25
ɄPaulo pilongolela lya Feesito
ɄFeesito lwa waafiha hwi booma ɨlya hu Kayisaliiya, ahanda alongozye ʉmukowa ʉgwa hu Yudeeya. Ɨnsiku zitaatu lwa zyashɨla, ahashʉʉla, ahabhala hwi booma ɨlya hu Yelusaleemu. Ɨshi hu habhaazyo lwa li ʉhwo, abhalongozi bha bhasayi bha Ngʉlʉbhɨ peeka na bhagoosi bhamo bha Bhayahuudi bhahabhala humʼʉʉzye gonti ga bhanʼtaakile ʉPaulo. Bhahanʼambaga haani bhahagaga, “Ʉtɨtɨshɨle aje, ʉPaulo atwalwe hwi booma ɨlya hu Yelusaleemu.” Bhahanʼambaga ɨsho, pɨpo abheene bhahɨtɨhɨɨne humwʉbhɨle na hunʼgoje ʉPaulo mwi dala. Wope ʉFeesito ahabhaamula ahaga, “ɄPaulo ahaijendeelela alɨndɨɨlɨlwe na bhalɨndɨɨlɨli mwi linga hwi booma ɨlya hu Kayisaliiya. Nanɨ ɨmbala galushe ʉhwo shɨɨshi lwene. Ɨshi musalule abhalongozi bheenyu bhamo huje, ɨngalushe peeka nabho ʉhwo. Bhafumye ʉsimishizi waabho, nkashele huli ni bhiibhi lyolyonti ɨlyo ʉPaulo lya habhombile, nkɨ manye.”
ɄFeesito ʉnʼongozi wɨ mukowa lwa waakhala hu Yelusaleemu ɨnsiku zya saga zyahashɨlɨle naana (8) awe ishʉmi, ahabhala hu Kayisaliiya. Ɨndaabhɨ yaakwe ahakhala pi tengo lyakwe ɨlya lonjele ɨnongwa. Ɨpo ahabhalajizya abhalwi huje, bhanʼeete ʉPaulo pitagaalila lyakwe. ɄPaulo lwa waafiha mwi koloti muula, ahabhaaga aBhayahuudi bha bhɨnzɨle afume hu Yelusaleemu, bhahanʼzyʉngʉʉla. Bhahanʼtaakaga ɨmbiibhi ɨnyinji, zyope bhahapotwaga huzisimishizye.
Ɨpo ʉPaulo ahanda ahwiyʉʉmɨle ahaga, “Anɨ saga ɨntulile nka zimo hu nongwa yɨ ndajizyo zyetu tiBhayahuudi awe hu nongwa yɨ nyumba ɨmfinjile ɨya Ngʉlʉbhɨ, awe hu nongwa ya mwɨnɨ ʉnʼgoosi ʉKayisali.”
Leelo ʉFeesito ʉmwene ahanzaga hubhasʉngwɨzye aBhayahuudi, ahamʼʉzɨɨlɨzya ʉPaulo ahaga, “Bhʉlɨ, ʉgɨɨtɨha aje, ʉbhale hu Yelusaleemu alongwe na bhantu ɨbha pitagaalila lyanɨ hu nongwa ɨnɨ?”
10 ɄPaulo ahamwamula ahaga, “Ndaadi, anɨ saga ɨhwɨtɨha aje, ɨmbale hu Yelusaleemu. Ɨshi, ɨnɨmɨlɨɨye pitagaalila li tengo ɨlya witongwa wa bhɨhwɨlwe nʉ mwɨnɨ ʉnʼgoosi ʉKayisali. Pɨɨpa pɨ hondɨɨye alongwe alɨngaane nɨ ndajizyo zyɨ Shiluumi. Awe weewe ʉmɨɨnye shinza huje, saga ɨntulile nka zimo hu Bhayahuudi abhamwetu. 11 Ɨshi, nkɨ ntulile lyolyonti na je, ɨhwanziwa huje, ɨndongwe afwe, saga ɨngakhaana. Leelo, hu nongwa ya je, aBhayahuudi ɨbha bhahuntaaka ɨnongwa ɨzi lenga lwene, nʉʉmo ʉmuntu wa hwanziwa ahate na huntwale hwa Bhayahuudi ɨbha. Anɨ ɨndaabha huje, ɨnongwa yaanɨ ɨbhale alongwe hwi booma ɨlya hu Luumi hwa mwɨnɨ ʉnʼgoosi ʉKayisali!” * ɨnongwa yaanɨ ɨbhale alongwe hwi booma ɨlya hu Luumi hwa mwɨnɨ ʉnʼgoosi ʉKayisali Ʉmuntu wowonti ʉyo ahali Nʼuumi, ahɨtɨshɨlɨɨlwe atwale ɨnongwa yaakwe hu Luumi pilongolela lya mwɨnɨ ʉnʼgoosi ʉyo bhahagaga ʉKayisali.
12 Ɨpo ʉFeesito ahajeehana na bhaavwi bhaakwe. Pamandɨ ahamwamula ʉPaulo ahaga, “Weewe ʉpiluuye ɨnongwa yaaho huje, ɨbhale alongwe hwa mwɨnɨ ʉnʼgoosi ʉKayisali. Ɨshi, ʉhaibhala alongwe hwa mwɨnɨ ʉnʼgoosi ʉKayisali!”
ɄFeesito alaabha ajeehane nʉ mwɨnɨ ʉAgilipa
13 Lwa zyashɨla ɨnsiku nyishe, ʉmwɨnɨ ʉAgilipa peeka nʉ yilʉmbʉ waakwe ʉBeenike bhahabhala hu Kayisaliiya hunʼamushe ʉFeesito ʉnʼongozi wɨ mukowa. 14 Bhahakhala ɨpo ɨnsiku ɨnyinji. Mu nsiku ɨzyo, ʉnʼongozi ʉFeesito ahamʼmamila ʉmwɨnɨ ʉAgilipa ɨnongwa ɨzya Paulo. Ahamʼʉʉzya ahaga, “Alɨɨho ʉmuntu ʉmo wa hakʉngwɨlwe mu hoobhe nʉ Feeliki, lwa sɨɨle asogole. 15 Hu habhaazyo ha nahali hu Yelusaleemu, abhalongozi bha bhasayi bha Ngʉlʉbhɨ na bhagoosi bha Bhayahuudi bhahambʉʉzya ɨnongwa zya bhahunʼtaakila ʉPaulo. Bhahandaabha ɨnʼonje huje, ali na malando aga gogwe.
16 Leelo nahabhabhʉʉzya huje, saga miiho geetu atɨ tiBhaluumi hunʼonje ʉmuntu, sha sɨɨle akhomaane na bhantu bha bhahunʼtaaka na hwiyʉʉmɨle zya bhahunʼtaakila. 17 Nahaweela ɨpa peeka na bhaala bha bhahunʼtaaka ʉPaulo. Ɨndaabhɨ yaakwe lwa hwasha, nahakhala pi tengo lyanɨ ɨlya lonjele ɨnongwa, nahabhalajizya abhalwi huje, bhanʼeete ʉPaulo. 18 Lwa bhanʼeeta mwi koloti, bhaala bha bhahunʼtaaka bhahɨmɨɨlɨla, bhahanda hunʼtaake. Leelo, ɨnongwa zya bhahanʼtakilaga saga zyahali mbiibhi haani, nanshi sha nahasʉbhɨɨye. 19 Lyoli bhahadalihanaga nawo hu mabhʉzɨɨlɨzyo agɨ mpuuto zyabho lwene, peeka nɨ nongwa zya muntu ʉmo wa hafwiye. Itaawa lyakwe ʉmuntu ʉyo, bhahagaga yʉ Yeesu. ɄPaulo ahanʼyangaga ʉmuntu ʉyo huje, ali mwʉmi. 20 Anɨ saga nahalolile idala ɨlya manye ɨlyoli hu nongwa ɨnɨ. Ɨpo nahamʼʉzɨɨlɨzya ʉPaulo, nkashele ahwɨtɨha abhale hu Yelusaleemu, nka longwe ʉhwo. 21 Leelo, ʉPaulo ahapilula ɨnongwa ɨyo. Ahalaabha huje, alɨndɨɨlɨlwe mwi linga afishe ʉmwene nɨ nongwa yaakwe lwa haitwalwa hwa mwɨnɨ ʉnʼgoosi ʉKayisali. Ɨpo nahalajizya huje, alɨndɨɨlɨlwe mwi linga afishe lwa nalyaga idala ɨlya hunʼtwale hwa mwɨnɨ ʉnʼgoosi ʉKayisali.”
22 Ɨpo ʉAgilipa ahamʼʉʉzya ʉFeesito ahaga, “Nasʉngwaga aje, ɨmwʉmvwe nɨɨnɨ ʉmuntu ʉyo.” ɄFeesito ahaga, “Ʉhaihumwʉmvwa ɨndaabhɨ.”
ɄPaulo pitagaalila lya mwɨnɨ ʉAgilipa
23 Lwa hwasha, ʉAgilipa peeka nʉ Beenike bhahɨnza hu madiiho amagoosi. Bhahatʉʉha mwi koloti peeka na bhatwale na bhagoosi abhi booma. ɄFeesito ahanʼajizya ʉnʼwi huje, anʼeete ʉPaulo muuhati. 24 Ɨpo ʉFeesito ahanda ayanje ahaga, “Mwɨnɨ Agilipa, naamwɨ mwenti mwa mubhʉngɨɨne peeka naatɨ! Ʉmuntu ʉnʉ wa muhunʼola pitagaalila ɨpa, ya yʉʉyo aBhayahuudi bhonti bhahamʼʉʉnaga huliinɨ lwɨ ndi hu Yelusaleemu, nɨɨpa pa Kayisaliiya lwa naweela. Bhahabwagaga bhahagaga, ‘Ʉmuntu ʉyo akhondɨɨye afwe!’ 25 Ɨshi, anɨ saga nahalilolile ibhiibhi lyolyonti lya likhondɨɨye huje, agagogwa. Leelo, hu nongwa ya je, ʉmwene ahandaabhile huje, ɨnongwa yaakwe ɨbhale alongwe hu Luumi nʉ mwɨnɨ ʉnʼgoosi ʉKayisali, ɨpo nanɨ nahaamula huje, bhahanʼtwale hu Luumi. 26 Hwope ɨsho, anɨ saga ɨndi ni zwi ɨlya simishizye hu nongwa ya Paulo huje, ɨnganʼsimbila ʉmwɨnɨ weetu ʉnʼgoosi. Sha shɨɨsho ɨnʼeetile pitagaalila lyenyu, haani pitagaalila lyaho awe mwɨnɨ Agilipa aje, lwa taamala humʼʉzɨɨlɨzye, ɨpo ɨmbala bhe ni zwi ɨlya hunʼsimbile ʉmwɨnɨ ʉnʼgoosi ʉKayisali. 27 Anɨ saga ɨndolile shinza hunʼtwale ʉnʼkʉngwe hwa mwɨnɨ ʉnʼgoosi ʉKayisali sinta hunʼsimbile ɨnongwa zya bhahunʼtaakila.”

*25:11 ɨnongwa yaanɨ ɨbhale alongwe hwi booma ɨlya hu Luumi hwa mwɨnɨ ʉnʼgoosi ʉKayisali Ʉmuntu wowonti ʉyo ahali Nʼuumi, ahɨtɨshɨlɨɨlwe atwale ɨnongwa yaakwe hu Luumi pilongolela lya mwɨnɨ ʉnʼgoosi ʉyo bhahagaga ʉKayisali.