1 Ɨshi, hwahali nʉ muntu ʉmo, itaawa lyakwe ahali yʉ Ananiya. Ʉmuntu ʉyo peeka nʉ nʼshɨ waakwe ʉSafila, bhope bhahakazya ʉnʼgʉnda gwabho. 2 Ɨmpɨɨya zya bhahazyajile lwa bhaakazya ʉnʼgʉnda guula, ʉAnaniya ahatapula zimo hu wiilu. Ʉnʼshɨ waakwe wope ahamɨɨnye. Zya zyahasyalile ahazitwala hwa bhasontwa bha Yeesu, ahabhagobela na je, “Ɨzi zyonti zya tikaziizye.”

3 Leelo, ʉPeeteli ahanʼdaamila ahaga, “Ananiya! Yeenu ɨshi, wanʼeha ʉSeetano* Bhaazya izwi Seetano hu Ɨngalulanyo ɨzyɨ mazwi amajenu hu wandilo wɨ shitaabu ɨshi. atʉʉha mu mwoyo gwaho? Ʉfishila ayanje ilenga hu Mʼpepo ʉMʼfinjile! Waafisa ɨmpɨɨya zimo ziila ʉzyɨje mu nʼgʉnda gwaho. 4 Shʉ sɨɨle akazye, gwahali nʼgʉnda gwaho! Hwope lwa waakazya, ɨmpɨɨya ɨzyo zya wahazyɨje, zyahali mu makhono gaaho abhombele shʉ hwanza weewe! Ɨshi! Zyahali bhʉlɨ bhʉlɨ ahwɨtɨshe ɨnongwa ɨzi mu mwoyo gwaho huje, ʉbhombe nanshi ɨga? Saga ʉyanjile ilenga hwa bhantu bheene, lyoli ʉyanjile ilenga na hwa Ngʉlʉbhɨ yʉʉyo!”

5 ɄAnaniya lwa wʉmvwa amazwi ga Peeteli ɨgo, ahagwa pansi, ahafwa pɨɨpo. Bhonti bha bhahalolile na bhonti bha bhahʉmvwɨzye ɨnongwa ɨzyo, bhahakhatwa nɨ lyoga igoosi. 6 Abhasahaala bhahashɨla pitagaalila, bhahagukwinshila ʉmʼvimba gwakwe ni kɨbha, bhahagufumya panzɨ, bhahagusyɨla.

7 Pamandɨ ɨsaala zitaatu ɨshi lwa zyashɨla, ʉnʼshɨ wa Ananiya wope ahatʉʉha mu nyumba ɨla, sinta amanye zya zibhombɨɨshe. 8 ɄPeeteli ahamʼʉzɨɨlɨzya huje, “Mbʉʉzye, ɨmpɨɨya zya mwahakaziizye ʉnʼgʉnda gwenyu, bhʉlɨ zya zyɨzi zyene?” Ahamwamula huje, “Lyoli, zya zyɨzyo zyene.” 9 ɄPeeteli ahamʼʉʉzya huje, “Yeenu ʉyɨtɨhɨɨne nʉ nʼume waaho hunʼjele ʉMʼpepo Wa Yehoobha? Enya! Bha bhanʼsyɨlaga ʉnʼume waaho, ɨbho bhali panzɨ pa lyango ɨpo. Nawe ʉnza fwe, bhanza husyɨle.”

10 Pɨnɨɨpo lwene, ʉSafila wope ahagwa pa manama ga Peeteli, ahafwa. Abhasahaala bhaala lwa bhatʉʉha, bhahaga ʉSafila wope afwiye. Bhahagufumya panzɨ ʉmʼvimba gwakwe, bhahagusyɨla panshɨnjɨ pa nʼume waakwe. 11 Ɨlyoga igoosi lyahabhakhata abhantu bhonti abhɨ shibhanza, peeka na bhanjɨ bhonti bha bhahʉmvwɨzye ɨzyo.

12 Hwi khone lya Ngʉlʉbhɨ, abhasontwa bha Yeesu bhahabhombaga ɨvimanyishizyo ɨvinji na mayele hu bhantu. Abhooziwa bhonti bhahabhʉngaanaga mwi Dala iTiime ɨLya Solomooni mu lubhaga lwɨ nyumba ɨmfinjile ɨya Ngʉlʉbhɨ hu lwʉmvwano. 13 Nʉʉmo wa halɨngaga alondolezanye nabho hwi lenga hu nongwa ya je, bhahamwogopaga haani ʉNgʉlʉbhɨ. Pope, abhantu bha saga bhahamwɨtɨɨshe ʉYeesu bhahabhamwamihaga haani abhooziwa. 14 Bhope abhooziwa bhahonjelelaga haani, abhalume na bhashɨ.

15 Afumilane nɨɨzyo, abhantu bhahabhabhɨɨhaga abhabhinu bhaabho mwi dala mu vyɨlɨlɨ na mu mateefu huje, ʉPeeteli lwa shɨla, libhafishilaje bhamo nkamba lizyʉngʉʉli lyakwe huje, bhaponaje. 16 Abhantu abhinji bhahafumaga mu mabooma ga gahapalamɨɨne na hu Yelusaleemu. Bhahabhaleetaga abhabhinu na bhaala bha bhahakhɨɨtwe nɨ mpepo ɨhandamanu. Bhonti bhahaponaga.

17 Ɨshi, ʉnʼsayi ʉnʼgoosi wa Ngʉlʉbhɨ peeka na bhamwabho bhonti abhɨ shipʉga sha Bhasadukaayo, ɨjɨɨla yahabhakhata haani hu nongwa ya bhasontwa bha Yeesu. 18 Bhahabhakhata, bhahabhakʉnga mu hoobhe. 19 Leelo nʉsiku, ahɨnza ʉntumi wa Yehoobha, ahiigula amalyango aga mu hoobhe, ahabhafumya panzɨ. Ahabhabhʉʉzya ahaga, 20 “Bhalaji, mwɨmɨɨlɨle mu lubhaga lwɨ nyumba ɨmfinjile ɨya Ngʉlʉbhɨ, mubhalʉmbɨɨlɨle abhantu amazwi gonti gɨ wʉʉmi ʉwu.” 21 Abhasontwa bhaala bhahabhala nashampwi mu lubhaga lwɨ nyumba ɨmfinjile ɨya Ngʉlʉbhɨ, nanshi ʉntumi sha habhabhʉzɨɨzye. Bhahanda abhamanyizye abhantu ʉmwo.† Gahali miiho ga Bhayahuudi abhale mu lubhaga lwɨ nyumba ɨmfinjile ɨya Ngʉlʉbhɨ nashampwi afumye ɨnsangu. Hu nongwa ɨyo abhasontwa bhaala lwa bhaafiha muula, bhahabhaaga abhantu abhinji.

Ahabhaazyo hahaala, ʉnʼsayi ʉnʼgoosi wa Ngʉlʉbhɨ peeka na bhamwabho bhahabhabhʉngaanya abhi koloti na bhagoosi bhonti bha Bhaizilaeeli. Bhahabhasonteelezya abhakolokolooni hu hoobhe huje, bhabhaleete abhasontwa bhaala. 22 Leelo, lwa bhatʉʉha ʉmwo, bhahaga abhasontwa bhaala nabhamo muula. Bhahaweela hwa bhagoosi, bhahabhabhʉʉzya bhahaga, 23 “Lwa taafiha mu hoobhe muula, teejile amalyango magalile lwene, abhakolokolooni bhɨmɨlɨɨye panshɨnjɨ bhalɨndɨɨlɨla. Leelo, lwa tiigula amalyango, saga timwajile ʉmuntu nkʉʉmo muula!” 24 Ʉnʼgoosi wa bhakolokolooni peeka na bhalongozi bha bhasayi bhaala lwa bhʉmvwa ɨzyo, bhahakhasamala haani, bhahabhʉzɨlɨzanya bhahaga, “Ɨnongwa ɨzi zyahaibha bhʉlɨ bhʉlɨ?”

25 Ɨpo ahɨnza ʉmuntu ʉmo, ahabhabhʉʉzya huje, “Tejeelezyi! Abhantu bhaala bha mwahabhakʉnjɨle mu hoobhe, bhɨmɨlɨɨye mu lubhaga lwɨ nyumba ɨmfinjile ɨya Ngʉlʉbhɨ, bhamanyizya abhantu!” 26 Ʉnʼgoosi wa bhakolokolooni peeka na bhakolokolooni bhaakwe bhahabhala, bhahabhaleeta abhasontwa bhaala. Leelo, bhahɨnzɨle woolo nabho, saga bhahabhabuhanyaaga, pɨpo bhahogopaga huje, abhantu bhagabhakhoma na mawe.

27 Lwa bhabhafisya, bhahabhɨmɨɨlɨsya pitagaalila pi koloti, wope ʉnʼsayi ʉnʼgoosi ʉla ahanda hubhabhʉʉzye huje, 28 “Amwɨ tahabhakhaanile hwi khone huje, mugandi hubhamanyizye abhantu ɨnongwa zya Yeesu! Leelo, mujendeelela anyampaanye ɨmanyizyo zyenyu mwi booma ɨli lyonti ɨlya pa Yelusaleemu. Muhwanza alolesye huje, natɨ tili na malando aga hunʼgoje!”

29 ɄPeeteli na bhasontwa abhamwabho bhahamwamula bhahaga, “Tihwanziwa hunʼtinishe ʉNgʉlʉbhɨ, ashɨle hubhatinishe abhantu! 30 Hwope mwahanʼgojile ʉYeesu hwi dala ɨlya hunʼkhomeele pa shikhobheehanyo, leelo ʉNgʉlʉbhɨ ʉwa bhamaama bheetu ahanʼzyʉsyɨzye. 31 Ahamʼmwamisiizye na humʼɨɨshe hu nʼkhono gwakwe ʉlɨɨlo,‡ humʼɨɨshe hu nʼkhono gwakwe ʉlɨɨlo Hwa Bhayahuudi akhale hu nʼkhono ʉlɨɨlo, hwa huje ɨbhonesya ɨnshɨnshɨ ni khone lyɨ longozi. abhe Nʼgoosi, nantele Mʼfyʉli aje, ʉNgʉlʉbhɨ atipeele tiBhaizilaeeli idala ɨlya laate ɨmbiibhi zyetu na khobhoshelwe. 32 Atɨ peeka nʉ Mʼpepo ʉMʼfinjile tili bhasimishizi bhɨɨzyo zyonti. Ʉmwene ʉNgʉlʉbhɨ ahabhapiiye ʉMʼpepo ʉMʼfinjile ʉyo, hu bhonti bha bhahunʼtiniha.”

33 Abhalongozi bhaala lwa bhʉmvwa ɨzyo, bhahaviitwa haani, bhahanzaga huje, bhabhagoje. 34 Leelo, pi koloti paala pahali nʉ Mʼfalisaayo ʉmo itaawa lyakwe ahali yʉ Gamaliyeeli. Ʉyo ahali mʼmanyizyi ʉwɨ ndajizyo zya Moose. Abhantu bhonti bhahamwʉmvwaga. Ɨpo, ahɨmɨɨlɨla mwi koloti liila, ahalajizya abhakolokolooni huje, bhabhafumye panzɨ abhasontwa hu habhaazyo hashe. 35 Ahabhabhʉʉzya abhamwabho bhaala aje, “Mubhalume amwɨ mu bha pa Izilaeeli! Ɨli lya muhwanza abhombe hwa bhantu ɨbha, mubhe woolo nalyo. 36 Mwizuhaje ɨnsiku ɨzya hwisinda ahali ʉmuntu ʉmo wa hanzaga apɨndule ɨnsi, itaawa lyakwe ahali yʉ Tewuuda. Ahahwibaadaga huje, muntu nʼgoosi. Abhantu bha bhapalamiiye afishe ɨmya zinɨ bhahɨɨma peeka nawo. Leelo, hu malishilo ahagogwa, na bhaala bhonti bha bhahanʼondolezyaga, bhahanyampaana. Ɨmbombo yaakwe yonti yahamalishiiye pɨnɨɨpo. 37 Nantele pamandɨ, ahabhaazyo haala ɨsilikaali yahabhazyaga ʉwinji wa bhantu, ahafumiiye ʉNʼgalilaaya ʉmo, itaawa lyakwe ahali yʉ Yuuda. Wope ahabhabhʉngaanya abhantu, ahabha nɨ shipʉga shaakwe, pɨpo ahanzaga apɨndule ɨnsi. Leelo, wope ahagogwa. Bhonti bha bhahanʼondolezyaga, bhope bhahanyampaana. 38 Ɨshi ɨhubhabhʉʉzya huje, mubhe maaso na bhantu ɨbha! Mubhaleshe lwene! Nkashele ɨnsɨɨbho zyabho na zyonti zya bhabhomba, zifumile hwa bhantu, zyahaitila pashaaha. 39 Leelo, nkashele zifumile hwa Ngʉlʉbhɨ, saga mubhajiiye adinde, lyoli mubhala bhe mulwa nʉ Ngʉlʉbhɨ yʉʉyo.”

40 Bhahazyɨtɨha ɨnsundo ziila zya Gamaliyeeli. Bhahabhakwizya abhasontwa bhaala, bhahalajizya huje, bhashetwe haani. Bhahabhakhajila huje, bhagandi ayanje hwi taawa lya Yeesu, bhahabhaleha huje, bhabhalaje.

41 Abhasontwa bhaala bhahafuma mwi koloti sha bhashiiye, pɨpo ʉNgʉlʉbhɨ ahalolile huje, bhakhondɨɨye asyoshelwe hu nongwa ya Yeesu. 42 Saga bhahaleshile amanyizye abhantu na hubhalʉmbɨɨlɨle ɨNongwa ɨNyinza huje, ʉYeesu yʉ Kilisiti. Bhahajendelelaga amanyizye na lʉmbɨɨlɨle ɨnsiku zyonti mu lubhaga lwɨ nyumba ɨmfinjile ɨya Ngʉlʉbhɨ na mu nyumba zya bhantu.