7
ɄSiteefano ahubhataaka aBhaizilaeeli abhamwabho mwi koloti
Ʉnʼsayi ʉnʼgoosi ʉwa Ngʉlʉbhɨ ahamʼʉzɨɨlɨzya ʉSiteefano huje, “Bhʉlɨ, ɨzi zyonti zya bhayanga, sha zili?” ɄSiteefano ahamwamula ahaga, “Amwɨ bhaholo bhaanɨ na mubhayise bhaanɨ, ntejeelezyi! ɄNgʉlʉbhɨ ʉmwamu ahanʼoleshɨɨye ʉmaama weetu ʉAbulahaamu mu nsi ɨya hu Mesopotaamiya, sha sɨɨle asaamile mwi booma ɨlya hu Halaani. ɄNgʉlʉbhɨ ahamʼʉʉzya huje, ‘Ʉyeepe mu nsi yaaho ɨnɨ, ʉbhaleshe mwʉmwo abhaholo bhaaho, ʉbhale hu nsi ya nahaihulanga.’  Bhaazya ʉWandilo (Mwanzo) 12:1. Ɨpo ʉAbulahaamu ahasaama mu nsi yaakwe ɨya Bhakalidaayo, ahabhala akhale mwi booma ɨlya hu Halaani. Ʉyise waakwe lwa waafwa ʉhwo, ʉNgʉlʉbhɨ ahanʼsaamya, ahanʼeeta mu nsi ɨnɨ ya mukhala amwɨ mu habhaazyo ɨha.
Hwope, ʉNgʉlʉbhɨ saga ahamʼpiiye ʉAbulahaamu ʉnʼgʉnda gwa gufishile nka lwayo lweka mu nsi ɨnɨ huje, gubhe gwakwe. Leelo, ahalapile huje, ahaihumʼpeela ɨnsi ɨnɨ ɨbhe yaakwe, peeka nɨ mpaapo yaakwe. Ahabhaazyo ɨho ʉAbulahaamu saga ahali nʉ mwana nkʉʉmo. ɄNgʉlʉbhɨ ahamʼʉʉzya ʉAbulahaamu huje, ‘Abhantu abhɨ mpaapo yaaho bhahaibha bhajenu mu nsi ɨya bhantu abhanjɨ. Ʉhwo abhantu abhɨ nsi ɨyo bhahaihubhabhɨɨha bhakalwe bhaabho, bhahaihubhalavya haani hu maaha ɨmya zinɨ. Leelo, bhaala bha bhahaihubhabhɨɨha abhe bhakalwe, anɨ nahaihubhafunda. Lwa gaashɨla ɨgo, abhantu ɨbho abhɨ mpaapo yaaho bhahaisogola mu nsi ɨla, bhahaihumpuuta anɨ ɨpa.’  Bhaazya ʉWandilo (Mwanzo) 15:13-14; aFume (Kutoka) 3:12. Asimishizye ɨzyo, ʉNgʉlʉbhɨ ahabhɨɨha ʉlufingo nʉ Abulahaamu, lya lyahabhombɨɨshe hwi dala ɨlya tende ɨngoola ɨya hwitagaalila ɨyɨ lume* atende ɨngoola ɨya hwitagaalila ɨyɨ lume Hwa Bhayahuudi nkashele ʉmwana ʉwɨ shilume apaapwa, isiku ɨlya naana (8) lwa waafuma apaapwe, bhahanʼtendaga ɨngoola ɨya hwitagaalila ɨyɨ lume abhonesye ʉlufingo hwa Ngʉlʉbhɨ. Bhaazya ʉWandilo (Mwanzo) 17:9-14. abhaana bhonti abhɨ shilume. ɄAbulahaamu ahamʼpaapa ʉIsaaka, ahanʼtenda ɨngoola yaakwe ɨyɨ lume lwa waafisya ɨnsiku naana (8) afume apaapwe hwakwe. ɄIsaaka wope ahamʼpaapa ʉYaakobo, ahanʼtenda ɨngoola yaakwe ɨyɨ lume. ɄYaakobo wope ahabhapaapa abhasahaala ishʉmi na bhabhɨɨlɨ, ahabhatenda ɨngoola zyabho ɨzyɨ lume. Ɨbho bha bhahabha bhamaama bheetu.
Abhamaama bheetu ɨbho bhahakhatwa nɨ jɨɨla haani hu nongwa ya nʼdoodo waabho ʉYoosefu. Ɨpo bhahanʼkazya abhe nʼkalwe mu nsi ɨya hu Miisili. Leelo, ʉNgʉlʉbhɨ ahali peeka nawo, 10 ahamʼfyʉlɨle mu malabha gaakwe gonti. ɄNgʉlʉbhɨ ahamʼpeela ʉYoosefu ʉtengamazu, ahamʼɨɨha ʉFaalawo ʉmwɨnɨ ʉwa hu Miisili anʼgane. Ɨpo ʉFaalawo ahamʼɨɨha abhe nʼgoosi mu nsi yaakwe ɨya hu Miisili na mu nyumba yaakwe ɨyɨ shimwɨnɨ. Bhaazya ʉWandilo (Mwanzo) 41:39-41.
11 Pamandɨ ɨnzala yahagwa mu nsi yonti ɨya hu Miisili nɨ ya hu Kaanani, abhantu bhahalabha haani. Abhamaama bheetu bhope ɨshalye shahabhamalishila. 12 ɄYaakobo lwa wʉmvwa huje, mu nsi ɨya hu Miisili muli nɨ shalye, ahabhasonteelezya abhaana bhaakwe, abhamaama bheetu ɨbho, ʉlwa hwande bhabhale ʉhwo. 13 Ɨnshʉʉla yaabho ɨya bhɨɨlɨ, ʉYoosefu ahahwimanyisya hwa bheene, bhope bhahamanyiha hwa Faalawo, ʉmwɨnɨ ʉwa hu Miisili. 14 ɄYoosefu ahasonteelezya ɨntumi hwa yise waakwe ʉYaakobo huje, ayɨnze hu Miisili peeka nɨ khaaya yaakwe yonti. Bhahali bhantu mashʉmi pʉnga na bhasaanu (75). 15 ɄYaakobo ahabhala hu Miisili, ahafwɨla hwʉhwo peeka na bhamaama bheetu. 16 Amavimba gaabho gahatwalwa hwi booma ɨlya hu Shekeemu, gahasyɨlwa mu nkʉngwa ɨla ʉAbulahaamu ahakalile afume hwa bhaana bha Hamooli.
17 Ahabhaazyo aha bhombe ʉNgʉlʉbhɨ zya hanʼapiiye ʉAbulahaamu lwa hapalamila, abhamaama bheetu bhahonjeelela na bhe bhinji haani mu nsi ɨya hu Miisili. 18 Pamandɨ ʉmwɨnɨ ʉwɨnjɨ wa saga ahamɨɨnye lyolyonti hu nongwa zya Yoosefu, ahanda alongozye. 19 Ʉmwɨnɨ ʉyo ahabhalavya abhamaama bheetu. Ahabhabhonela, ahabhalajizya abhantu abhɨ shikholo sheetu huje, bhataagaje abhaana bhaabho abheela huje, bhafwanje. Bhaazya aFume (Kutoka) 1:13, 16, 22.
20 Mu habhaazyo ɨho ʉMoose wope ahapaapwa, ahali mwana ʉmwinza tee. Abhapaafi bhaakwe bhahanʼsʉnga mu nyumba ameezi gataatu. 21 Leelo, lwa bhaamenwa humʼfise ʉmwana, bhahamʼɨɨha muuhati mwi seje lya lizyemwilwe shinza, bhahaliponya mwi sooho hunʼsʉnje ʉmwana. Ʉmwalɨ wa mwɨnɨ ʉFaalawo ahanʼsebha, ahanda hunʼsʉnje nanshi ʉmʼvwɨlɨ waakwe. Bhaazya aFume (Kutoka) 2:3, 5-6, 10. 22 Bhahamʼmanyizya ʉMoose ɨmanyizyo zyonti ɨzya Bhamiisili, ahabha nʼdandamazu ayanje, na hu mbombo zya habhombaga.
23 ɄMoose lwa waafisya amaaha amashʉmi ganɨ, ahaamula abhale hubhaseepe abhaholo bhaakwe aBhaizilaeeli. 24 Ahabhala, ahamwaga ʉMʼmiisili ʉmo ahunʼkhoma ʉMwizilaeeli sinta atule nazimo. Ahamwavwa ʉholo waakwe ʉla, ahamwezezya, ahanʼgoga ʉMʼmiisili ʉla. 25 ɄMoose ahasɨɨbha huje, abhaholo bhaakwe bhɨnzaga manye huje, ʉNgʉlʉbhɨ ahaihubhafyʉla ashɨlɨle hwa mwene, leelo abhaholo bhaakwe saga bhahazyaganyaaga ɨzyo.
26 Shandaabhɨ yaakwe, ʉMoose ahafumila hwa Bhaizilaeeli bhabhɨɨlɨ bha bhahalwanga. Ahanzaga aje, abhataazanye huje, abhatengaanye. Ɨpo ahabhabhʉʉzya huje, ‘Mubhalume amwɨ muli bhaholo! Yeenu muhwanza avwalazanye?’ 27 Leelo, ʉla ʉyo ahanʼkhomaga ʉwamwabho ahamʼbuuha ʉMoose ahaga, ‘Yʉ naanu wa bhɨɨshɨle huje, ʉbhe nʼgoosi nʉ witongwa weetu? 28 Bhʉlɨ, ʉhwanza hungoje anɨ, nanshi sha wahanʼgojile igaamo ʉMʼmiisili ʉla?’  Bhaazya aFume (Kutoka) 2:14. 29 ɄMoose lwa wʉmvwa amazwi ɨgo, ahashɨmbɨla, ahabhala hu nsi ɨya hu Midiyaani. Ahakhala hwʉhwo shenya nʼjenu, ahapaapa abhaana bhabhɨɨlɨ.
30 Amaaha amashʉmi ganɨ lwa gaafiha, ʉMoose ahali pi gona apa pɨɨpɨ ni gamba ɨlya hu Sinaayi. Ɨpo ʉntumi wa Yehoobha ahanʼoleshela mu hatatango ha hahahaga ʉmwoto. 31 Lwa waalola, ahaswiga, ahahapalamila ahatatango haala huje, aheenye shinza. Lubhilo ahʉmvwa izwi lya Yehoobha. Lyahamʼʉʉzya lyahaga, 32 ‘Anɨ ɨndi Ngʉlʉbhɨ ʉwa bhamaama bhaaho, ʉNgʉlʉbhɨ ʉwa Abulahaamu, ʉwa Isaaka nʉ wa Yaakobo.’  Bhaazya aFume (Kutoka) 3:6. ɄMoose lwa wʉmvwa ɨzyo, ahanda ayinje, ahoogopa hugwenye ʉmwoto guula.
33 Ɨpo ʉYehoobha ahamʼʉʉzya huje, ‘Awula ɨndaatʉ zyaho, pɨpo ɨpo pʉ yɨmɨlɨɨye pafinjile. 34 Lyoli anɨ ɨndolile abhantu bhaanɨ sha bhalabha hu Miisili, alile hwabho hwope ɨnʉmvwɨzye, nanɨ ɨnɨnzɨle hubhafyʉle mu kalwe. Ɨshi ɨhusonteelezya awe, ʉbhale hu Miisili.’  Bhaazya aFume (Kutoka) 3:5, 7, 8, 10.
35 ɄMoose ʉyo ya yʉʉla abhamaama bheetu bhahanʼkhaanile, lwa bhahamʼʉzyaga huje, ‘Yʉ naanu wa bhɨɨshɨle huje, ʉbhe nʼgoosi nʉ witongwa weetu?’ ɄMoose ʉyo, ya yʉʉla ʉNgʉlʉbhɨ ahanʼsonteleziizye huje, abhe nʼgoosi waabho, nantele mʼfyʉli waabho afume mu kalwe, afumilane nʉ ntumi sha hanʼoleshɨɨye mu hatatango haala. 36 Ʉyo ya yʉʉla ahabhalongoziizye hwi dala ɨlya bhombe amayele nɨ vimanyishizyo hu Miisili, mu Nsʉmbi ɨNshamamu na mu lʉʉgwa, mu habhaazyo ahɨ maaha amashʉmi ganɨ.
37 ɄMoose ʉyo yʉʉyo ahabhabhʉzɨɨzye aBhaizilaeeli huje, ‘Afume mwaliimwɨ mwʉmwo, ʉNgʉlʉbhɨ ahaihubhasalulila amwɨ ʉnʼkuwi wa lɨngɨɨne naanɨ.’  Bhaazya ɨNyiizuho (Kumbukumbu la Torati) 18:15. 38 ɄMoose ahabhanga peeka na bhamaama bheetu mu lʉʉgwa. Yʉʉyo ahayanjile nʉ ntumi mwi gamba lyɨ Sinaayi, ahejeelela amazwi gɨ wʉʉmi huje, atipeele atɨ.
39 Hwope abhamaama bheetu bhahakhaanile hunʼtinishe. Bhahamʼbunshilila ʉhutali, bhahasʉngwɨlwe mu mooyo gaabho huje, bhagaweela hu Miisili. 40 ɄMoose lwa wakhaabha hwi gamba, bhahamʼʉʉzya ʉAaloni ʉnʼkʉlʉ waakwe bhahaga, ‘Ʉtigombele ɨshifwani sha bhangʉlʉbhɨ, sha shitilongozyaje mwi dala. ɄMoose wa hatilongozyaga afume hu Miisili, saga timɨɨnye zya zimwajile ʉhwo!’  Bhaazya aFume (Kutoka) 32:1. 41 Pa nsiku ɨzyo aBhaizilaeeli bhaala bhahagomba ɨshifwani sha shilɨngaana nɨ ngwata. Hwope nkashele shahali shintu sha gombe nɨ nyoobhe zyabho bhɨɨbho, bhahashifumizya ɨnsangu, Bhaazya izwi Nsangu hu Ɨngalulanyo ɨzyɨ mazwi amajenu hu wandilo wɨ shitaabu ɨshi. na hushibhɨɨshɨle ɨchaaka. 42 Ɨzyo zyahabhaazya huje, ʉNgʉlʉbhɨ abhaleshe bhapuutaje isanya, ʉmwezi nɨ ntondwe, nanshi sha zyahasimbwilwe mu shitaabu sha bhakuwi bha Ngʉlʉbhɨ abhɨ mandɨ huje,
‘MuBhaizilaeeli amwɨ, mu habhaazyo haala mwahadɨɨlaga amaaha amashʉmi ganɨ mwi gona,
bhʉlɨ, mwahambolelaga anɨ ɨvyʉma ɨvisuga huje, mumfumizye ɨnsangu ɨzya lʉngʉlɨzye?
Ndaali! Mwahabhafumiziizye abhangʉlʉbhɨ bheenyu!
43 Enya, mwahanyʉmʉlaga ɨsheegu sha shahali nɨ shifwani sha Mooleki ʉngʉlʉbhɨ,
mwahanyʉmʉlaga ɨshifwani shɨ nzota ya ngʉlʉbhɨ weenyu ʉLeefani.
Ɨvifwani ɨvyo mwahavigombile huje, muvipuutaje.
Hu nongwa ɨyo nahaihubhabhɨɨha aje, mubhe bhakʉngwe,
bhahaihubhatwala abhale hu nsi ɨya hutali ashɨle hu Baabeli.’ ”  Bhaazya Aamosi 5:25-27.
44 Nantele, ʉSiteefano ahaga, “Mwi gona muula, abhamaama bheetu bhahajendelɨɨye abhe ni sebhele ifinjile. isebhele ifinjile ABhayahuudi sha bhasɨɨle azenje ɨnyumba ɨmfinjile ɨya Ngʉlʉbhɨ, bhahagombile isebhele lya puutile. Ʉmwo mwa muula ʉNgʉlʉbhɨ ahakhalaga peeka na bhantu bhaakwe lwa bhahashʉʉlaga. Ɨpa ɨShiyunaani shiyiga, isebhele ɨlya humʼfumizizye ʉNgʉlʉbhɨ ʉsimishizi. Isebhele ɨlyo bhahagombile nanshi ʉNgʉlʉbhɨ sha halanganyiziizye ʉMoose huligombe. 45 Pamandɨ abhamaama bheetu peeka nʉ Yoshuwa, ʉnʼongozi waabho, bhahaposhelezanya, bhahalitwala mu nsi ya bhahafyʉlɨle hwa bhantu abhɨ nsi ɨzyɨnjɨ. Nantele, mu habhaazyo haala, ʉNgʉlʉbhɨ ahabhadajiiye abhamaama bheetu abhantu ɨbho. Lyahasyala muula mu nsi yaabho afishe ahabhaazyo aha Daudi ʉmwɨnɨ.
46 ɄDaudi ahanʼkhondezɨɨzye ʉNgʉlʉbhɨ, ahanʼaabha huje, ‘We Ngʉlʉbhɨ wa Yaakobo! Ʉndeshe ɨzenjele ɨnyumba.’  Bhaazya 2 Samweli 7:2. 47 Leelo, ʉmʼvwɨlɨ waakwe ʉSolomooni yʉʉyo ahanʼzenjiiye ʉNgʉlʉbhɨ ɨnyumba. 48 Hwope ʉNgʉlʉbhɨ Wa Li Nʼgoosi Hu Vintu Vyonti, saga akhala mu nyumba zya bhazenjile abhantu. Nanshi ʉnʼkuwi wa Ngʉlʉbhɨ sha hayanjile huje,
49 ‘ɄYehoobha ayiga,
“Ɨmwanya litengo lyanɨ lyɨ wumwɨnɨ,
pa nsi pa pa bhɨɨshe amanama gaanɨ.
Ɨshi, nyumba nshi ya muganzenjela?
Bhʉlɨ, pooshi pɨ ngatʉʉya?
50 Bhʉlɨ, ɨvyo vyonti saga nɨɨnɨ nahavipelile?” ’ ”  Bhaazya Yesaaya 66:1-2.
51 ɄSiteefano ahajendeelela ayanje huje, “Amwɨ mwa mukhaana ahwɨtɨshe! Amooyo na makutu geenyu gali nanshi ga bhantu bha saga bhahumwɨtɨha ʉYehoobha. Wiila lwene amwɨ muhunʼkhaana ʉMʼpepo ʉMʼfinjile, nanshi shiila abhamaama bheenyu bhope sha bhahabhombaga! 52 Bhʉlɨ, huli nʉ nʼkuwi wa Ngʉlʉbhɨ wa saga bhahanʼaviizye? Enya, bhahabhagogaga poshe na bhakuwi bha bhahafumyaga ʉkuwi hu nongwa zya hwɨnze hwa Kilisiti ʉNʼgolosu! Ʉyo ya yʉʉyo amwɨ mwahanʼsalile hwa bhalʉgʉ, mwahanʼgoga. 53 Hwope amwɨ sha mwahejelɨɨye ɨndajizyo zya Ngʉlʉbhɨ ashɨlɨle hwa ntumi waakwe, leelo mwahakhaanaga huzitinishe.”
Bhahunʼgoga ʉSiteefano
54 Abhagoosi bhaala bha Bhayahuudi lwa bhʉmvwa amazwi ga Siteefano, bhahaviitwa haani, bhahanʼzyeguzizya amiino hwi lyoyo. 55 Leelo ʉMʼpepo ʉMʼfinjile ahanʼongolaga ʉSiteefano. Aheenya hu mwanya, ahawulola ʉmwamu wa Ngʉlʉbhɨ, nʉ Yeesu ayɨmɨlɨɨye hunshɨnjɨ hu nʼkhono ʉlɨɨlo ʉgwa Ngʉlʉbhɨ. 56 Ahaga, “Enyi! Ɨlola ɨmwanya nyiigule, nantele ʉMwana Wa Muntu§ Bhaazya izwi Mwana Wa Muntu hu Ɨngalulanyo ɨzyɨ mazwi amajenu hu wandilo wɨ shitaabu ɨshi. ayɨmɨlɨɨye hunshɨnjɨ hu nʼkhono ʉlɨɨlo ʉgwa Ngʉlʉbhɨ!” * ɄSiteefano lwa hayanga huje, ʉMwana Wa Muntu ayɨmɨlɨɨye hunshɨnjɨ hu nʼkhono ʉlɨɨlo ʉgwa Ngʉlʉbhɨ, ahasimishizya aje, ʉYeesu yʉ Ngʉlʉbhɨ. Abheene aBhayahuudi bhahasintile humwɨtɨshe ʉYeesu aje, Ngʉlʉbhɨ. Hu nongwa ɨyo, bhahamanya huje, ahunʼiga ʉNgʉlʉbhɨ. Ɨpo bhahonjela aviitwe tee. Alɨngaane nɨ ndajizyo zya Moose ʉmuntu wa hunʼiga ʉNgʉlʉbhɨ ahanziwaaga akhomwe na mawe afishe afwe. Bhaazya ɨMbombo Zya Bhalaawi (Mambo ya Walawi) 24:16.
57 Ɨpo abhagoosi bha Bhayahuudi bhahasinta hunʼtejeelezye, bhahadinda amakutu gaabho, ʉhwu bhabwagaana. Peeka bhahanʼtomoshela ʉSiteefano, 58 bhahamʼfumya panzɨ pi booma huje, bhanʼkhome na mawe. Sha bhasɨɨle ahwande hunʼkhome na mawe, abhasimishizi bhaala bhaheefwa amagolole gaabho, bhahagabhɨɨha pa manama ga nʼsahaala ʉmo wa bhahagaga yʉ Sauli.
59 Lwa bhahanʼkhomaga ʉSiteefano na mawe, ahapuutaga huje, “Mwɨnɨ Yeesu, ejeelela ʉwʉʉmi waanɨ!” 60 Ɨpo ahasugamila pansi, ahakhoola haani huje, “Mwɨnɨ, ʉsahabhalonje hu mbiibhi ɨzi zya bhabhombile.” Lwa wayanga ɨsho, ahafwa.

7:3 Bhaazya ʉWandilo (Mwanzo) 12:1.

7:7 Bhaazya ʉWandilo (Mwanzo) 15:13-14; aFume (Kutoka) 3:12.

*7:8 atende ɨngoola ɨya hwitagaalila ɨyɨ lume Hwa Bhayahuudi nkashele ʉmwana ʉwɨ shilume apaapwa, isiku ɨlya naana (8) lwa waafuma apaapwe, bhahanʼtendaga ɨngoola ɨya hwitagaalila ɨyɨ lume abhonesye ʉlufingo hwa Ngʉlʉbhɨ. Bhaazya ʉWandilo (Mwanzo) 17:9-14.

7:10 Bhaazya ʉWandilo (Mwanzo) 41:39-41.

7:19 Bhaazya aFume (Kutoka) 1:13, 16, 22.

7:21 Bhaazya aFume (Kutoka) 2:3, 5-6, 10.

7:28 Bhaazya aFume (Kutoka) 2:14.

7:32 Bhaazya aFume (Kutoka) 3:6.

7:34 Bhaazya aFume (Kutoka) 3:5, 7, 8, 10.

7:37 Bhaazya ɨNyiizuho (Kumbukumbu la Torati) 18:15.

7:40 Bhaazya aFume (Kutoka) 32:1.

7:41 Bhaazya izwi Nsangu hu Ɨngalulanyo ɨzyɨ mazwi amajenu hu wandilo wɨ shitaabu ɨshi.

7:43 Bhaazya Aamosi 5:25-27.

7:44 isebhele ifinjile ABhayahuudi sha bhasɨɨle azenje ɨnyumba ɨmfinjile ɨya Ngʉlʉbhɨ, bhahagombile isebhele lya puutile. Ʉmwo mwa muula ʉNgʉlʉbhɨ ahakhalaga peeka na bhantu bhaakwe lwa bhahashʉʉlaga. Ɨpa ɨShiyunaani shiyiga, isebhele ɨlya humʼfumizizye ʉNgʉlʉbhɨ ʉsimishizi.

7:46 Bhaazya 2 Samweli 7:2.

7:50 Bhaazya Yesaaya 66:1-2.

§7:56 Bhaazya izwi Mwana Wa Muntu hu Ɨngalulanyo ɨzyɨ mazwi amajenu hu wandilo wɨ shitaabu ɨshi.

*7:56 ɄSiteefano lwa hayanga huje, ʉMwana Wa Muntu ayɨmɨlɨɨye hunshɨnjɨ hu nʼkhono ʉlɨɨlo ʉgwa Ngʉlʉbhɨ, ahasimishizya aje, ʉYeesu yʉ Ngʉlʉbhɨ. Abheene aBhayahuudi bhahasintile humwɨtɨshe ʉYeesu aje, Ngʉlʉbhɨ. Hu nongwa ɨyo, bhahamanya huje, ahunʼiga ʉNgʉlʉbhɨ. Ɨpo bhahonjela aviitwe tee. Alɨngaane nɨ ndajizyo zya Moose ʉmuntu wa hunʼiga ʉNgʉlʉbhɨ ahanziwaaga akhomwe na mawe afishe afwe. Bhaazya ɨMbombo Zya Bhalaawi (Mambo ya Walawi) 24:16.