1 Mu habhaazyo ɨho, ʉSauli ahajendelelaga hubhoogofye abhooziwa huje, bha saga bhaleha hunʼondolezye ʉMwɨnɨ, anza hubhagoje. Ahabhala hwa nʼsayi ʉnʼgoosi wa Ngʉlʉbhɨ, 2 ahanʼaabha huje, amʼpeele ɨkalaata ɨzya bhale nazyo hwa bhagoosi abhɨ nyumba ɨzya puutile na manyiilile ɨzya mwi booma ɨlya hu Damesiki. Ɨkalaata ɨzyo zyahali zya humwɨtɨshɨzye huje, nkashele ahumwaga ʉmuntu wowonti wa londolezya idala ɨlyo ɨlya Mwɨnɨ ʉYeesu, abhalume na bhashɨ, abhakʉngaje na bhatwale hu Yelusaleemu.

3 Mu nshʉʉla yaakwe ʉSauli lwa palamila afishe hu Damesiki, lubhilo ʉnʼkhozyo ʉnʼgoosi afume hu mwanya gwahanʼkhozya hwonti. 4 Ahagwa pansi, ahʉmvwa izwi lihumʼʉʉzya liyiga, “Sauli! Sauli! Yeenu ʉhundavya?” 5 ɄSauli ahabhʉzɨɨlɨzya huje, “Awe we naanu Mwɨnɨ?” Lyope lyahaga, “Anɨ nɨ Yeesu wʉ hundavya. 6 Ɨshi, ɨmɨɨlɨla! Ʉtʉʉshe mwi booma, ʉmwo ʉnza humwaje ʉmuntu ʉmo wa bhala hubhʉʉzye zyʉ hwanziwa azibhombe.”

7 Abhantu bha bhahashʉʉlaga peeka nʉ Sauli bhahɨmɨɨlɨla, bhahapʉʉma myɨ, pɨpo bhope bhahalyʉmvwɨzye izwi ɨlyo, leelo saga bhahalyagɨɨnye. Nantele, saga bhahanʼolile ʉmuntu wa yanga. 8 ɄSauli ahɨmɨɨlɨla. Lwa wiigula amaaso, ahega saga alola nka hamo. Abhamwabho bhahanʼkhata ɨnyoobhe na hunʼongole, bhahanʼtwala hu Damesiki. 9 Ahamala ɨnsiku zitaatu saga alola, nantele saga ahalyanga na mwele nka hamo.

10 Hu Damesiki ʉhwo, hwahali nʉ mwoziwa ʉmo, itaawa lyakwe ahali yʉ Ananiya. ɄMwɨnɨ ʉYeesu ahanʼkwizya ʉAnaniya mu ndoleshelo ahaga, “We Ananiya!” Wope ahaga, “Mwɨnɨ, anɨ ɨndi ɨpa.” 11-12 ɄMwɨnɨ ahamʼʉʉzya huje, “Mu nyumba ya Yuuda yɨ li mwi dala lya bhayiga iGolosu, muli nʉ muntu ʉwa mwi booma ɨlya hu Taaso, itaawa lyakwe yʉ Sauli. Ahalolile ɨndoleshelo. Mu ndoleshelo ɨyo ahanʼolile ʉmuntu wa bhayiga Ananiya atʉʉha mu nyumba mwa li huje, amʼɨɨshɨle ɨnyoobhe, ayande alole nantele. Ɨshi, ahundaabha anɨ. Awe sogolaga, ʉbhale mu nyumba ɨyo ɨya Yuuda. Ʉbhʉzɨɨlɨzye muula ʉmuntu ʉyo ʉSauli.”

13 ɄAnaniya ahamʼʉʉzya ahaga, “We Mwɨnɨ, ɨnʉmvwɨzye afume hwa bhantu bhinji ɨnongwa zya muntu ʉnʉ, sha habhabhombɨɨye shibhiibhi abhantu bhaaho hu Yelusaleemu! 14 Ɨshi alɨɨho ɨpa, nantele abhalongozi bha bhasayi bhaaho bhamwɨtɨshɨɨye huje, abhakʉngaje bhonti bha bhahusʉʉbhɨla awe.” 15 Leelo, ʉMwɨnɨ ahamʼʉʉzya ʉAnaniya ahaga, “Awe bhalaga! Ʉmuntu ʉyo ɨnʼsaluuye aje, abhe mʼomvi waanɨ huje, abhabhʉzyaje ɨnongwa ɨzyaliinɨ aBhayahuudi, bha saga Bhayahuudi na bhamwɨnɨ bhaabho. 16 Anɨ nɨɨnɨ nahaihunʼanga minji huje, ahwanziwa alabhe hu nongwa yaanɨ.”

17 Ɨpo ʉAnaniya ahabhala, ahatʉʉha mu nyumba ɨla ʉSauli ahali. Ahamʼɨɨshɨla ɨnyoobhe, ahamʼʉʉzya huje, “Sauli wʉ li holo waanɨ mwa Kilisiti! ɄMwɨnɨ ʉYeesu ansonteleziizye hwaliiwe huje, ʉyande alole, nantele ʉmwambɨɨlɨle ʉMʼpepo ʉMʼfinjile. ɄYeesu ʉyo ya yʉʉyo wa halloleshɨɨye mwi dala hu habhaazyo haala lwa wahɨnzaga ɨpa.” 18 Lubhilo amakooko ga gali nanshi amakhonda gahalagala afume mu maaso ga Sauli, ahanda alole nantele. Ahɨmɨɨlɨla, ahooziwa. 19 Lwa waalya ɨshalye, ahabha ni khone.

ɄSauli ahakhɨɨye ɨnsiku nyishe peeka na bhooziwa mwi booma ɨlya hu Damesiki. 20 Lwʉlwo ahanda abhale na hunʼʉmbɨɨlɨle ʉYeesu mu nyumba ɨzya puutile na manyiilile huje, ʉYeesu Mwana Wa Ngʉlʉbhɨ.* Bhaazya izwi Mwana Wa Ngʉlʉbhɨ hu Ɨngalulanyo ɨzyɨ mazwi amajenu hu wandilo wɨ shitaabu ɨshi. 21 Abhantu bhonti bha bhahamwʉmvwɨzye ʉSauli, bhahaswiga tee. Bhahabhʉzɨlɨzanya bhahaga, “Bhʉlɨ, ʉmuntu ʉnʉ saga ya yʉʉnʉ ya habhalavyaga abhooziwa hu Yelusaleemu? Bhʉlɨ, ʉnʉ saga ayɨnzɨle huje, abhakʉngaje abhantu nanshi ɨbho pa Damesiki ɨpa na hubhatwale hwa bhalongozi bha bhasayi bha Ngʉlʉbhɨ?” † Abhasayi bha Ngʉlʉbhɨ peeka na bhalongozi bhaabho bhahabhombaga ɨsho, pɨpo bhahasɨɨbhaga huje, bhahumʼombela yʉ Ngʉlʉbhɨ. Lyoli bhahayizigaga ɨmbombo ya Ngʉlʉbhɨ. 22 Leelo, ʉSauli ahonjezya tee abhe nʼdandamazu. Nantele ahabhasimishizyaga aBhayahuudi bha bhahakhalaga hu Damesiki huje, ʉYeesu yʉ Kilisiti, na hubhamene.

23 Lwa zyashɨla ɨnsiku ɨnyinji, aBhayahuudi ɨbho bhahajeehana huje, bhanʼgoje. 24 Bhahamwʉbhɨlaga mu malyango gi booma liila pasanya na nʉsiku huje, bhanʼgoje. Leelo, ɨnsɨɨbho zyabho ɨzya hunʼgoje zyahamʼfishila ʉSauli. 25 Abhasundwe bhaakwe bhahamʼɨɨha mwi seje igoosi nʉsiku, bhahanʼshɨzya mwi diliisha lya lyahali mu lubhaga ʉlwa mwi booma, bhahamwisya panzɨ.

26 Pamandɨ ʉSauli ahafiha hu Yelusaleemu, ahalɨngaga asangaane na bhooziwa. Leelo, bhonti bhahamwogopaga, pɨpo saga bhahɨtɨɨshe huje, wabha mwoziwa. 27 Leelo, ʉBalinaaba‡ ʉBalinaaba Ʉnʉ ya yʉʉla wa simbwilwe mu Mbombo Zya Bhasontwa 4:36-37. ahanʼtwala ʉSauli hwa bhasontwa bha Yeesu. Ahabhabhʉʉzya ʉSauli sha hanʼolile ʉMwɨnɨ ʉYeesu mwi dala ɨlya bhale hu Damesiki, nʉ Mwɨnɨ sha hamʼʉzɨɨzye ʉSauli. Ahabhabhʉʉzya ʉSauli sha habhalʉmbɨlɨɨye abhantu abhʉʉhwo ɨnongwa ɨzya Yeesu hu dandamazu.

28 Ɨpo ʉSauli ahasyala peeka na bhasontwa bha Mwɨnɨ. Ahazyʉngʉʉlaga pa Yelusaleemu, sha hubhalʉmbɨɨlɨla abhantu ɨnongwa ɨzya Mwɨnɨ ʉYeesu hu dandamazu. 29 Ahayangaga na daliihane na Bhayahuudi bhamo bha bhahayangaga ɨnjango ɨyɨ Shiyunaani, leelo abheene bhahalɨngaga huje, bhanʼgoje. 30 Abhaholo mwa Kilisiti lwa bhaamanya ɨzyo, bhahanʼoleezya, bhahamʼfisya hwi booma ɨlya hu Kayisaliiya. Bhahanʼeha huje, abhalaje humwabho hwi booma ɨlya hu Taaso.

31 Mu nsiku ɨzyo, ɨshibhanza shahali nʉ tengaanu mwonti mu mukowa ʉgwa hu Yudeeya, ʉgwa hu Galilaaya nʉ gwa hu Samaliya. Abhantu bhɨ shibhanza bhahakhamantanaga, na hunʼtinishe ʉMwɨnɨ. ɄMʼpepo ʉMʼfinjile ahabhagwɨzyaga ʉmwoyo, nʉ winji waabho wahonjelelaga.

32 Mu habhaazyo hɨɨho ʉPeeteli ahashɨlaga ʉhwu nʉʉhwo, ahafiha hwi booma ɨlya hu Liida huje, abhalamushe abhantu bha Ngʉlʉbhɨ bha bhahakhalaga ʉhwo. 33 Mwi booma ɨlyo ahamwaga ʉnʼemazu, itaawa lyakwe ahali yʉ Ayineya. Ahagonile mu shɨlɨlɨ hu habhaazyo ahɨ maaha naana (8). 34 ɄPeeteli ahamʼʉʉzya huje, “Awe Ayineya, ʉYeesu Kilisiti aponiizye. Ɨmɨɨlɨla! Zinga ɨshɨlɨlɨ shaaho.” Lubhilo ʉAyineya ahɨmɨɨlɨla. 35 Abhantu bha bhahakhalaga pi booma ɨlya pa Liida na mwi khombe ɨlya hu Shalooni, lwa bhanʼola ʉAyineya, bhonti bhahamwɨtɨha ʉMwɨnɨ ʉYeesu.

36 Mwi booma ɨlya hu Yaafa ahali ʉnʼshɨ ʉmo ʉmwoziwa, itaawa lyakwe ahali yʉ Tabita, hu Shiyunaani hwa huje Dolikaasi, hwa huje ɨNsya. ɄDolikaasi ahabhavwaga abhapɨɨna, na bhombe ɨmbombo ɨzyɨnjɨ ɨnyinza. 37 Ɨnsiku ɨzyo, ʉDolikaasi ahabhina ɨmpʉngo, ahafwa. Abhantu bhahagwozya ʉmʼvimba gwakwe, bhahagulambaliha mu mpanda ɨya pamwanya mu nyumba ɨnjeleehanye. 38 Mu habhaazyo ɨho, abhooziwa bhahʉmvwa huje, ʉPeeteli ali mwi booma ɨlya hu Liida. Bhahabhasonteelezya abhantu bhabhɨɨlɨ hwa mwene, pɨpo ibooma ɨlya hu Liida lyahapalamɨɨne ni booma ɨlya hu Yaafa. Abhantu ɨbho bhahanʼamba ʉPeeteli bhahaga, “Talamba ʉyɨnze humwetu, ʉgandi akhaabhe!”

39 Ɨpo ʉPeeteli ahabhala peeka nabho. Lwa bhaafiha mu Yaafa muula, bhahanʼtwala mu mpanda ɨya pamwanya pa nyumba ɨnjeleehanye. Abhashɨ abhafwɨle bhonti bhahamʼʉngaanila sha bhalila. Bhahanʼolesya amagolole na menda aganjɨ, ɨgo ʉDolikaasi ahabhasonelaga lwa li mwʉmi.

40 ɄPeeteli ahabhafumya bhonti panzɨ, ahasugamila pansi, ahanʼaabha ʉNgʉlʉbhɨ. Aheenya hu mʼvimba guula, ahaga, “We Tabita, daamuha!” ɄTabita ahadaamula amaaso. Lwa wanʼola ʉPeeteli, ahakhala. 41 ɄPeeteli ahanʼkhata ɨnyoobhe, ahamʼʉʉsya. Ahabhakwizya abhantu bha Ngʉlʉbhɨ na bhashɨ abhafwɨle bhaala, ahabhabhʉʉzya huje, “Enyi, ʉTabita mwʉmi!” 42 Ɨnongwa ɨzyo zyahanyampaana mwi booma lyonti ɨlya hu Yaafa, abhantu abhinji bhahamwɨtɨha ʉMwɨnɨ ʉYeesu. 43 ɄPeeteli ahasyala hu Yaafa ɨnsiku zinyinji, ahakhalaga mu nyumba ya muntu ʉla ahagombaga ɨnkwembe. Itaawa lyakwe ahali yʉ Siimoni.