1 Awe ʉmanye shinza huje, mu nsiku ɨzya hu malishilo, huhaibha amayɨmba amagoosi. 2 Abhantu bhahaihwisajilaga bhɨɨbho bheene, bhahaizigana ɨmpɨɨya, bhahaihwipaala, bhahaibha bhɨ mampʉlɨ. Bhahaihunʼiga ʉNgʉlʉbhɨ, saga bhahaibhatiniha abhapaafi bhaabho, saga bhahaisʉmba, nantele saga bhahaisaaga ɨga Ngʉlʉbhɨ. 3 Saga bhahaibha nʉ kʉndwa, saga bhahaibha nɨ nkʉmbʉ, bhahaihwandila ilenga, saga bhahaihwijela. Bhahaibha bhakhali, saga bhahaiyanza aminza, 4 bhahaibha bhaneneelezi, saga bhahaisaaga, bhahaibha na mabaado. Bhahaizigana haani ɨzya mu mʼbɨlɨ ashɨle hunʼgane ʉNgʉlʉbhɨ. 5 Bhahailoleha aje bhooziwa, leelo mu mooyo gaabho bhahaidaliha ikhone lya Ngʉlʉbhɨ. Abhantu nanshi ɨbho, ʉhwiyefwaje nabho.

6 Mwɨbho bhahwɨli bha bhahwitʉʉsya mu nyumba zya bhantu na bhagobele abhashɨ abhalema bha bhakhɨɨtwe nɨ mbiibhi, bhalongozewa nɨ nsʉngwo ɨmbiibhi. 7 Abhashɨ ɨbho bhamanyila ɨmanyizyo ɨnsiku zyonti, leelo bhapootwa azyaganye ɨzya nalyoli. 8 Abhantu ɨbho bha bhabhagobela abhashɨ, bhadindizya ɨlyoli nanshi ʉYaane nʉ Yambule, ʉYaane nʉ Yambule Bhahali bhalaguzi abha mu nsi ɨya hu Miisili mu habhaazyo haala, ʉMoose ahabhefwaga abhaana Izilaeeli. Bhaazya aFume (Kutoka) 7:11-22; 8:18-19. bhope sha bhahanʼdindizyaga ʉMoose. Bhananjiishe ɨnjeele, nantele saga bhakhondɨɨye mu lwɨtɨho. 9 Leelo, saga bhahaifiha napamo, pɨpo ʉkwesu waabho wahaibha pa pazelu hwa bhantu bhonti, nanshi ʉkwesu wa Yaane nʉ Yambule sha wahali pa pazelu.

10 Leelo, awe, ʉzyagɨɨnye shinza ɨmanyizyo zyanɨ, ɨnjendo zyanɨ, ɨnsɨɨbho zyanɨ, nʉ lwɨtɨho, nʉ jimbiilizu, nʉ kʉndwa, na gʉlɨɨlɨle. 11 Nantele, ʉmɨɨnye ʉlutaamyo lwanɨ, na mayɨmba, na gaala ga gahanaajile hu mabooma ga hu Antiyokiya, hu Ikoniyo, na hu Lisitila. Nahajimbile gonti, wope ʉMwɨnɨ ahantʉʉlɨle huli zyonti. 12 Lyoli, bhonti bha bhahwanza abhe bhooziwa mwa Yeesu Kilisiti, bhahaiyɨmvyiwaaga. 13 Leelo, abhantu abhabhiibhi na bhi lenga, bhahaijendeelela abhe bhabhiibhi haani. Bhahaikhopelaga, humo bhahaikhopelwa bhope.

14 Leelo, awe, ʉjendelelaje akhale mu mazwi gaala gʉ manyila, nantele ʉgasimishizya huje, gɨ lyoli, pɨpo awe ʉbhamɨɨnye bha bhahamanyiziizye awe. 15 Afume hu waana waaho, ʉzimɨɨnye ɨNsimbo ɨMfinjile, zya zibhajiiye ahupeele ʉtengamazu, zya zileeta ʉfyʉli hwi dala lyɨ lwɨtɨho mwa Yeesu Kilisiti. 16 ƗNsimbo ɨMfinjile zyonti zisimbwilwe ashɨlɨle hu mwoyi gwa Ngʉlʉbhɨ. Zikhondɨɨye hu manyizyo, asunde abhantu ɨmbiibhi zyabho, hubhalongozye bhaleshe ɨmbiibhi, na bhalanje zyonti ɨngolosu. 17 Pa ʉmuntu wa Ngʉlʉbhɨ abhala bhe abhɨhwɨlwe haani, abhombe ɨmbombo zyonti ɨnyinza.