b ang mga patay nga yadto sa inda. Kag ang tanan hay ginghusgahan sunò sa inda mga ginghuman.

¹⁴ Pagkatapos ang Kamatayon kag Hades hay gingpilak sa kalapad-lapad nga nagadabadaba ang kalayo, imaw ini ang ikaduha nga kamatayon. ¹⁵ Ang bisan sin-o nga wayà nakasulat ang iya pangayan sa Libro ng Kabuhì hay ipilak sa kalapad-lapad nga nagadabadaba ang kalayo.