1 ɄPaulo nʉ Balinaaba lwa bhali mwi booma ɨlya hu Ikoniya, bhahatʉʉha mu nyumba ɨya puutile na manyiilile ɨya Bhayahuudi, nanshi amiiho gaabho sha gahali. Ʉmwo bhahabhamanyizya abhantu ɨnongwa ɨzya Yeesu hu dandamazu. ABhayahuudi abhinji, peeka na bhantu abhinji bha saga Bhayahuudi bhahamwɨtɨha ʉYeesu. 2 Leelo, aBhayahuudi bhamo bha bhahakhaanile humwɨtɨshe ʉYeesu, bhahanda hubhasonsheelezye bha saga Bhayahuudi huje, bhabhaviitilwe abhooziwa. 3 Hwope ɨsho, ʉPaulo nʉ Balinaaba bhahakhala ɨnsiku zinyinji pa Ikoniya. Bhahabhabhʉzyaga abhantu ɨNongwa ɨNyinza ɨzyɨ mpyana ya Mwɨnɨ ʉYeesu sinta lyoga. ɄMwɨnɨ ahalolesyaga huje, amazwi gaabho gɨ lyoli, hwi dala ɨlya hubhapeele ikhone ɨlya bhombele ɨvimanyishizyo na mayele. 4 Abhantu abha mwi booma liila bhahatapuuhana, bhamo bhahabha hu Bhayahuudi, bhamo bhahabha hu bhasontwa bhabhɨɨlɨ bhaala, ʉPaulo nʉ Balinaaba.

5 Hu malishilo, aBhayahuudi na bhagoosi bhaabho, peeka na bhantu bha saga Bhayahuudi bhahɨtɨɨhana abhabhombele shibhiibhi na hubhakhome na mawe ʉPaulo nʉ Balinaaba. 6 ɄPaulo nʉ Balinaaba lwa bhaamanya ʉlwʉmvwano ʉlwo, bhahashɨmbɨɨlɨla hu mukowa ʉgwa hu Likooniya. Mwʉnʉʉmwo bhahabhala mwi booma ɨlya hu Lisitila, ɨlya hu Deelibe na mu mabooma aganjɨ amapalamani na hu Deelibe. 7 Poponti, bhahabhalʉmbɨlɨlaga abhantu ɨNongwa ɨNyinza ɨzya Yeesu.

8 Mwi booma ɨlya hu Lisitila, hwahali nʉ muntu ʉmo wa halemɨɨye afume apaapwe hwakwe. Ahali nʼemazu wɨ manama, saga ahajendaga nka lumo. 9 ɄPaulo lwa li ayanje, ʉmuntu ʉla wope ahakhɨɨye paala, ahanʼtejelezyaga. ɄPaulo ahamwenya ʉmuntu ʉla hu maaso, ahalola huje, ali nʉ lwɨtɨho lwa lugamʼponia. 10 ɄPaulo ahayanga hwi zwi igoosi ahaga, “Bhʉʉha! Ʉyɨmɨɨlɨle hu manama gaaho!” Ɨpo ʉmuntu ʉla ahɨmɨɨlɨla nalinaali, ahanda ajende yʉʉyo.

11 Ɨmpʉga ɨngoosi yahabhʉngɨɨne paala. Ɨmpʉga ɨyo lwa yanʼola ʉPaulo sha wamʼponia ʉmuntu ʉla, yahanda abwaje mu njango yaabho ɨyɨ Shilikooniya yahagaga, “Abhangʉlʉbhɨ bhatɨnzɨɨye hu holanyo zya bhantu!” 12 Bhahabhapeela amataawa ga bhangʉlʉbhɨ bhaabho. ɄBalinaaba bhahaga yʉ Zewu. ɄPaulo bhahanʼtaha itaawa ɨlya Heelime* Mu bhangʉlʉbhɨ bha Bhayunaani, ʉZewu ahali nʼgoosi ashɨle abhamwabho bhonti, wope ʉHelime ahatwalaga ɨnongwa. hu nongwa ya je, ʉPaulo ahayangaga tee. 13 Ɨnyumba ɨmfinjile ɨya Zewu yahali hwʉnzɨ yi booma. Ɨpo ʉnʼsayi ʉwa Zewu ahaleeta ɨhambakʉ zibhɨɨlɨ nɨ vyʉbhalo vya bhahatabhile nʉ weezya pi lyango li booma. Ʉnʼsayi ʉyo peeka na bhantu bhahanzaga hubhabhoolele ʉPaulo nʉ Balinaaba ɨngʼombe ɨzyo ɨhambakʉ zibhe nsangu.

14 Leelo, abhasontwa ɨbho ʉBalinaaba nʉ Paulo lwa bhʉmvwa ɨzyo, bhahazembula amenda gaabho abhonesye sha bhavitiilwe. Bhahashɨmbɨla, bhahatʉʉha mu mpʉga ɨya bhantu, bhahonjela ayanje bhahaga, 15 “Mubhantu amwɨ! Yeenu mubhomba ɨshi? Natɨ tili bhantu nanshi amwɨ! Tilɨɨho ɨpa alʉmbɨɨlɨle ɨNongwa ɨNyinza ɨzya Yeesu huje, muleshe apuute abhangʉlʉbhɨ abhɨ shaana, mubhe bhantu bha Ngʉlʉbhɨ ʉwa nalyoli. Ʉmwene yʉʉyo ya hapelile ɨmwanya nɨ nsi, ɨnsʉmbi, na vyonti vya vili mu nsi ʉmu. 16 Ɨmandɨ ʉNgʉlʉbhɨ ahabhaleshile abhantu bhonti bha saga Bhayahuudi bhajendelelaje abhombe zyonti zya bhahwanza bhɨɨbho. 17 Hwope, saga ahalehaga abhonesye huje, ali peeka naamwɨ. Ʉmwene ahabhabhombelaga aminza hwi dala ɨlya hubhapeele ɨmvula huje, mubhanje nɨ viyabho hu habhaazyo ha hakhondɨɨye, nantele mubhanje nɨ shalye ɨsha kwɨlane. Gope amooyo geenyu gahashanga.” 18 Leelo, ʉPaulo nʉ Balinaaba bhahayanjile amazwi ɨgo na hubhakhaane abhantu huje, bhasahafumyaje ɨnsangu hwa bheene, hwope hwahali hukhome hubhakhaane.

19 Pitagaalila bhahɨnza aBhayahuudi bhamo bha bhahafumile hu mabooma aga hu Antiyokiya na hu Ikoniya. Bhahabhasonsheelezya abhantu bhabhe peeka nabho, bhonti bhahanʼkhoma ʉPaulo na mawe. Bhahanʼdendemula, bhahanʼtwala hwʉnzɨ yi booma, pɨpo bhahasɨɨbhaga huje, afwiye. 20 Leelo, abhooziwa bha bhahali paala lwa bhahanʼzyʉngʉʉla, ahazingimuha, ahaweela mwi booma. Lwa hwasha, ahasogola paala, ahabhala peeka nʉ Balinaaba hwi booma ɨlya hu Deelibe.

21 ɄPaulo nʉ Balinaaba lwa bhali mu Deelibe, bhahalʉmbɨlɨlaga abhantu ɨNongwa ɨNyinza ɨzya Yeesu, abhinji bhahabha bhooziwa. Pitagaalila bhahaweela hu mabooma aga hu Lisitila, hu Ikoniya, na hu Antiyokiya hu mukowa ʉgwa hu Pisidiya. 22 Ʉhwo, poponti pa bhahabhalaga, bhahabhajinjizyaga amooyo abhooziwa, bhahabhamanyizyaga huje, bhadandamalaje mu lwɨtɨho. Bhahabhabhʉzyaga huje, “Atʉʉshe mu wumwɨnɨ wa Ngʉlʉbhɨ, tihwanziwa ashɨlɨle mu malabha aminji.” 23 Mu shila shibhanza ʉPaulo nʉ Balinaaba bhahabhasaluuye abhagoosi bha hushenyeelezye. Bhahabhabhɨɨhaga hu mpuuto na hwiyiime alye hwa Mwɨnɨ ʉYeesu, wa bhahamwɨtɨɨshe.

24 Pitagaalila ʉPaulo nʉ Balinaaba bhahashɨla mu mukowa ʉgwo ʉgwa hu Pisidiya, bhahatʉʉha mu mukowa ʉgwa hu Pamfiliya. 25 Bhahafiha hwi booma ɨlya hu Pelige. Ʉhwo bhahamanyizya ɨNongwa ɨNyinza ɨzya Yeesu Kilisiti. Ɨpo bhahabhala mwi booma ɨlya hu Taliya. 26 Afume ɨpo bhahashʉʉla nɨ meeli, bhahaweela hwi booma ɨlya hu Antiyokiya ɨlya mu mukowa ʉgwa hu Siiliya. Ʉhwo abhooziwa hwa bhahabhaputiiye ʉPaulo nʉ Balinaaba ɨmpyana ya Ngʉlʉbhɨ hu mbombo ɨla, ya bhahabha bhamalile huyibhombe. 27 Lwa bhaafiha hu Antiyokiya, bhahabhabhʉngaanya abhantu abhɨ shibhanza. Bhahabhabhʉʉzya zyonti ɨzyo ʉNgʉlʉbhɨ zya habhombile ashɨlɨle hwa bheene. Nantele, bhahabhabhʉʉzya shiila sha habhiguliiye bha saga Bhayahuudi ʉlyango ʉgwa humwɨtɨshe ʉYeesu. 28 Bhahakhala ɨnsiku zinyinji pa Antiyokiya peeka na bhooziwa.