22
ɄPaulo ahabhabhʉʉzya ahaga, “Mwɨ bhaholo bhaanɨ namwɨ mubhayise bhaanɨ, ntejeelezyi! Ntejeelezyi lwɨ hwiyʉʉmɨla pilongolela lyenyu.” Abhantu bhaala lwa bhahamwʉmvwa ʉPaulo ayanga mu njango yaabho ɨyɨ Shiebulaniya, bhahonjela apʉʉme myɨ. Ɨpo ʉPaulo ahajendeelela hubhabhʉʉzye ahaga, “Anɨ ɨndi Nʼyahuudi, nahapapiilwe mwi booma ɨlya hu Taaso mu mukowa ʉgwa hu Kilikiya. Leelo, ɨnkuliiye pɨɨpa pa Yelusaleemu. ɄGamaliyeeli ahali mʼmanyizyi waanɨ mwinza ʉwɨ ndajizyo zyonti ɨzyo bhahatileshiiye abhamaama bheetu. Nahahwifumiizye hu dandamazu wonti hwa Ngʉlʉbhɨ, nanshi amwɨ sha muhwifumiizye hu dandamazu sanyʉʉnʉ.
Nahabhalaviizye tee abhooziwa, bhamo nahabhabudaga. Nahabhakhataga, nantele nahabhakʉngaga mu hoobhe sinta asaaje aje, nʼume awe nʼshɨ. Ʉnʼsayi ʉnʼgoosi ʉwa Ngʉlʉbhɨ peeka ni koloti lyonti ɨlya bhagoosi bhangasimishizya aje, ɨzi zyɨ yanga zyɨ nalyoli. Abheene bhahampiiye ɨkalaata huje, ɨmbatwalile abhalongozi bheetu tiBhayahuudi abha hwi booma ɨlya hu Damesiki. Nkɨ mbale ʉhwo, ɨmbakhate na hubhapinye abhooziwa na hubhaleete hwi booma ɨlya hu Yelusaleemu huje, bhafundwe.
Isiku limo lwɨ mpalamiiye afishe hu Damesiki, yahali mu saala nʼtanda ɨya pasanya ɨshi, lubhilo lwene, ʉnʼkhozyo ʉnʼgoosi gwa guzeluupe tee afume hu mwanya gwahankhozya afume ɨmbali zyonti. Nahagwa pansi, nahʉmvwa izwi lihumbʉʉzya liyiga, ‘Sauli! Sauli! Yeenu ʉhundavya?’ Nahabhʉzɨɨlɨzya nahaga, ‘Awe we naanu Mwɨnɨ?’ Lyope lyahaga, ‘Anɨ nɨ Yeesu ʉwa hu Nazaleeti, wʉ hundavya.’ Abhamwetu bha tahashʉʉlaga peeka, bhahagulolile ʉnʼkhozyo, lyope izwi bhahalyʉmvwɨzye, leelo saga bhahalyagɨɨnye. 10 Nahabhʉzɨɨlɨzya nahaga, ‘Ɨshi Mwɨnɨ, ʉhwanza aje, ɨmbombe yeenu?’ ɄMwɨnɨ ahanaamula ahaga, ‘Ɨmɨɨlɨla, ʉtʉʉshe mu Damesiki. Ʉmwo ʉnza humwaje ʉmuntu ʉmo wa bhala hubhʉʉzye ɨmbombo zyonti zyʉ hwanziwa abhombe.’ 11 Ɨpo nahapootwa alole hu nongwa ya je, ʉnʼkhozyo gwahali nʼzelu tee. Abhamwetu bhahahata ʉnʼkhono, bhahandongola afishe mwi booma ɨlya hu Damesiki.
12 Ʉhwo hwahali nʉ muntu ʉmo wa hanʼtinihaga ʉNgʉlʉbhɨ. Itaawa lyakwe ahali yʉ Ananiya. Ʉmuntu ʉyo ahazilondolezyaga tee ɨndajizyo zyetu ɨzyɨ Shiyahuudi, nantele ahayangwaga shinza na Bhayahuudi bha bhahakhalaga hu Damesiki. 13 Ahɨnza, ahɨmɨɨlɨla panshɨnjɨ paliinɨ, ahambʉʉzya ahaga, ‘Sauli holo waanɨ, ʉyande alole nantele.’ Lubhilo lwene amaaso gaanɨ gahiiguha, gahanda alole nantele, nahanʼola.
14 Ɨpo ʉAnaniya ahambʉʉzya ahaga, ‘ɄNgʉlʉbhɨ wa bhamaama bheetu ahusaluuye awe huje, ʉmanye zya hwanza ʉmwene na hunʼole Ʉla Wa Li Nʼgolosu na tejeelezye amazwi afume hwa mwene ʉNʼgolosu. 15 Nantele, ʉbhala bhe nʼsimishizi waakwe hwa bhantu bhonti, hwɨgo gʉ galolile na hugʉmvwe afume hwa mwene. 16 Ɨshi leelo, ɨmɨɨlɨla, ʉgandi akhaabhe! Ʉyooziwe na khobhoshelwe ɨmbiibhi zyaho hwi dala ɨlya hunʼsʉʉbhɨle ʉMwɨnɨ ʉYeesu.’
17 Ɨshi lwa nooziwa, nahaweela hu Yelusaleemu. Lwa nahapuutaga mu nyumba ɨmfinjile ɨya Ngʉlʉbhɨ, nahalola ɨndoleshelo. 18 Mu ndoleshelo ɨyo, nahanʼola ʉMwɨnɨ ʉYeesu, ahambʉʉzya ahaga, ‘Lubhilo! Ʉsogole ɨpa pa Yelusaleemu, pɨpo abhantu abha pi booma ɨli saga bhahaihwɨtɨha ʉsimishizi waaho hu nongwa yaanɨ.’ 19 Nahamwamula nahaga, ‘Mwɨnɨ, abheene bhamɨɨnye shinza huje, nahashɨlaga mu nyumba ɨzya puutile na manyiilile, nahabhakhomaga na hubhakʉnje mu hoobhe bhonti bha bhahali nʉ lwɨtɨho hwaliiwe! 20 Hu habhaazyo ɨho ʉnʼsimishizi waaho ʉSiteefano lwa hagogwaga, nanɨ nahɨtɨɨshe aje, agogwe. Nantele nahabhenyelezyaga abhagoji amagolole gaabho.’ 21 Ɨpo ʉMwɨnɨ ahambʉʉzya ahaga, ‘Bhalaga, pɨpo ɨmbala husonteelezye ʉhutali hwa bhantu bha saga Bhayahuudi.’ ”
ɄPaulo ahwimanyisya huje, wope Nʼuumi
22 Ɨshi, ɨmpʉga ɨya bhantu bhaala yahabha ɨhunʼtejeelezya ʉPaulo. Leelo lwa wayanga amazwi ɨga aje, ʉNgʉlʉbhɨ anʼsonteleziizye hwa bhantu bha saga Bhayahuudi, bhahanda abwaje bhahaga, “Ʉmuntu ʉnʉ ahwanziwa afwe! Saga akhondɨɨye huje, alembaje mu nsi!” 23 Bhahajendeelela abwaje, bhahabhʉsyaga amagolole gaabho humwanya, nantele bhahatukusyaga amankondi. 24 Ʉnʼtwale ʉla ahabhalajizya abhalwi bhaakwe huje, bhanʼtwale ʉPaulo mwi linga ɨlya bhalwi. Ʉhwo bhanʼshete nɨ nsanzʉ aje, ayanje lya libhombile huje, abhantu bhamʼbwajile ɨsho. 25 Abhalwi lwa bhamʼpinya ʉPaulo nɨ nkusa huje, bhanʼshete, ʉPaulo ahamʼʉzɨɨlɨzya ʉnʼongozi waabho wa hɨmɨlɨɨye paala, ahaga, “Wɨlɨ, mu ndajizyo zyenyu, ɨhwanziwa hunʼshete ʉNʼuumi sinta alongwe ɨnongwa yaakwe?”
26 Ʉnʼongozi ʉwa bhalwi ʉla lwa wʉmvwa ɨzyo, ahabhala, ahamʼʉʉzya ʉnʼgoosi waakwe ahaga, “Ʉhwanza abhombe yeenu? Ʉmuntu ʉnʉ Nʼuumi!” 27 Ɨpo ʉnʼtwale ahabhala, ahamʼʉzɨɨlɨzya ʉPaulo ahaga, “Ɨshi mbʉʉzye! Wɨlɨ, awe ʉli Nʼuumi?” ɄPaulo ahamwamula ahaga, “Ena, ɨndi Nʼuumi.” 28 Ɨpo ʉnʼtwale ahaga, “Anɨ ɨndi Nʼuumi, pɨpo nahawukalile ʉkhaaya hu mpɨɨya ɨnyinji tee.” ɄPaulo ahaga, “Anɨ ɨndi Nʼuumi wa paapwe.” * ɄPaulo ahali wɨ shikholo sha Bhayahuudi. Nantele ahali nʼkhaaya ʉwa paapwe ʉwɨ nsi ɨya hu Luumi.
29 Abhalwi bha bhahanzaga humʼʉzɨɨlɨzye hwi dala ɨlya hunʼkhome ʉPaulo, lwa bhʉmvwa, bhahasogola lubhilo. Wope ʉnʼtwale ahogʉʉpe tee lwa waamanya aje, ʉPaulo Nʼuumi, pɨpo ahamʼpinyile na manyololo. Bhaazya ɨMbombo Zya Bhasontwa 16:37.
ɄPaulo pilongolela li koloti
30 Ɨndaabhɨ yaakwe, ʉnʼtwale ahanzaga huje, amanye shinza zya zyahamʼombile ʉPaulo aje, ataakiwe na Bhayahuudi. Ɨpo ahabhalajizya huje, bhamwawule amanyololo. Ahabhalajizya abhalongozi bha bhasayi bha Ngʉlʉbhɨ ni koloti lyonti huje, bhakhomaane. Ahanʼkwizya ʉPaulo, ahamwɨmɨɨlɨsya pilongolela lyabho.

*22:28 ɄPaulo ahali wɨ shikholo sha Bhayahuudi. Nantele ahali nʼkhaaya ʉwa paapwe ʉwɨ nsi ɨya hu Luumi.

22:29 Bhaazya ɨMbombo Zya Bhasontwa 16:37.