1 Isiku limo, ʉPeeteli nʉ Yoohani bhahabhalaga hu nyumba ɨmfinjile ɨya Ngʉlʉbhɨ mu saala fundihandwɨmo (9) ɨya nʉsanya, ya yahali saala ya Bhayahuudi humʼpuute ʉNgʉlʉbhɨ. 2 Pa nyumba ɨmfinjile ɨyo, pahali nʉ muntu ʉmo wa halemɨɨye amanama afume apaapwe hwakwe. Ahapɨmbwaga wiila na bhantu. Bhahamʼɨɨhaga mu pɨɨpɨ ni lyango lya bhayiga iLyango ɨLinza. Pɨɨpo ahalaabhaga ɨmpɨɨya hwa muntu wowonti wa tʉʉha mu lubhaga lwɨ nyumba ɨmfinjile ɨya Ngʉlʉbhɨ.

3 Ʉmuntu ʉyo lwa wabhalola ʉPeeteli nʉ Yoohani bhatʉʉha mu lubhaga lwɨ nyumba ɨmfinjile ɨya Ngʉlʉbhɨ, ahabhalaabha ɨmpɨɨya. 4 Ɨpo ʉPeeteli nʉ Yoohani bhahanʼzyamila. ɄPeeteli ahamʼʉʉzya ahaga, “Teenye atɨ!” 5 Ʉmuntu ʉla ahabheenya, ahasʉbhɨlaga huje, bhali na hantu ha bhabhala humʼpeele.

6 Leelo, ʉPeeteli ahamʼʉʉzya ahaga, “Anɨ saga ɨndi nɨ mpɨɨya nka zimo, leelo lyɨ mbajiiye libhombe, ɨnza hubhombele. Ɨhubhʉʉzya hwi taawa lya Yeesu Kilisiti ʉwa hu Nazaleeti, ɨmɨɨlɨla na jende!” 7 Ɨpo ʉPeeteli ahanʼkhata ʉmuntu ʉla ʉnʼkhono ʉgwa hu ndɨɨlo, ahamwɨmɨɨlɨsya. Pɨnɨɨpo lwene ɨnyaayo na mafuunyago agɨ manama ga muntu ʉla gahabha ni khone. 8 Ahatomohana, ahanda ajende yʉʉyo. Ahinjila mu lubhaga lwɨ nyumba ɨmfinjile ɨya Ngʉlʉbhɨ peeka nʉ Peeteli nʉ Yoohani, ahajendaga ʉmwo, ahatomohanaga na hunʼsalifye ʉNgʉlʉbhɨ. 9 Abhantu bhonti bhahanʼola ʉmuntu ʉla ajenda na manama gaakwe yʉʉyo, ahunʼsalifya ʉNgʉlʉbhɨ. 10 Bhahamanya huje, ya yʉʉla wa hakhalaga pi lyango ɨlyɨ lubhaga lwɨ nyumba ɨmfinjile ɨya Ngʉlʉbhɨ lya bhayiga iLyango ɨLinza, ahalaabhaga ɨvintu paala. Bhonti bhahaswiga haani lwa bhaalola zya zyabhombeha hwa mwene.

11 Mu habhaazyo hahaala, ʉmuntu ʉla ahabhalwɨlɨlaga ʉPeeteli nʉ Yoohani. Abhantu bhonti bhahaswigaga haani, bhahabhashɨmbɨɨlɨla afishe ɨpo pa bhayiga iDala iTiime Lya Solomooni. Idala ɨlyo lyahali mu lubhaga lwɨ nyumba ɨmfinjile ɨya Ngʉlʉbhɨ.* Enya ɨholanyo yɨ nyumba ɨmfinjile ɨya Ngʉlʉbhɨ hu malishilo wɨ shitaabu ɨshi. 12 ɄPeeteli lwa wabhalola abhantu ɨbho, ahabhabhʉzɨɨlɨzya ahaga, “Mubhalume amwɨ mu bha mu Izilaeeli, yeenu ɨzi zihubhaswijizya? Yeenu muhutizyamila? Ʉmuntu ʉnʉ aponile hu lwɨtɨho. Saga aponile hwi khone lyetu awe hu nongwa ya je, atɨ tili bhasangalusu pa maaso ga Ngʉlʉbhɨ! 13 ɄNgʉlʉbhɨ ʉwa bhamaama bheetu ʉAbulahaamu,† Bhaazya izwi Abulahaamu hu Ɨngalulanyo ɨzyɨ mazwi amajenu hu wandilo wɨ shitaabu ɨshi. ʉIsaaka nʉ Yaakobo ahamʼmwamiishe ʉmʼomvi waakwe ʉYeesu. Amwɨ mwahamʼɨɨshɨle ʉYeesu mu makhono aga bhalʉgʉ huje, bhanʼgoje. Wope ʉPilaato ahanzaga huje, abhigulile ʉYeesu, leelo amwɨ mwahakhaanile. 14 Mwahalaabha huje, ʉnʼgoji ya bhamwigulile! Mwahanʼkhaana ʉYeesu wa li Nʼsangalusu, nantele Nʼgolosu. 15 Wa Li Mbwiwi Yɨ Wʉʉmi, amwɨ mwahanʼgoga. Leelo, ʉNgʉlʉbhɨ ahanʼzyʉsya mu bhafwe, natɨ tili bhasimishizi bha zyʉshe hwakwe. 16 Ʉmuntu ʉnʉ wa muhunʼola na humʼmanye, aponile, pɨpo timwɨtɨɨshe ʉYeesu. ɄYeesu nʉ lwɨtɨho lwa tambɨlɨɨye afume hwa mwene, vya vimʼponiizye lwonti ʉmuntu ʉnʉ, nanshi mwenti sha muhunʼola.

17 Ɨshi amwɨ bhaholo bheetu, ɨzyo zyonti zya mwahamʼombɨɨye ʉYeesu, peeka na bhalongozi bheenyu, ɨmɨɨnye huje, mwahabhombile sinta amanye. 18 Leelo, ɨzyo zyahabhombɨɨshe huje, ʉNgʉlʉbhɨ amalɨɨzɨzye amazwi gaala ahayanjile ɨmandɨ ashɨlɨle hwa bhakuwi bhaakwe bhonti huje, ʉKilisiti ahailabha.

19 Ɨshi mulambaje, munʼgalushile ʉNgʉlʉbhɨ huje, abhakhobhoshele ɨmbiibhi zyenyu, nka hɨnze ahabhaazyo aha hoobhoshe afume hwa Yehoobha. 20 ɄNgʉlʉbhɨ ahanʼsaluuye ʉMeesiya afume halɨ hu nongwa yeenyu. ɄMeesiya ʉyo yʉ Yeesu. Wope ʉNgʉlʉbhɨ ahaihunʼsonteelezya nantele huliimwɨ. 21 ɄYeesu akhondɨɨye asyale hu mwanya afishile ahabhaazyo haala ʉNgʉlʉbhɨ ahaigalulanya ɨvintu vyonti abhe vipya, nanshi sha hayanjile afume halɨ ashɨlɨle hwa bhakuwi bhaakwe abhafinjile. 22 Yɨ nongwa ɨyo ʉMoose‡ Bhaazya izwi Moose hu Ɨngalulanyo ɨzyɨ mazwi amajenu hu wandilo wɨ shitaabu ɨshi. ʉnʼkuwi wa Ngʉlʉbhɨ ahakuwile aje, ‘Muliimwɨ mwɨmwɨ ʉYehoobha ʉNgʉlʉbhɨ weenyu ahaihubhasalulila ʉnʼkuwi wa kholɨɨne naanɨ. Amazwi gonti ʉnʼkuwi ʉyo ga haihubhabhʉʉzya, muhanʼtejelezyaje shinza. 23 Nkashele ʉmuntu wowonti ahaisinta hunʼtejeelezye ʉnʼkuwi ʉyo, ʉNgʉlʉbhɨ ahaihumwefwa mwa bhantu bhaakwe, na hunʼgoje.’  Bhaazya ɨNyiizuho (Kumbukumbu la Torati) 18:15, 18, 19. 24 Abhakuwi bha Ngʉlʉbhɨ bhonti, ahwande hwa nʼkuwi ʉSamweli na bhanjɨ bha bhahamʼɨnjɨlɨɨye, bhahayanjile zya zibhombeha mu nsiku ɨzi. 25 Amwɨ muli bhaana bha bhakuwi mu lufingo§ Bhaazya izwi Lufingo hu Ɨngalulanyo ɨzyɨ mazwi amajenu hu wandilo wɨ shitaabu ɨshi. lwa Ngʉlʉbhɨ lwa hafinjile na bhamaama bheenyu, nanshi sha hamʼʉzɨɨzye ʉAbulahaamu aje, ‘Ashɨlɨle hu mpaapo yaaho, ɨvikholo vyonti vya mu nsi vyahaisayiwa.’  Bhaazya ʉWandilo (Mwanzo) 22:18; 26:4. 26 ɄNgʉlʉbhɨ lwa wanʼzyʉsya ʉmʼomvi waakwe ʉYeesu,* ʉNgʉlʉbhɨ lwa wanʼzyʉsya ʉmʼomvi waakwe ʉYeesu Abhamanyiihanyi abhanjɨ abhi Bhangili bhayiga, ʉNgʉlʉbhɨ lwa wanʼsalula ʉmʼomvi waakwe ʉYeesu. ahanʼsonteleziizye huliimwɨ nasʉʉti huje, abhasaye hwi dala ɨlya humwefwe shila muntu mu mbiibhi zyakwe.”