1 Ʉvwalanganu wuula lwa wamaliha hu Efeeso, ʉPaulo ahabhabhʉngaanya abhooziwa bha huula. Ahabhajinjizya amooyo, ahalagana nabho, ahasogola, ahabhala hu mukowa ʉgwa hu Makedoniya. 2 Ahashɨla mu mukowa ʉgwo, ahabhabhʉzyaga abhooziwa amazwi gaminji aga hubhajinjizye amooyo. Pamandɨ ahafiha mu nsi ɨya hu Bhayunaani.* Ɨnsi ɨya hu Bhayunaani litaawa lyɨnjɨ lyɨ mukowa ʉgwa hu Akaaya. 3 Ʉhwo ahakhala ameezi gataatu. Hu habhaazyo ɨho ahahwilɨnganyaaga aje, abhale hu mukowa ʉgwa hu Siiliya hwi dala lyɨ meeli. Leelo ahamanya huje, aBhayahuudi bhamo bhahunʼsɨbhɨɨlɨla humʼombe shibhiibhi hu habhaazyo ha shʉʉla. Ɨpo ahajenda lwɨ manama aweele, ahashɨlɨla hu Makedoniya. 4 Hu habhaazyo ɨho, ʉPaulo ahashʉʉlɨle peeka nʉ Sopaatulo ʉmwana wa Piilo ʉwa hu Belooya, ʉAlisitaaluko nʉ Sekundo abha hu Tesaloniike, ʉGaayo ʉwa hu Deelibe, ʉTiimoti ʉwa hu Lisitila, nʉ Tikiiko nʉ Tuloofimo abha hu Aasiya. 5 Ɨbho bhonti bhahatitagaalila, bhahabhala hutigʉʉlɨle mwi booma ɨlya hu Tolowa. 6 Ahabhaazyo ahɨ chaaka ɨya Lye ɨNtogito Zya Saga Zisapile Lwonti lwa hamaliha, atɨ tahasogola ʉhwu hwi booma ɨlya hu Filiipi hwi dala lyɨ meeli. Ɨpo tahashʉʉla mu nsʉmbi ɨnsiku zisaanu, tahafiha hu Tolowa. Ʉhwo hwa tahakhomaana na bhamwetu bha bhahatagaliiye, tahakhala ɨnsiku pʉnga (7).

7 Pi siku ɨlya pa Mulʉngʉ nalyabheela† pa Mulʉngʉ nalyabheela Ɨnsimbo ɨzyɨnjɨ ziyanga pa Shiyeeluka. lwa lyafiha, tahabhʉngaana huje, tilye peeka ɨShalye Sha Mwɨnɨ. ɄPaulo ahanda abhalʉmbɨɨlɨle abhantu, ahajendeelela, ahafiha nʉsiku paahati, pɨpo ahanzaga asogole ɨndaabhɨ yaakwe. 8 Mu mpanda ɨya humwanya mu nyumba ɨnjeleehanye ʉmwo tahabhʉngɨɨne, mwahali ni lyoto haani, pɨpo mwahahaga ɨhozyo zinyinji. 9 Ʉnʼsahaala ʉmo, itaawa lyakwe ahali yʉ Yeetiko ahakhɨɨye pi diliisha ɨlya hu mpanda. ɄPaulo lwa hajendelelaga ayanje hu habhaazyo ahatali haani, ʉYeetiko ahanda asʉpeele hashe hashe, ahagona ʉtulo. Lwa li mu tulo haani, ahagwɨla hwʉnzɨ afume pi diliisha lyɨ nyumba ɨnjeleehanye ɨya taatu. Abhantu lwa bhahumʼʉʉsya, bhahega afwiye. 10 Ɨshi ʉPaulo ahiiha pansi, ahasugamila pa nʼsahaala ʉla, ahamʼpagatila, ahabhabhʉʉzya abhantu ahaga, “Musahoogope, ʉnʉ mwʉmi lwene!” 11 Ɨpo ʉPaulo ahazʉbha nantele hu mpanda ɨla, bhahalya ɨshalye, nantele bhahalya peeka ɨShalye Sha Mwɨnɨ. Ahajendeelela alʉmbɨɨlɨle hu habhaazyo ahatali afishe lwa hwasha, ɨpo ahasogola. 12 Abhantu bhaala bhahasha haani, bhahanʼoleezya ʉnʼsahaala ʉla hu khaaya, sha li mwʉmi.

13 ɄPaulo ahamuuye ashʉʉle abhale mwi booma ɨlya hu Aasosi. Ahanzaga huje, timwaje ʉhwo, nka timweje nɨ meeli. Ɨpo atɨ tahatagaalila abhale hwi booma ɨlyo nɨ meeli. 14 Lwa watangaana naatɨ hu Aasosi huula, tahamwega mu meeli, tahabhala peeka hwi booma ɨlya hu Miteleene. 15 Isiku ɨlya bhɨɨlɨ tahajendeelela ashʉʉle nɨ meeli, tahapalamila panshɨnjɨ yɨ nsi ɨya hu Kiiyo ɨyo yahali paahati pa nsʉmbi. Isiku ɨlya taatu tahafiha mu nsi ɨya hu Saamo ɨyo yahali paahati pa nsʉmbi. Isiku ɨlya wunɨ tahafiha mwi booma ɨlya hu Mileeto. 16 ɄPaulo ahamuuye ashʉʉle nɨ meeli sinta ashɨlɨle hwi booma ɨlya hu Efeeso huje, agandi akhaabhe hu mukowa ʉgwa hu Aasiya. Ahali lubhilo, ahanzaga afishe hwi booma ɨlya hu Yelusaleemu hu habhaazyo ahi siku ɨlyɨ Pentekoositi sha lisɨɨle afishe.

17 ɄPaulo hu habhaazyo lwa li pa Mileeto, ahabhasonteelezya abhantu hubhakwizye abhagoosi bhɨ shibhanza ɨsha hwi booma ɨlya hu Efeeso. 18 Lwa bhaafiha, ahabhabhʉʉzya ahaga, “Amwɨ mumɨɨnye ɨnjendo zyanɨ hu habhaazyo honti ha nahakhalaga naamwɨ, afume isiku lya nahafishile ɨpa pa mukowa ʉgwu ʉgwa hu Aasiya. 19 Nahamʼombelaga ʉMwɨnɨ ʉYeesu hu teehamu wonti, hu mansozi na hu malabha ɨgo gahanaajile hu nongwa yɨ nsɨɨbho ɨmbiibhi ɨzya Bhayahuudi bhamo. 20 Mumɨɨnye huje, lwa nahabhamanyizyaga pa lubhʉngaano ʉlwa bhantu na mu nyumba zyenyu, nahahwifumiizye abhalʉmbɨɨlɨle lyolyonti ɨlyo lyɨnzaga hubhaavwe amwɨ. 21 Nahabhasimishizyaga bhonti, aBhayahuudi na bha saga Bhayahuudi huje, ‘Mulaataje ɨmbiibhi zyenyu, munʼgalushile ʉNgʉlʉbhɨ, na humwɨtɨshe ʉMwɨnɨ weetu ʉYeesu.’

22 Ɨshi tejeelezyi! ɄMʼpepo ʉMʼfinjile andanjiziizye anɨ huje, ɨmbale hwi booma ɨlya hu Yelusaleemu, hwope saga ɨmɨɨnye ɨzyo zyahainaaga ʉhwo. 23 Lyɨ mɨɨnye lwene lya lyɨli. Mu mabooma mwonti mwɨ nshɨla, ʉMʼpepo ʉMʼfinjile andolesiizye huje, ɨhoobhe na malabha vihungʉʉla. 24 Leelo, anɨ saga ɨnsaaga lwonti ʉwʉʉmi waanɨ. Igoosi haani huliinɨ lya lyɨli huje, ɨmale ɨmbombo ya nahapewiilwe nʉ Mwɨnɨ ʉYeesu, ɨmbombo ɨya hubhalʉmbɨɨlɨle abhantu ɨNongwa ɨNyinza ɨzyɨ mpyana ya Ngʉlʉbhɨ.

25 Nahashɨlaga huliimwɨ abhalʉmbɨɨlɨle ɨnongwa ɨzyɨ wumwɨnɨ ʉwa Ngʉlʉbhɨ. Ɨshi leelo tejeelezyi! Ɨmɨɨnye huje, amwɨ mwenti saga mwahaindola nantele dumu. 26 Ɨshi ɨhubhasimishizya mwenti isiku ɨlyɨ leelo ɨli huje, nkashele ʉmuntu waafwa mwaliimwɨ sinta lwɨtɨho, ɨpo saga nɨɨnɨ, lwakwe. 27 Nahahwifumiizye hubhalʉmbɨɨlɨle zyonti ɨzyo ʉNgʉlʉbhɨ zya hasʉbhɨɨye hu kʉndwa waakwe. 28 Muhwidiimaje mwɨmwɨ, na diime yope ɨmpʉga yonti ɨya bhooziwa ɨyo ʉMʼpepo ʉMʼfinjile ya habhabhɨshɨɨye amwɨ mubhe bhenyeelezi. Mushenyaaje shinza ɨshibhanza sha Ngʉlʉbhɨ ɨsho ahashigombʉʉye hwi danda lya Mwana waakwe ʉYeesu. 29 Ɨmɨɨnye huje, lwa nasogola, abhamanyizyi abhi lenga bhahaiyɨnza huliimwɨ. Bhahaibha bhakhali nanshi ɨmbwa ɨzya mwi gona, saga bhahaihuyilolela ɨnkʉmbʉ ɨmpʉga ɨya bhooziwa. 30 Nantele, hwope afume mwaliimwɨ mwɨmwɨ, bhahaifumila abhantu bha bhahaiyangaga ɨnongwa ɨzi lenga huje, bhabhateezye abhooziwa, nka bhabhabhɨnjɨlɨzyaje abheene. 31 Ɨshi lyoli, mubhe maaso na bhantu ɨbho! Izuhaji huje, hu maaha gataatu pasanya na nʉsiku saga nahalitaga hunʼsunde shila muntu, nantele hu mansozi.

32 Ɨhunʼaabha ʉNgʉlʉbhɨ huje, ʉmwene abhasʉngaje na huje, izwi ɨlyɨ mpyana yaakwe libhalongozyaje. Ɨlyo lyɨli ni khone ɨlya hubhajinjizye mu lwɨtɨho na hubhapeele ʉpyano ʉwo ʉNgʉlʉbhɨ wa bhabhɨshɨɨye amwɨ peeka na bhasangalusu abhamwenyu bhonti. 33 Anɨ nka lumo saga nahasʉngwɨlwe ɨmpɨɨya zya muntu wowonti, awe ʉmwenda gwakwe. 34 Amwɨ mumɨɨnye huje, nahabhombaga ɨmbombo hu nyoobhe zyanɨ ɨzi, huvyaje ɨvintu vya vyahanavwaga anɨ na bhamwetu alembe. 35 Mu gonti ɨgo ga nahabhombile, nahabhalolesyaga huje, ɨhwanziwa abhombe ɨmbombo hu dandamazu wonti. Nantele, hwi dala ɨlyo, ɨhwanziwa huje, tibhapeelaje abhapɨɨna. Tizuhaje amazwi ga Mwɨnɨ ʉYeesu yʉʉyo ga hajile, ‘Ɨbho bha bhafumya, bhahwambɨɨlɨla ɨnsayo ɨnyinji ashɨle ɨbho bha bhahwambɨɨlɨla.’ ”

36 ɄPaulo lwa waamala ayanje amazwi ɨgo, ahasugamila pansi peeka na bhagoosi bhaala bhonti, bhahamʼpuuta ʉNgʉlʉbhɨ. 37 Ɨpo bhonti bhahalila haani, bhahanʼyaayila na lagane nawo. 38 Ɨnongwa ɨzyo zya zyahabhabhɨɨshɨle huje, bhazugumile haani, zyahali mazwi ɨgo ga hayanjile huje, “Saga mwahaindola nantele dumu.” Ɨpo bhahanʼoleezya, bhahamʼfisya pa meeli hwi booma ɨlya hu Mileeto.