1 ɄMʼpepo ʉMʼfinjile ahutibhʉʉzya pa pazelu huje, pa nsiku ɨzyɨ malishilo, abhantu bhamo bhahailuleha ʉlwɨtɨho. Bhahaitejelezyaga ɨmpepo zya zikhopela, na londolezye ɨmanyizyo zyabho. 2 Ɨmanyizyo ɨzyo zihwɨnza na bha bhayanga ɨzyɨ malenga hu gulugulu. Ɨbho, saga bhasaaga lwonti, ʉwuntu nawumo. 3 Bhabhakhaana abhalume huje, bhagandi ahweje, na bhashɨ huje, bhagandi ahwegwe. Bhabhalajizya abhantu huje, bhasahalye ɨvyalye vimo. Leelo, ʉNgʉlʉbhɨ yʉʉyo ahavipelile huje, abhantu bha bhahumwɨtɨha bhavyejelelaje hu nsalifyo, pɨpo bhayimɨɨnye ɨlyoli. 4 Vyonti vya pelile ʉNgʉlʉbhɨ vinza, navimo ɨvya khaane. Abhantu bhakhondɨɨye avyejeelele na je, “Wasalipa Ngʉlʉbhɨ!” 5 pɨpo vyɨtɨshɨlɨɨlwe ni zwi lyakwe na mu mpuuto.

6 Ɨgo, nkashele wabhabhʉʉzya abhaholo bheetu, ɨpo wahaibha mʼomba mbombo mwinza ʉwa Yeesu Kilisiti. Nantele, ʉsibhe ʉleliilwe shinza mu mazwi gɨ lwɨtɨho nɨ manyizyo ɨnyinza zyʉ zyɨtɨha na londolezye. 7 Leelo, ɨvilaale vya viteezya na vya saga vikhondɨɨye avyɨtɨshe, ʉvikhaanaje vyonti. Ʉhwilobhezyaje weewe abhe shiwooziwa, 8 pɨpo “ʉmuntu nka gulobheezya ʉmʼbɨlɨ gwakwe haani huje, gubhe ni khone, abha nɨ ya pamwanya hashe lwene. Leelo, nkashele ahwilobheezya abhe shiwooziwa, ayaaga ɨya pamwanya hu zyonti, hu wʉʉmi ʉwa pa nsi ɨpa nʉ wa habhaazyo haala hahwɨnza.”

9 Izwi ɨlyo lyɨ lyoli, likhondɨɨye alyɨtɨshe hu mwoyo gwonti. 10 Hu nongwa ɨyo, tihwifumya abhombe ɨmbombo yaakwe, pɨpo tihunʼsʉʉbhɨla yʉ Ngʉlʉbhɨ wa li mwʉmi, na wa li Mʼfyʉli wa bhantu bhonti bha bhamwɨtɨɨshe. Nantele, hwa huje Mʼfyʉli wa bhantu bhonti, haani bha bhamwɨtɨɨshe.

11 Ɨgo ga nabhʉʉzya, ʉbhamanyizyaje abhantu, nantele ʉbhalajizye aje, bhagabhombaje. 12 Ʉgandi ahwɨtɨshe huje, pabhe nʉ muntu wa husyoshela pɨpo ʉli nʼsahaala. Leelo, ʉkhalaje shinza, ʉfishile huje, aBhakilisiti abhamwenyu bhamanyilaje hwaliiwe ɨshifwani, hu zyʉ yanga, hu njendo zyaho, hu kʉndwa waaho, hu lwɨtɨho lwaho, na hu sangalusu waaho. 13 Ʉhwifumyaje abhabhaazizye abhantu ɨNsimbo ɨMfinjile, nantele ʉbhajinjizyaje amooyo na bhamanyizye. Ʉjendeelele azibhombe ɨzyo, afishe mu habhaazyo haala ɨhaiyɨnza ʉhwo. 14 Ʉgandi aleshe ashibhombele ɨshikʉnjɨlwa ɨsho ʉNgʉlʉbhɨ sha hapiiye, ahabhaazyo haala abhagoosi bhahahubhɨshɨɨye ɨnyoobhe zyabho na kuwe hu nongwa yaaho.

15 Amazwi ɨgo, ʉgabhombaje hwi khone lyaho lyonti huje, abhantu bhonti bhalolaje pa pazelu shʉ jendeelela. 16 Ʉhwiyenyaaje shʉ khala, ʉhwiyenyaaje na mazwi gʉ manyizya. Nkashele ʉjendeelela alondolezye ɨgo, pa wahaihwifyʉla, nantele wahaibhafyʉla na bhaala bha bhahuhwʉmvwa.