1 Lwa talagana na bhagoosi bhaala abha hwi booma ɨlya hu Efeeso, tahinjila mu meeli. Ɨpo tahabhala, tahashɨzanya lwene, tahafiha hu Koosi, ɨnsi ya yahali paahati pa nsʉmbi. Lwa hwasha, tahabhala hu Loode, ɨnsi ɨyɨnjɨ ya yahali paahati pa nsʉmbi. Afume ʉhwo, tahabhala nantele, tahafiha hwi booma ɨlya hu Patala. 2 Ɨpo tahayaaga ɨmeeli ɨyɨnjɨ yɨ bhala hu mukowa ʉgwa hu Foyiniike, tahinjila, tahabhala nayo. 3 Lwa tayilola ɨnsi ya yahali paahati pa nsʉmbi, yɨ hwɨtwa Kiipulo, tahayileha ambali ɨya hu mongo. Ɨpo tahajendeelela, tahafiha hu mukowa ʉgwa hu Siiliya. Lwa taafiha mwi booma ɨlya hu Tiilo mu mukowa ʉgwo, tahiiha mu meeli ɨyo. Ɨpo pa pahanziwaaga ahwisye amazigo. 4 Lwa tahagʉʉlaga ɨmeeli lwɨ hwisya amazigo, tahabhaaga abhooziwa abhɨɨpo, tahakhala nabho ɨnsiku pʉnga (7). ɄMʼpepo ʉMʼfinjile ahabhalanga nzɨɨla abhooziwa bhaala amalabha ga gahaihumwaga ʉPaulo hwi booma ɨlya hu Yelusaleemu. Abheene bhahanʼolela ɨnkʉmbʉ, bhahanʼsunda huje, “Ʉsahabhale hu Yelusaleemu!” * ƗShiyunaani shiyiga, Abhooziwa bhaala sha bhalongozewa nʉ Mʼpepo ʉMʼfinjile, bhahamʼʉʉzya ʉPaulo huje, “Ʉsahabhale hwi booma ɨlya hu Yelusaleemu.” Amazwi agɨ lwoli ʉlwu galegana na gɨ lwoli lwɨ Mbombo Zya Bhasontwa 20:22. Ɨshi, ʉMʼpepo ʉMʼfinjile saga agahwikhaana yʉʉyo. Hu nongwa ɨyo abhooziwa bhahamʼʉʉzya ʉPaulo ɨnsɨɨbho zyabho ɨzyɨ nkʉmbʉ huje, asahabhale hu Yelusaleemu, leelo saga yʉ Mʼpepo ʉMʼfinjile wa hayanjile ɨzyo. 5 Leelo, ɨnsiku pʉnga (7) zya khale paala lwa zyamaliha, tahasogola. Abhooziwa bhonti abha mwi booma liila ɨlya hu Tiilo, abhalume, abhashɨ peeka na bhaana bhaabho bhahatiloleezya hwʉnzɨ hwi booma ɨlyo, bhahatifisya panshɨnjɨ pa nsʉmbi. Ɨpo tenti tahasugamila, tahanʼaabha ʉNgʉlʉbhɨ. 6 Lwa talagana nabho, atɨ tahinjila mu meeli ɨyo, bhope bhahaweela humwabho.

7 Tahasogola mu Tiilo, tahajendeelela ashʉʉle, tahafiha hwi booma ɨlya hu Tolemaayi. Tahabhalamuha abhooziwa abhamwetu, tahakhala nabho isiku lyeka. 8 Lwa hwasha, tahasogola, tahabhala hwi booma ɨlya hu Kayisaliiya. Ɨpo tahakhala pa nyumba ya Filipo ʉyo wa hali nʼʉmbɨɨlɨli wɨ Nongwa ɨNyinza ɨzya Yeesu. Ahali weeka mwa bhaavwi bhaala pʉnga (7) bha bhahasaluliilwe hwi booma ɨlya hu Yelusaleemu. Bhaazya ɨMbombo Zya Bhasontwa 6:5. 9 ɄFilipo ahali na bhaana abhalɨndu bhanɨ bha saga bhahegwilwe. Nantele, ʉNgʉlʉbhɨ ahabhapeelile ɨshikʉnjɨlwa ɨsha kuwe.

10 Lwa taakhala ɨnsiku nyishe pa Kayisaliiya, ahɨnza ʉnʼkuwi ʉmo wa Ngʉlʉbhɨ afume hu mukowa ʉgwa hu Yudeeya, itaawa lyakwe ahali yʉ Agaabo. Bhaazya ɨMbombo Zya Bhasontwa 11:28. 11 ɄAgaabo ʉyo ahɨnza hutiseepe. Lwa waafiha, aheega ilamba lya Paulo. Ahahwipinya mu manama na mu makhono gaakwe, ahaga, “ɄMʼpepo ʉMʼfinjile ayanga huje, ‘Ɨshi sha shɨɨsho aBhayahuudi abha hwi booma ɨlya hu Yelusaleemu sha bhahaihumʼpinya ʉmuntu ʉwi lamba ɨli. Nantele, bhahaihumʼɨɨha mu nyoobhe zya bhantu bha saga Bhayahuudi.’ ”

12 Lwa tʉmvwa ɨsho, atɨ peeka na bhooziwa abhamwetu abha hu Kayisaliiya, tahanʼambaga haani ʉPaulo huje, asahabhale hu Yelusaleemu. 13 Leelo, ahataamula ahaga, “Yeenu mubhomba ɨsho, alile na lɨnje hunzugumizye ʉmwoyo gwanɨ hu mansozi? Anɨ saga ɨhwilɨngɨɨnye apinywe mu hoobhe hwene, handɨ na fwe hu Yelusaleemu hu nongwa ya Mwɨnɨ ʉYeesu.” 14 Lwa taalola huje, ʉPaulo saga ahatʉmvwa, tahanʼeha, tahaga, “Zya hwanza ʉMwɨnɨ ʉYeesu, zibhombeshe.”

15 Pamandɨ, taheega amazigo geetu, tahanda ashʉʉle abhale hu Yelusaleemu. 16 Abhooziwa bhamo abha pi booma ɨlya hu Kayisaliiya bhahatiloleezya, bhahatitwala pa nyumba ya Naasoni. Ɨpo tahakhala nawo hu habhaazyo. ɄNaasoni ʉyo ahali muntu wa hu Kiipulo, nantele ahali ʉmo mwa bhooziwa bha Yeesu abha hwande.

17 Lwa taafiha mwi booma ɨlya hu Yelusaleemu, abhooziwa abhʉʉhwo bhahatejeelela hu luseshelo. 18 Lwa hwasha, atɨ nʉ Paulo tahabhala hunʼseepe ʉYaakobo. Bhope abhagoosi abhɨ shibhanza bhonti bhahali paala huje, bhakhomaane naatɨ. 19 ɄPaulo ahabhalamuha bhonti. Ahabhabhʉʉzya gonti ʉNgʉlʉbhɨ ga habhombile hwa bhantu bha saga Bhayahuudi hwi dala ɨlyɨ mbombo yaakwe.

20 Lwa bhʉmvwa ɨgo, bhonti bhahamʼmwamiha ʉNgʉlʉbhɨ. Ɨpo bhahamʼʉʉzya ʉPaulo bhahaga, “Holo weetu, waalola huje, aBhayahuudi abhamwetu ɨelufu zinyinji bhamwɨtɨɨshe ʉYeesu! Nantele, ɨbho bhonti bhahwifumya hu dandamazu akhate ɨndajizyo zya Moose. 21 Bhʉmvwɨzye huje, ʉmanyizya aBhayahuudi bhonti bha bhakhala hu nsi zya saga zya Bhayahuudi huje, bhagandi asaaje ɨndajizyo zya Moose, bhagandi hubhatende ɨngoola ɨzya hwitagaalila ɨzyɨ lume abhaana bhaabho† bhagandi hubhatende ɨngoola ɨzya hwitagaalila ɨzyɨ lume abhaana bhaabho Hwa Bhayahuudi nkashele ʉmwana ʉnʼume apaapwa, isiku ɨlya naana (8) afume apaapwe, bhahanʼtendaga ɨngoola ɨya hwitagaalila ɨyɨ lume abhonesye ʉlufingo hwa Ngʉlʉbhɨ. Bhaazya ʉWandilo (Mwanzo) 17:9-14. na je, bhagandi akhate amiiho geetu gɨ Shiyahuudi. 22 Ɨshi, tibhombe yeenu? ABhayahuudi ɨbho bhonti bhabhala hwʉmvwe huje, ʉyɨnzɨle ɨpa. 23 Ɨshi, ʉbhombe nanshi sha tihubhʉʉzya. Pɨɨpa muuhati yeetu bhalɨɨho abhalume bhanɨ bha bhabhɨɨshɨle ɨmfingo pa maaso ga Ngʉlʉbhɨ. 24 Ʉbhe peeka nabho mu mpuuto ɨzya hwisangalusye. Ʉbhasombele zya zihwanziwa huje, bhasyengule isisi lyabho.‡ bhasyengule isisi lyabho Bhaazya ɨMbombo Zya Bhasontwa 18:18. Ɨsho abhantu bhonti bhabhala manye hu simishizi huje, ɨgo gonti ga bhayanjile, saga gɨ lyoli. Bhabhala manye huje, awe weewe ʉhuzitiniha ɨndajizyo zya Moose. 25 Ɨshi, hwa bha saga Bhayahuudi bha bhamwɨtɨɨshe ʉYeesu, tahabhasimbiiye ɨkalaata hubhabhʉʉzye ʉgamulo lwetu huje, bhasahalye ɨshalye sha bhafumiizye hu mpuuto hwa bhangʉlʉbhɨ bhi lenga, bhasahalye idanda, awe ɨnyama zya bhanionjile, nantele bhagandi abhombe ʉweegu.”

26 Lwa hwasha, ʉPaulo ahabheega abhalume bhaala, ahapuuta ɨmpuuto ɨzya hwisangalusye peeka nabho. Pamandɨ ahatʉʉha mu lubhaga lwɨ nyumba ɨmfinjile ɨya Ngʉlʉbhɨ huje, amʼʉʉzye ʉnʼsayi isiku lya bhahaimala ahwisangalusye hwabho, na fumye ɨnsangu hwa weeka weeka.

27 Ɨnsiku pʉnga (7) ɨzya hwisangalusye lwa zyapalamila amalishe, aBhayahuudi bhamo bha bhahafumile hu mukowa ʉgwa hu Aasiya bhahanʼola ʉPaulo mu lubhaga lwɨ nyumba ɨmfinjile ɨya Ngʉlʉbhɨ. Bhahasonsheelezya ɨmpʉga yonti ɨya bhantu bha bhahali paala, bhahanʼkhata ʉPaulo, 28 bhahanda abwaje huje, “Mubhalume amwɨ mubhɨɨpa pa Izilaeeli, taavwi! Ʉmuntu ʉnʉ ya yʉʉla wa manyizya shila muntu na hwohwonti huje, bhatisyoshelaje tiBhaizilaeeli, bhazisyoshelaje nɨ ndajizyo zya Moose. Nantele bhayisyoshelaje nɨ nyumba ɨmfinjile ɨnɨ ɨya Ngʉlʉbhɨ. Ibhiibhi haani ayilufiizye ɨnyumba ɨmfinjile lwa bhatʉsyaga bha saga Bhayahuudi mu lubhaga ʉlu ʉlwɨ nyumba ɨmfinjile ɨya Ngʉlʉbhɨ.” 29 Bhahayanjile ɨsho, alɨngaane na je, bhahanʼolile ʉTuloofimo ʉwa hu Efeeso wa saga ahali Nʼyahuudi ali peeka nʉ Paulo pa Yelusaleemu. Bhahasɨɨbhaga huje, ʉPaulo anʼtʉsɨɨzye ʉTuloofimo mu lubhaga lwɨ nyumba ɨmfinjile ɨya Ngʉlʉbhɨ.

30 Ɨpo ibooma lyonti ɨlya pa Yelusaleemu lyahabha ni bho. Abhantu bhahɨnza bhashɨmbɨla afume ʉhwu nʉʉhwo, bhahabhʉngaana mu lubhaga lwɨ nyumba ɨmfinjile ɨya Ngʉlʉbhɨ ʉPaulo mwa hali. Bhahanʼgada, bhahanʼdendemulila hwʉnzɨ, bhope abhalɨndɨɨlɨli bhahagalila ɨnyiiji lubhilo. 31 Abhantu ɨbho lwa bhahanʼkhomaga ʉPaulo huje, bhanʼgoje, ɨnongwa zyahamʼfishila ʉnʼtwale wɨ Shiluumi huje, ibooma lyonti ɨlya pa Yelusaleemu limemile libho. 32 Lubhilo lwene ʉnʼtwale ahabheega abhalwi na bhalongozi bhaabho, bhahashɨmbɨla abhale hu mpʉga ya bhantu. Abhantu bhaala lwa bhabhalola abhalwi bhali peeka nʉ nʼtwale waabho, bhahaleha hunʼkhome ʉPaulo.

33 Ʉnʼtwale ʉyo ʉwa bhalwi ahamʼpalamila ʉPaulo, ahanʼkhata, ahalajizya huje, apinywe na manyololo gabhɨɨlɨ. Ɨpo ahabhʉzɨɨlɨzya ahaga, “Yʉ naanu ʉnʉ? Abhombile yeenu?” 34 Lubhilo lwene abhantu bhaala bhahanda abwaje. Bhamo bhahayangaga ɨli, bhamo liila. Ʉnʼtwale wa bhalwi ʉla ahapootwa amanye ga gafumiiye hu nongwa yi bwago. Ahalajizya huje, bhanʼtwale ʉPaulo mwi linga. 35 Abhalwi lwa bhamʼfisya mu ndandalilo ɨyi linga liila, bhahamʼpɨmba alɨngaane na je, hwahali ni bho haani. 36 Abhantu bhaala bhahanʼondolezya ʉPaulo, humo bhabwaga bhahagaga, “Nʼgoje!”

37 Abhalwi bhaala lwa bhahunʼtʉʉsya ʉPaulo mwi linga lyabho, ahamʼʉzɨɨlɨzya ʉnʼtwale waabho ʉla ahaga, “Bhʉlɨ, ɨhondɨɨye ahubhʉʉzye izwi limo?” Ahaamula ahaga, “Oogo! Fwandi nawe ʉmɨɨnye ayanje ɨShiyunaani! 38 Bhʉlɨ, awe saga ʉli Mʼmiisili ʉla wa haleetaga ibho na hubhatwale abhanyambuda elufu zinɨ pi gona?” 39 ɄPaulo ahaamula ahaga, “Anɨ ɨndi Nʼyahuudi, nahapapiilwe mwi booma igoosi ɨlya hu Taaso mu mukowa ʉgwa hu Kilikiya. Ɨhulaabha ʉndeshe ɨnjanje na bhantu ɨbha.” 40 Ʉnʼtwale ʉwa bhalwi ʉla lwa wamwɨtɨshɨla, ʉPaulo ahɨmɨɨlɨla mu ndandalilo ɨla, ahavwenzya ʉnʼkhono hwa bhantu bhaala huje, bhapʉʉme. Bhonti bhahapʉʉma, ahayanga nabho mu njango yaabho ɨyɨ Shiebulaniya.