1 Mwi booma ɨlya hu Kayisaliiya mwahali nʉ muntu ʉNʼuumi, ʉyo itaawa lyakwe ahali yʉ Kolineeliyo. Ʉyo ahali nʼongozi ʉwa bhalwi bhɨ Shiluumi. Ahalongozyaga abhalwi ɨmya yeeka afume mu shipʉga ɨshigoosi ɨsha bhalwi sha shahali Shipʉga Sha Bhaitaaliya. 2 Nantele, ahali muntu mwinza wa hanʼtinihaga ʉNgʉlʉbhɨ, peeka na bhantu bhonti abha mu khaaya yaakwe. Ahamʼpuutaga ʉNgʉlʉbhɨ ahabhaazyo honti, na hubhaavwe haani abhapɨɨna.

3 Isiku limo mu saala fundihandwɨmo (9) ɨshi, pasanya, ʉKolineeliyo ahalola ɨndoleshelo. Mu ndoleshelo ɨyo, ahanʼola ʉntumi wa Ngʉlʉbhɨ ahumwɨnzɨla. Ʉntumi ahamʼʉʉzya ahaga, “We Kolineeliyo!” 4 ɄKolineeliyo ahamwenya ʉntumi ʉla hu lyoga, ahamʼʉzɨɨlɨzya ahaga, “We Mwɨnɨ, huli yeenu?” Ʉntumi ahamʼʉʉzya huje, “ɄNgʉlʉbhɨ ayʉmvwɨzye ɨmpuuto zyaho, nantele alolile shʉ bhaavwa abhapɨɨna. Ɨgo gonti agamɨɨnye, saga ahaigɨɨwa. 5 Ɨshi leelo, ʉbhasonteelezye abhantu hwi booma ɨlya hu Yaafa, bhanʼkwizye ʉmuntu ya bhayiga yʉ Siimoni, itaawa ɨlyamwabho bhayiga yʉ Peeteli. 6 Akhala hwa muntu wa bhayiga yʉ Siimoni, wa gomba ɨnkwembe. Ɨnyumba yaakwe ɨli munshɨnjɨ mu nsʉmbi.”

7 Ʉntumi lwa waamala humʼʉʉzye ʉKolineeliyo, ahasogola. ɄKolineeliyo ahabhakwizya abhabhomba mbombo bhaakwe bhabhɨɨlɨ peeka nʉ nʼwi ʉmo mwa bhaavwi bhaakwe wa hanʼtinihaga ʉNgʉlʉbhɨ. 8 Ahabhamamila zyonti ʉntumi zya halajiziizye, ahabhasonteelezya hu Yaafa.

9 Isiku ɨlya bhɨɨlɨ mu saala nʼtanda ɨshi, pasanya, abhantu ɨbho ʉKolineeliyo ahabhasonteleziizye, bhahapalamila hu Yaafa. Mu habhaazyo ɨho ʉPeeteli wope ahazʉbha pamwanya pa nyumba* ABhayahuudi bhahatiimaga ɨnyumba zyabho, bhahaalaga isole pamwanya, bhahapinyaga ʉmango, na zyeme ni toto. Ɨpo pa bhahatʉʉyaga. huje, amʼpuute ʉNgʉlʉbhɨ. 10 Ɨnzala yahanʼuma, ahasʉngwa alye. Lwa bhali ateleshe ɨshalye, ahalola ɨndoleshelo. 11 Mu ndoleshelo ɨyo ahalola hu mwanya hwigule, ahantu ha hali nanshi igolole igoosi lya likhɨɨtwe ɨmbali zyakwe zinɨ, lihwiha pansi. 12 Muuhati yaakwe mwahali nɨ hanu nɨ vyʉma ɨvinji. Mwahali nɨ hanu nɨ vyʉma vyɨ manama ganɨ, vya vikwesushila, nɨ nyonyi.† mwahali nɨ hanu nɨ vyʉma vyɨ manama ganɨ, vya vikwesushila, nɨ nyonyi Mu hanu ɨzyo, zimo ɨndajizyo zya Moose zyahakhaanaga alye.

13 ɄPeeteli ahʉmvwa izwi liyiga, “We Peeteli, bhʉʉha! Ʉbhoole na lye!” 14 ɄPeeteli ahaamula ahaga, “Ndaali, we Mwɨnɨ! Saga ɨndiiye nka lumo ahantu ha hali haavu!” 15 Izwi ɨlyo lyahamʼʉʉzya ʉPeeteli lyahaga, “Ahantu hohonti haala ʉNgʉlʉbhɨ ahasangalusiizye, awe ʉgandi huhakwizye huje, haavu.” 16 Ɨzyo zyahabhombɨɨshe hataatu lwonti. Ɨpo nalinaali igolole liila lyahaweela hu mwanya.

17 ɄPeeteli lwa hwibhʉzɨɨlɨzya huje, ɨndoleshelo ɨyo hwa huje bhʉlɨ, abhantu bhaala ʉKolineeliyo bha habhasonteleziizye, bhahabhʉzɨlɨzyaga. Ɨpo bhahayimanya ɨnyumba ya Siimoni, bhahɨmɨɨlɨla pa lyango. 18 Bhahiiguzya, bhahabhʉzɨɨlɨzya bhahaga, “Bhʉlɨ, ɨpa papaala akhala ʉSiimoni wa bhayiga Peeteli?” 19 ɄPeeteli lwa sɨɨbha ɨndoleshelo ɨyo, ʉMʼpepo ʉMʼfinjile ahamʼʉʉzya huje, “Siimoni, bhalɨɨho abhantu bhataatu bha bhahuhwanza. 20 Ʉgandi asingaamwe. Iha, mubhale peeka, pɨpo anɨ nɨɨnɨ ɨmbasonteleziizye.”

21 ɄPeeteli ahiiha pansi, ahabhabhʉʉzya abhantu bhaala huje, “Anɨ ya yʉʉla wa muhumwanza. Ɨshi, muhunanzila yeenu?” 22 Bhahamwamula bhahaga, “Ʉnʼongozi ʉmo ʉwa bhalwi atisonteleziizye. Itaawa lyakwe yʉ Kolineeliyo, muntu wa li nʼgolosu. Ahunʼtiniha ʉNgʉlʉbhɨ, nantele aBhayahuudi bhonti bhahunʼsʉmba. Ɨshi, ʉntumi wa Ngʉlʉbhɨ amʼʉzɨɨzye huje, ahwambɨɨlɨle mu nyumba yaakwe, atejeelezye amazwi gaala gʉ haihumʼʉʉzya.” 23 Ɨpo ʉPeeteli ahabhabhʉʉzya abhantu bhaala huje, “Ɨnzaji mu nyumba.” Bhope bhahadɨɨla hwa mwene.

Lwa hwasha, ʉPeeteli na bhantu bha Kolineeliyo bhahasogola pa Yaafa. Abhaholo bhamo mwa Kilisiti abhɨɨpo bhahabhaloleezya. 24 Ɨndaabhɨ yaakwe bhahafiha hu Kayisaliiya. Bhahega ʉKolineeliyo abhabhʉngɨɨnye abhaholo bhaakwe peeka na bhamanyani bhaakwe, ahubhagʉʉlɨla.

25 ɄPeeteli lwa waafiha panzɨ, ʉKolineeliyo ahamwambɨɨlɨla, ahasugamila pansi pa manama gaakwe na humʼpeele ɨnshɨnshɨ. 26 Leelo ʉPeeteli ahamʼʉʉsya, ahamʼʉʉzya ahaga, “Ɨmɨɨlɨla! Enya, anɨ ɨndi muntu nanshi awe!” 27 ɄPeeteli nʉ Kolineeliyo bhahatʉʉha mu nyumba yaakwe sha bhayanga, bhahabhaaga abhantu abhinji bhabhʉngɨɨne muula. 28 ɄPeeteli ahabhabhʉʉzya ahaga, “Amwɨ mumɨɨnye shinza huje, atɨ tili Bhayahuudi. Ɨndajizyo zyetu zihutikhaana asangaane na bhantu bha saga Bhayahuudi. Nantele, saga tihwɨtɨshɨlwa ayatilane naamwɨ. Leelo, ʉNgʉlʉbhɨ ansundile huje, ɨngandi hunʼkwizye ʉmuntu wowonti huje, mwavu. 29 Sha shɨɨsho lwa wankwizya, ɨnɨnzɨle sinta ahwolobhele. Ɨshi, ʉhunkwizizya yeenu?”

30 ɄKolineeliyo ahamwamula ahaga, “Ɨnsiku zinɨ zya zishɨlɨle mu habhaazyo nanshi ɨha aha mu saala fundihandwɨmo (9) ɨya pasanya, nahamʼpuutaga ʉNgʉlʉbhɨ mu nyumba yaanɨ. Lubhilo nahanʼola ʉmuntu ayɨmɨlɨɨye pitagaalila lyanɨ akwɨte amenda ga galawuuhana. 31 Ahaga, ‘We Kolineeliyo, ʉNgʉlʉbhɨ ayʉmvwɨzye ɨmpuuto zyaho, nantele alolile shʉ bhaavwa abhapɨɨna. 32 Ɨshi, ʉbhasonteelezye abhantu bhabhale hu Yaafa, hunʼkwizye ʉSiimoni wa bhayiga Peeteli. Akhala hwa muntu, ʉyo itaawa lyakwe ahali yʉ Siimoni wa gomba ɨnkwembe. Ɨnyumba yaakwe ɨli munshɨnjɨ mu nsʉmbi.’ 33 Ɨzyo zya zimbɨɨshɨle huje, ɨmbasonteelezye abhantu lubhilo ahukwizye, nawe ʉbhombile shinza ahwɨnze. Ɨshi tenti tili pa maaso ga Ngʉlʉbhɨ, titejeelezye amazwi gonti gʉ lajiziiwe huje, ʉtibhʉʉzye.”

34 Ɨpo ʉPeeteli ahabhabhʉʉzya abhantu bhaala ahaga, “Ɨshi naamanya huje, lyoli ʉNgʉlʉbhɨ saga abhagunjiiye nka bhamo! 35 Leelo, ahubhɨɨtɨha abhantu abhɨ nsi zyonti bha bhahunʼtiniha na bhombe ga gahwanziwa hwa mwene. 36 Amwɨ mumɨɨnye huje, ʉNgʉlʉbhɨ ahasonteleziizye abhantu bhaakwe hubhalʉmbɨɨlɨle aBhaizilaeeli ɨNongwa ɨNyinza aje, bhawaaje ʉtengaanu ashɨlɨle hwa Yeesu Kilisiti, ʉMwɨnɨ wa bhantu bhonti. 37 Mumɨɨnye zya zyahabhombɨɨshe mu nsi yonti ɨya tiBhayahuudi ahwandile hu mukowa ʉgwa hu Galilaaya. Ɨgo gonti gahabhombɨɨshe ʉYoohani lwa habhalʉmbɨlɨlaga abhantu huje, bhooziwe. 38 Mumɨɨnye huje, ʉNgʉlʉbhɨ ahanʼsaluuye ʉYeesu ʉwa hu Nazaleeti humʼpeele ʉMʼpepo ʉMʼfinjile ni khone. Wope ʉYeesu ahabhombaga ɨnyinza ʉhwu nʉʉhwo, ahabhatʉʉlaga bhonti bha bhalabha ni khone lya Seetano. Ahabhombaga ɨgo, pɨpo ʉNgʉlʉbhɨ ahali peeka nawo.

39 Gonti ɨgo ʉYeesu ga habhombile mwi booma ɨlya hu Yelusaleemu na mu nsi yonti ɨya tiBhayahuudi, atɨ tili bhasimishizi bhaakwe. Pamandɨ bhahanʼgoga hwi dala ɨlya hunʼkhobheehanye pa shikhobheehanyo. 40 Leelo, isiku ɨlya taatu ʉNgʉlʉbhɨ ahanʼzyʉsyɨzye, ahanʼolesya hwa bhantu. 41 Saga ahalolɨɨshe hwa bhantu bhonti, leelo ahalolɨɨshe hwaliitɨ ta tisaluliilwe nʉ Ngʉlʉbhɨ huje, tibhe bhasimishizi bhɨɨzyo. ɄYeesu lwa wazyʉha hwa bhafwe, atɨ tɨɨtɨ tahaliiye na mwele peeka nawo. 42 Ahatilajiziizye huje, tibhalʉmbɨlɨlaje abhantu na simishizye huje, ʉmwene ʉNgʉlʉbhɨ ya mʼɨɨshɨle huje, abhalongaje abhʉʉmi na bhafwe. 43 Abhakuwi bha Ngʉlʉbhɨ bhonti bhahasimishiziizye hu nongwa ya Yeesu huje, shila muntu wa humwɨtɨha, ahaikhobhoshelwa ɨmbiibhi ashɨlɨle hwa mwene ʉYeesu.”

44 ɄPeeteli lwa yanga amazwi ɨgo, ʉMʼpepo ʉMʼfinjile ahabhiishila bhonti bha bhahatejelezyaga. 45 ABhayahuudi abhooziwa bha bhahanʼolezɨɨzye ʉPeeteli bhahaswiga tee, lwa bhaalola huje, ʉMʼpepo ʉMʼfinjile abhishiiye bhope abhantu bha saga Bhayahuudi. 46 Bhahaswiga, pɨpo bhahabhʉmvwɨzye bhayanga hu njango ɨmpya na humʼmwamishe ʉNgʉlʉbhɨ.

ɄPeeteli ahaga, 47 “Abhantu ɨbha bhope bhamwambɨlɨɨye ʉMʼpepo ʉMʼfinjile, nanshi atɨ sha tahamwambɨlɨɨye. Nʉʉmo wa gakhaana huje, bhagandi ahwoziwe na mɨnzɨ!” 48 Ɨpo ahalajizya huje, ʉKolineeliyo na bhamwabho bhooziwe hwi taawa lya Yeesu Kilisiti. Pamandɨ bhahanʼaabha huje, asyale peeka nabho hu nsiku nyishe.