1 Lwa zyashɨla ɨnsiku zisaanu, ʉnʼsayi ʉnʼgoosi ʉAnaniya ahafiha hwi booma ɨlya hu Kayisaliiya. Ahafiha peeka na bhagoosi bhamo bha Bhayahuudi nʉ muntu weeka ʉmwemeelezi, itaawa lyakwe ahali yʉ Teetulo. Bhahabhala humʼʉʉzye ʉnʼgoosi wɨ mukowa ʉFeeliki wa hali Nʼuumi ɨnongwa zya bhahanʼtakilaga ʉPaulo. 2 Ɨpo ʉPaulo ahakwiziiwa mwi koloti. ɄTeetulo ahanda ayanje amazwi aga hunʼtaake ʉPaulo ahaga, “Awe Feeliki ʉwɨ nshɨnshɨ, ʉlongozi waaho ʉwinza wataavwa aje, tiseshelaje ʉtengaanu ʉgoosi mu nsiku zyonti ɨzi. Nantele wefwizye ɨmbiibhi mu nsi ɨnɨ. 3 Tihuzyejeelela ɨzyo zyonti hu luseshelo wiila na hwi dala lyolyonti, na fumye ɨnsalifyo ɨnyinji hwaliiwe poponti paala. 4 Ɨshi saga ɨhwanza huje, ɨllisye ahabhaazyo ahatali haani. Ɨhulamba huje, ʉtitejeelezye hu jimbiilizu amazwi geetu mashe.

5 Ʉmuntu ʉnʉ, tahanʼolile huje, mwandiilizi haani. Aleeta ibho hu Bhayahuudi abhɨ nsi zyonti. Ʉmwene yʉ nʼgoosi ʉwɨ mpuuto yi lenga ɨya Bhanazaleeti.* ɨmpuuto yi lenga ɨya Bhanazaleeti Abhantu bha bhahamʼɨnjɨlɨlaga ʉYeesu bhahakwiziwaaga Bhanazaleeti, pɨpo ʉYeesu ahali wa hu Nazaleeti. ABhayahuudi bhahashilolaga ɨshipʉga ɨsho aje, shi lenga. 6 Nantele ahanzaga abhɨɨshe ʉwaavu mu lubhaga lwɨ nyumba ɨmfinjile ɨya Ngʉlʉbhɨ, ɨpo tahamʼmena, tahanʼkhata. Tahanzaga aje, tinʼonje alɨngaane nɨ ndajizyo zyetu, 7 leelo ʉnʼtwale ʉLiisiya ahɨnza na bhalwi abhinji, ahamʼfyʉla hwaliitɨ hwi khone. 8 Ahabhalajizya bhaala bha bhanʼtaakile huje, bhɨnze bhanʼtaake hwaliiwe.# Amazwi agɨ lwoli lwɨ nʼtanda afishe ɨpa mu lwoli lwɨ naana (24:6b-8a) saga galɨɨho mu nsimbo zimo ɨzyɨ mandɨ ɨzyɨ Shiyunaani. Hwope awe nkashele ʉhumʼʉzɨɨlɨzya, ʉbhala manye huje, ɨnongwa zyonti ɨzi zya tihunʼtaakila hwaliiwe zyɨ lyoli.” 9 ABhayahuudi bhonti bha bhahali paala bhahabhʉngaana, bhahasimishizyaga ɨnongwa zya hayangaga ʉTeetulo, bhahagaga, “Ɨzyo zyonti zyɨ lyoli.”

10 Ɨpo ʉnʼgoosi wɨ mukowa ʉFeeliki ahamwɨtɨshɨla wope ʉPaulo huje, ayanje. ɄPaulo ahanda ahwiyʉʉmɨle ahaga, “Naasha ahwiyʉʉmɨle pitagaalila lyaho hu nongwa ya je, ʉli witongwa ʉwɨ maaha aminji mu nsi ɨnɨ. 11 Weewe ʉgasimishizya shinza huje, zishɨlɨle ɨnsiku ishʉmi na zibhɨɨlɨ lwene, afume lwa nahabhalile hu Yelusaleemu humʼpuute ʉNgʉlʉbhɨ. 12 Abhantu ɨbha bha bhahuntaaka saga bhahanaajile ɨnjeehana nʉ muntu nka weeka. Saga bhahandolile lwɨ mbasonzanya abhantu mu lubhaga lwɨ nyumba ɨmfinjile ɨya Ngʉlʉbhɨ, awe mu nyumba ɨzya puutile na manyiilile, awe apanjɨ poponti paala mwi booma. 13 Hwope saga bhabhajiiye lwonti asimishizye hu nongwa ɨnɨ ya bhantaakile.

14 Lyoli, lyɨ hwɨtɨha pitagaalila lyaho lya lyɨli huje, ɨhuzilondolezya ɨmpuuto abheene zya bhayiga mpuuto zi lenga. Leelo hwi dala ɨlyo ɨlya hunʼondolezye ʉMwɨnɨ ʉYeesu, ɨhumʼpuuta ʉNgʉlʉbhɨ ʉwa bhamaama bheetu. Peeka nɨɨzyo, ɨhuzyɨtɨha zyonti zya zili mu ndajizyo zya Moose, na zya zyahasimbwilwe mu vitaabu ɨvya bhakuwi bha Ngʉlʉbhɨ abhɨ mandɨ. 15 Anɨ ɨmbɨɨshɨle ʉlusʉʉbhɨlo lwanɨ hwa Ngʉlʉbhɨ, nanshi ɨbha bhope sha bhabhɨɨshɨle ʉlusʉʉbhɨlo hwa Ngʉlʉbhɨ huje, ʉNgʉlʉbhɨ ahaihubhazyʉsya abhafwe bhonti, abhagolosu na bhabhomba mbiibhi. 16 Sha shɨɨsho ɨhwifumya abhombe ɨnyinza ɨnsiku zyonti huje, lisahabhe ɨlya hundeetele ɨnsoni pa maaso ga Ngʉlʉbhɨ na pa maaso ga bhantu.

17 Lwa naakhala amaaha aminji ʉhutali, nahaweela hu Yelusaleemu huje, ɨntwale ɨvintu vya vigabhaavwa abhapɨɨna, na fumye ɨnsangu hwa Ngʉlʉbhɨ. 18 Ɨshi, abhantu ɨbha bhahanaaga mu lubhaga lwɨ nyumba ɨmfinjile ɨya Ngʉlʉbhɨ lwɨ malile ɨmpuuto ɨya hwisangalusye. Lyoli saga nahatʉʉhaga ʉmwo nɨ mpʉga ya bhantu, lyope ibho saga lyahali. 19 Leelo, bhahali aBhayahuudi bhamo bha bhahafumile hu mukowa ʉgwa hu Aasiya. Ɨbho bha bhagakhondela abhe pitagaalila lyaho ɨpa afumye amasitaaka gaabho, nkashele bhali ni zwi lyolyonti ɨlya huntaake. 20 Bhope ɨbha bha bhali ɨpa, bhayanje bhɨɨbho ʉbhiibhi wowonti wa bhahawulolile hwaliinɨ, lwa nahɨmɨlɨɨye pilongolela li koloti lyabho igoosi. 21 Jibha bhahunʼtaaka hu nongwa ya je, nahayanjile hwi zwi igoosi pitagaalila lyabho huje, ‘Muhuntaaka ɨleelo, pɨpo ɨhwɨtɨha aje, abhafwe bhahaizyʉha.’ ”

22 Ɨshi ʉFeeliki ahagonezya ɨnongwa ɨla, pɨpo ahamɨɨnye shinza ɨnongwa ɨzya Mwɨnɨ ʉYeesu. Ahabhabhʉʉzya ahaga, “Nahaifumya ʉgamulo lwɨ nongwa yeenyu, lwa wɨnza ɨpa ʉnʼtwale ʉLiisiya.” 23 Ɨpo ʉFeeliki ahanʼajizya ʉnʼongozi ʉwa bhalwi huje, bhanʼɨndɨlɨlaje ʉPaulo, leelo bhanʼsatule amanyololo. Nantele, bhagandi hubhakhaane abhamanyani bhaakwe humʼpeele vya hwanza.

24 Ɨshi, ɨnsiku nyishe lwa zyashɨla, ʉFeeliki ahɨnza peeka nʉ nʼshɨ waakwe ʉDulusiila wa hali Nʼyahuudi. Ɨpo ahalajizya huje, bhanʼeete ʉPaulo. ɄPaulo lwa waafiha, ahanda hubhabhʉʉzye ɨnongwa ɨzya humwɨtɨshe ʉYeesu Kilisiti. 25 Leelo lwa hajendelelaga hubhabhʉʉzye zyonti hu nongwa yɨ golosu, ahwikhaane abhombe ɨmbiibhi na je, ʉNgʉlʉbhɨ alibhɨɨshɨle isiku lya haibhalonga abhantu, ʉFeeliki ahogʉʉpe tee. Ɨpo ahamʼʉʉzya ʉPaulo ahaga, “Ɨshi sogola! Nahaihukwizya nantele, nkashele nahaibha na habhaazyo.” 26 Pamandɨ ʉFeeliki ahajendelelaga hunʼkwizye ʉPaulo hahinji huje, ayangaje nawo, pɨpo ahasʉbhɨlaga aje, ʉPaulo agamʼpeela ɨmpɨɨya.

27 Lwa gaashɨla amaaha gabhɨɨlɨ, ʉPolikiiyo Feesito ahapyanila alongozye pa longozi wa Feeliki. Ɨshi ʉFeeliki ahanʼeha ʉPaulo mu hoobhe alɨngaane na je, ahanzaga ahwikhondeezye hwa Bhayahuudi.