11
ɄPeeteli ahubhabhʉʉzya zya zibhombɨɨshe hwa bha saga Bhayahuudi
Abhasontwa na bhaholo mwa Kilisiti abhanjɨ bha bhahakhalaga mu mukowa ʉgwa hu Yudeeya, bhahʉmvwɨzye huje, bha saga Bhayahuudi bhope bhɨtɨɨshe ɨNongwa ɨNyinza ɨzya Yeesu. Abhooziwa bhɨ Shiyahuudi bhahanzaga huje, bha saga Bhayahuudi bhatendwaje ɨngoola zya hwitagaalila zyɨ lume. ɄPeeteli lwa waweela hu Yelusaleemu, bhahanda hunʼtaake, bhahaga, “Weewe wahatʉʉhaga mu nyumba zya bhantu bha saga Bhayahuudi, na sangaane alye ɨshalye peeka nabho!”
Ɨpo ʉPeeteli ahanda hubhabhʉʉzye izwi limo limo zyonti sha zyahabhombɨɨshe, ahabhabhʉʉzya ahaga, “Isiku limo, nahali hwi booma ɨlya hu Yaafa. Lwɨ ndi ahunʼaabhe ʉNgʉlʉbhɨ, nahalola ɨndoleshelo. Mu ndoleshelo ɨyo, nahalola ahantu ha hahali nanshi igolole igoosi lya likhɨɨtwe ɨmbali zyakwe zinɨ. Hahiihaga afume hu mwanya, hahiishila panshɨnjɨ paliinɨ. Lwa naheenya muuhati yaakwe, nahalola muli nɨ hanu nɨ vyʉma vinji vinji. Mwahali nɨ hanu nɨ vyʉma vyɨ manama ganɨ, vya vikwesushila, nɨ nyonyi.
Ɨpo nahʉmvwa izwi, lyahaga, ‘We Peeteli, bhʉʉha! Ʉbhoole na lye!’ Nahaamula nahaga, ‘Ndaali, we Mwɨnɨ! Enya, saga ɨndiiye nka lumo ahantu ha hali haavu!’ Leelo, izwi ɨlyo afume hu mwanya lyahambʉʉzya nantele huje, ‘Ahantu hohonti haala ʉNgʉlʉbhɨ ahasangalusiizye, ʉgandi aje, haavu.’ 10 Ɨzyo zyahabhombɨɨshe hataatu lwonti, ɨpo ɨvintu ɨvyo vyonti vyahaweela hu mwanya.
11 Lwʉlwo abhantu bhataatu bha bhahasonteleziiwe afume hwi booma ɨlya hu Kayisaliiya bhahali bhɨmɨlɨɨye pitagaalila pa nyumba ya nahakhalaga. 12 ɄMʼpepo ʉMʼfinjile ahambʉʉzya huje, ɨmbale peeka nabho sinta asingaamwe. Ɨpo nahabhala peeka na bhamwetu ɨbha nʼtanda, tahatʉʉha mu nyumba ya Kolineeliyo. 13 Ʉmwene ahatimamila ʉntumi sha hanʼoleshɨɨye mu nyumba yaakwe ʉmwo. Ʉntumi ʉyo ahamʼʉzɨɨzye ahajile, ‘Ʉbhasonteelezye abhantu hu Yaafa huje, bhanʼkwizye ʉSiimoni wa bhayiga Peeteli. 14 Ʉyo ahaihubhʉʉzya amazwi. Ashɨlɨle mu mazwi ɨgo wahaifyʉlwa awe peeka na bhantu bhonti bha mu khaaya yaaho.’
15 Lwɨ hwanda ayanje na bhantu ɨbho, lubhilo ʉMʼpepo ʉMʼfinjile ahabhiishila, nanshi sha hatishiiye atɨ hu wandilo. Bhaazya ɨMbombo Zya Bhasontwa 2:1-4. 16 Nahiizuha izwi liila ʉMwɨnɨ ʉYeesu lya hatibhʉzɨɨzye huje, ‘ɄYoohani ahabhozyaga abhantu na mɨnzɨ, leelo amwɨ mwahaiyooziwa hu Mʼpepo ʉMʼfinjile.’  Bhaazya ɨMbombo Zya Bhasontwa 1:5. 17 Ɨsho shikʉnjɨlwa ʉNgʉlʉbhɨ sha hatipiiye mu habhaazyo haala lwa tahamwɨtɨɨshe ʉMwɨnɨ ʉYeesu Kilisiti, sha shɨɨsho bhope sha bhapiiye. Ɨshi! Anɨ nɨ naanu huje, ɨngajile ɨndwanje nʉ Ngʉlʉbhɨ?”
18 Abhooziwa bhɨ Shiyahuudi bhaala lwa bhʉmvwa ɨzyo, bhahaleha hunʼtaake ʉPeeteli. Bhahamʼmwamiha ʉNgʉlʉbhɨ bhahaga, “Fwandi, ʉNgʉlʉbhɨ abhapiiye bhope abhantu bha saga Bhayahuudi idala ɨlya laate hu mbiibhi zyabho, bhawaaje ʉwʉʉmi ʉwa wiila na wiila!”
Ɨshibhanza ɨsha hu Antiyokiya shisayiwa
19 Abhooziwa bha bhahanyampɨɨne hu nongwa yɨ malabha lwa bhanʼgoga ʉSiteefano, Bhaazya ɨMbombo Zya Bhasontwa 8:1. bhahabhala hu mukowa ʉgwa hu Foyiniike, mu nsi yɨ li paahati pa nsʉmbi ya bhayiga Kiipulo, na mwi booma ɨlya hu Antiyokiya ɨya hu mukowa ʉgwa hu Siiliya. Ʉhwo hwonti, bhahalʉmbɨlɨlaga ɨNongwa ɨNyinza ɨzya Mwɨnɨ ʉYeesu hwa Bhayahuudi bheene. 20 Leelo, pa Antiyokiya, bhamo mwɨbho bhahɨnzɨle afume hu nsi ɨya hu Kiipulo na hwi booma ɨlya hu Kileene. Abheene bhahanda alʉmbɨɨlɨle ɨNongwa ɨNyinza ɨzya Mwɨnɨ ʉYeesu na hwa bha saga Bhayahuudi. 21 Ikhone lya Yehoobha lyahali peeka nabho. Abhantu abhinji tee bhahɨɨtɨha na humʼɨnjɨɨlɨle ʉMwɨnɨ ʉYeesu.
22 Abhantu abhɨ shibhanza ɨsha hu Yelusaleemu lwa bhʉmvwa ɨzyo zya zibhombɨɨshe hwa bhantu ɨbho abha hwi booma ɨlya hu Antiyokiya, bhahanʼsonteelezya ʉBalinaaba ʉhwo. 23 Lwa waafiha ʉhwo, ahanʼola ʉNgʉlʉbhɨ sha bhasayile abhantu ɨbho. Ahaseshela haani, ahabhakhajiizya bhonti huje, bhajendelelaje abhe bhasundwe hwa Mwɨnɨ hu mwoyo gwonti. 24 ɄBalinaaba ahali muntu mwinza, ʉMʼpepo ʉMʼfinjile ahanʼongolaga, nantele ahali nʉ lwɨtɨho haani. Ɨpo abhantu bha Mwɨnɨ bhahonjeelela abhe bhinji haani.
25 Pamandɨ ʉBalinaaba ahabhala hwi booma ɨlya hu Taaso humwanze ʉSauli. 26 Lwa wamwaga, ahanʼeeta hu Antiyokiya. Bhahakhala ʉhwo ʉmwaha gwonti, bhahabhʉngaanaga peeka na bhantu bhɨ shibhanza, bhahabhamanyizyaga abhantu abhinji tee ɨnongwa ɨzya Yeesu. Pɨnɨɨpo pi booma ɨlya hu Antiyokiya abhantu bhahandile abhakwizye abhooziwa Bhakilisiti.
27 Ɨnsiku ɨzyo bhahɨnza abhakuwi bhamo bha Ngʉlʉbhɨ pa Antiyokiya afume hwi booma ɨlya hu Yelusaleemu. 28 Ʉmo mwɨbho itaawa lyakwe ahali yʉ Agaabo. Ʉyo ahɨmɨɨlɨla, ahayanga ʉkuwi ashɨlɨle hu Mʼpepo ʉMʼfinjile huje, ɨnzala ɨngoosi yahaigwa mu nsi ɨzyɨnjɨ zyonti. Ɨnzala ɨyo yahafumiiye ʉKayisali ʉKilawudiyo ʉmwɨnɨ ʉnʼgoosi lwa halongozyaga. 29 Afumilane nɨɨzyo, abhooziwa bhahɨtɨɨhana huje, shila muntu afumyaje ɨvintu alɨngaane na viila vya li navyo huje, vibhavwaje abhooziwa abhamwabho abha hu mukowa ʉgwa hu Yudeeya. 30 Bhahavibhʉngaanya, bhahabhapeela ʉBalinaaba nʉ Sauli huje, bhavitwale hwa bhagoosi abhɨ shibhanza hu Yelusaleemu.

11:15 Bhaazya ɨMbombo Zya Bhasontwa 2:1-4.

11:16 Bhaazya ɨMbombo Zya Bhasontwa 1:5.

11:19 Bhaazya ɨMbombo Zya Bhasontwa 8:1.