1-2 Wope ʉSauli ahahwiyʉmvwaga shinza lwene hu nongwa ya fwe hwa Siteefano. Abhantu bha bhahanʼtinihaga ʉNgʉlʉbhɨ, bhahanʼsyɨla ʉSiteefano. Bhahazonda haani pi fuuto lyakwe.

Isiku liliila lya bhahanʼgojile ʉSiteefano, abhantu bhɨ shibhanza ɨsha pa Yelusaleemu bhahanda alabhe haani, bhonti bha bhahamwɨtɨɨshe ʉYeesu bhahanyampɨɨne abhale hu mukowa ʉgwa hu Yudeeya, nʉ gwa hu Samaliya. Abheene abhasontwa bha Yeesu bhahasyalile pa Yelusaleemu. 3 ɄSauli wope ahanda hushinangaanye ɨshibhanza. Ahatʉʉhaga shila nyumba, ahabhadendemulaga abhalume na bhashɨ, nantele ahabhakʉngaga mu hoobhe.

4 Abhantu ɨbho bha bhahanyampɨɨne, bhahanda alʉmbɨɨlɨle ɨNongwa ɨNyinza ɨzya Yeesu hwa bhantu poponti pa bhahabhalaga. 5 ɄFilipo* ɄFilipo ahali ʉmo mwa bhaavwi bhaala pʉnga (7). Bhaazya ɨMbombo Zya Bhasontwa 6:5. ahiishila mwi booma limo lya lyahali hu mukowa ʉgwa hu Samaliya, ahabhalʉmbɨɨlɨla ɨnongwa ɨzya Kilisiti. 6 Abhantu lwa bhʉmvwa amazwi ga Filipo, na lole amayele gaala ahabhombaga, ɨpo bhahanʼtejelezyaga tee. 7 Ahefwaga ɨmpepo ɨhandamanu ɨnyinji hwa bhantu abhinji, zyahabheepaga sha zidwegaana. Ahabhaponiaga abhinji bha bhahafwiye hundwɨmo, na bha bhahalemɨɨye amanama. 8 Ɨpo, mwi booma ʉmwo mwahabha nʉ luseshelo tee.

9 Ɨshi mwi booma ɨlyo mwahali nʉ muntu ʉmo wa halʉbhɨɨye abhombe amayele ga gaswijizya agɨ lozi. Itaawa lyakwe ahali yʉ Siimoni. Ahabhaswijizyaga abhantu bhonti abhɨ mukowa ʉgwo ʉgwa hu Samaliya hu lozi waakwe, nantele ahahwibaadaga huje, ʉmwene muntu nʼgoosi. 10 Abhantu bhonti, ahwande abhapɨɨna na bhatabhazi bhahanʼtejelezyaga na je, “Ʉmuntu ʉnʉ, yʉʉyo likhone lya Ngʉlʉbhɨ lya bhayiga, iKhone iGoosi.” 11 Abhantu bhahanʼtejelezyaga hu nongwa ya je, ɨnsiku ɨnyinji ahabhaswijizyaga hu mbombo zyakwe ɨzyɨ lozi.

12 Leelo, ʉFilipo lwa wabhalʉmbɨɨlɨla ɨNongwa ɨNyinza ɨzyɨ wumwɨnɨ wa Ngʉlʉbhɨ, nɨ zi taawa lya Yeesu Kilisiti, bhahazyɨtɨhaga. Abhalume na bhashɨ bhahoziwaaga. 13 ɄSiimoni wope ahamwɨtɨha ʉYeesu, ahooziwa, ahanda hunʼondolezye ʉFilipo. Ahaswiga lwa wagalola amayele amagoosi nɨ vimanyishizyo ɨvyo ʉFilipo ahabhombaga.

14 Abhasontwa bha Yeesu pa Yelusaleemu lwa bhʉmvwa huje, abhantu abha hu Samaliya bhope bhɨtɨɨshe ɨNongwa ɨNyinza ɨzya Yeesu, bhahabhasonteelezya ʉPeeteli nʉ Yoohani ʉhwo. 15 Lwa bhaafiha, bhahabhapuutila abhantu ɨbho hwa Ngʉlʉbhɨ huje, bhamwambɨɨlɨle ʉMʼpepo ʉMʼfinjile, 16 pɨpo saga ahali ʉmuntu nka weeka mwɨbho ʉyo ʉMʼpepo ahamwishiiye. Bhahoziiwe lwene hwi taawa lya Mwɨnɨ ʉYeesu. 17 Ɨpo ʉPeeteli nʉ Yoohani bhahabhabhɨɨshɨla ɨnyoobhe hubhapuutile, bhope nka bhahamwambɨɨlɨla ʉMʼpepo ʉMʼfinjile.

18 ɄSiimoni lwa waalola huje, abhantu bhaala bhahumwambɨɨlɨla ʉMʼpepo ʉMʼfinjile hwi dala ɨlya bhɨɨshɨlwe ɨnyoobhe na bhasontwa, ahalɨnga hubhapeele ɨmpɨɨya ʉPeeteli nʉ Yoohani, ahabhalaabha ahaga, 19 “Mumpeele nanɨ ikhone ɨlyo huje, ʉmuntu wowonti ʉyo nahaihumʼɨɨshɨla ɨnyoobhe, wope ahamwambɨlɨlaje ʉMʼpepo ʉMʼfinjile.”

20 ɄPeeteli ahamʼʉʉzya ahaga, “Awe peeka nɨ mpɨɨya zyaho, ʉyagaje! Ʉsɨɨbha aje, ʉbhajiiye akale ɨmpeesya ya Ngʉlʉbhɨ nɨ mpɨɨya! 21 Awe saga ʉli nka pamo awe apa bhombe mu mbombo ɨnɨ, alɨngaane na je, ʉmwoyo gwaho saga nʼgolosu pa maaso ga Ngʉlʉbhɨ. 22 Ɨshi, laata ɨmbiibhi zyaho ɨzyo, ʉlaabhe ɨnkʉmbʉ hwa Mwɨnɨ huje, akhobhoshele hu nsɨɨbho zyaho ɨzyo. 23 Ɨndolile huje, ʉli nɨ jɨɨla haani, ɨmbiibhi zyaho zikhatiliiye.” 24 Ɨpo ʉSiimoni ahaamula huje, “Amwɨ mumpuutile hwa Mwɨnɨ huje, lisahanaaje nka limo mwɨgo ga mwayanga!”

25 ɄPeeteli nʉ Yoohani lwa bhaafumya ʉsimishizi na lʉmbɨɨlɨle izwi lya Mwɨnɨ, bhahanda aweele hu Yelusaleemu. Mwi dala bhahalʉmbɨlɨlaga ɨNongwa ɨNyinza ɨzya Yeesu mu vipanga vivinji ɨvya Bhasamaliya.

26 Isiku limo, ʉntumi wa Yehoobha ahamʼʉʉzya ʉFilipo huje, “Ʉbhale ambali ntende ashɨlɨle idala liila lya lishɨlɨla mu lʉʉgwa afume hu Yelusaleemu abhale hwi booma ɨlya hu Gaaza.” 27 Ɨpo ʉFilipo ahasogola, ahanda ashʉʉle, ahakhomaana nʉ muntu ʉmo ʉwa mu nsi ɨya hu Syopiya ʉyo ahali nʼsayulwe.† Ʉnʼsayulwe ahali muntu ʉla mu mwoyo gwakwe saga ahali nɨ nsɨɨbho ɨzya bhashɨ. Ahasayuliilwe hu nongwa yɨ mbombo yaakwe. Ʉyo ahali nʼgoosi wa hasʉngaga ɨvintu vyɨ mpɨɨya ɨngoosi ɨvya Kandake. Kandake hwa huje ʉmwɨnɨ ʉnʼshɨ ʉwɨ nsi ɨya hu Syopiya. Ʉnʼsayulwe ʉyo ahabhalile hu Yelusaleemu ahumʼpuute ʉNgʉlʉbhɨ. 28 Lwa weela hu khaaya, ahakhɨɨye mwi gaali‡ Igaali lyahali na makangaalu gabhɨɨlɨ, nantele lyahabhʉsyaga abhantu bhabhɨɨlɨ awe bhataatu peeka nʉʉla wa longozya. Leelo, ɨfalaasi zya zyahalidendemulaga. lyakwe, ahabhazyaga mu shitaabu sha Yesaaya ʉnʼkuwi wa Ngʉlʉbhɨ ʉwɨ mandɨ.

29 Ɨpo ʉMʼpepo ʉMʼfinjile ahamʼʉʉzya ʉFilipo huje, “Bhala lubhilo, ʉlizʉmbɨɨlɨle igaali liila.” 30 Lubhilo, ʉFilipo ahalishɨmbɨɨlɨla, ahalifishila. Ahamwʉmvwa ʉnʼgoosi ʉla abhaazya mu shitaabu sha Yesaaya ʉnʼkuwi, ahamʼʉzɨɨlɨzya ahaga, “Amazwi ɨgo gʉ bhaazya, bhʉlɨ, ʉgaaganya?” 31 Ahamwamula ahaga, “Ɨngagaaganya nanshi bhʉlɨ bhʉlɨ, lwa saga alɨɨho ʉmuntu ʉwa ndangaanyizye amazwi ɨga?” Ahamʼʉʉzya ʉFilipo huje, atʉʉshe mwi gaali lyakwe muula, bhakhale peeka huje, anʼangaanyizye. 32 ƗNsimbo ɨMfinjile ɨzyo ʉnʼsayulwe ʉla ahabhazyaga, ziyiga,

34 ɄNʼsyopiya ʉla ahamʼʉʉzya ʉFilipo huje, “Ɨhulamba ʉmbʉʉzye, amazwi ɨgo ʉnʼkuwi wa Ngʉlʉbhɨ ahasimbile, ayanga hu nongwa zya naanu? Bhʉlɨ, ayanga zya mwene yʉʉyo, awe zya muntu wɨnjɨ?” 35 Ɨpo ʉFilipo ahandila mu mazwi gɨɨgo agɨ Nsimbo ɨMfinjile hunʼʉmbɨɨlɨle ɨNongwa ɨNyinza ɨzya Yeesu.

36 Lwa bhajendeelela ashʉʉle mwi dala, bhahafiha pa pahali na mɨnzɨ. ɄNʼsyopiya ʉla ahamʼʉzɨɨlɨzya ʉFilipo huje, “Enya! Pali na mɨnzɨ ɨpa. Heenu ha hangandindila huje, ɨnooziwe?” 37 ɄFilipo ahamwamula ahaga, “Nkashele ʉhumwɨtɨha ʉYeesu Kilisiti hu mwoyo gwaho gwonti, ʉgooziwa.” Ʉnʼgoosi ʉla ahamwamula ahaga, “Ɨhwɨtɨha huje, ʉYeesu Kilisiti yʉ Mwana Wa Ngʉlʉbhɨ.” # Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani. 38 Ʉnʼgoosi ʉyo ahɨmɨɨlɨsya igaali liila, bhahiiha bhonti bhabhɨɨlɨ mu mɨnzɨ, ʉFilipo ahamwozya. 39 Lwa bhazʉbha mu mɨnzɨ muula, lubhilo ʉMʼpepo Wa Yehoobha ahanʼnyeetula ʉFilipo. Ʉnʼgoosi ʉla saga ahanʼola ʉFilipo nantele, leelo ahajendeelela ashʉʉle sha shiiye tee. 40 ɄFilipo wope ahega ali mwi booma ɨlya hu Asooto. Ahasogola ɨpo, ahashʉʉla sha bhalʉmbɨɨlɨla abhantu ɨNongwa ɨNyinza ɨzya Yeesu Kilisiti mu mabooma gonti aga mwi dala. Ɨpo ahafiha mwi booma ɨlya hu Kayisaliiya.