1 Ɨpo ʉmwɨnɨ ʉAgilipa ahamʼʉʉzya ʉPaulo ahaga, “Ɨshi ʉyɨtɨshɨlɨɨlwe ahwiyʉʉmɨle weewe.” Ɨpo ʉPaulo ahagolosya ɨnyoobhe humwanya. Ahanda ahwiyʉʉmɨle ahaga, 2 “We mwɨnɨ Agilipa, ɨhwiyʉmvwa huje, ɨndi nʉ tʉʉyɨlo lwɨ hwiyʉʉmɨla pitagaalila lyaho hu nongwa zya bhahuntaaka aBhayahuudi abhamwetu. 3 Ɨyanga ɨsho, pɨpo awe weewe ʉli mʼmanyihanyi wɨ miiho geetu gonti agɨ Shiyahuudi na zyonti ɨzyo bhadaliihana. Ɨshi ɨhulaabha aje, ʉntejeelezye hu jimbiilizu.

4 ABhayahuudi bhonti bhanɨmɨɨnye shinza anɨ afume hu waana waanɨ. Bhanɨmɨɨnye afume hu wandilo sha nahakulaga mu nsi yeetu ɨya hu Izilaeeli mwi booma ɨlya hu Yelusaleemu. 5 Bhanɨmɨɨnye hu maaha gaminji, nantele nkashele bhagɨɨtɨha, bhɨɨbho bhagafumya ʉsimishizi huje, anɨ nahalondolezyaga amiiho gonti agɨ shipʉga sha Bhafalisaayo. Ɨshipʉga ɨshi shihwifumya tee alondolezye ɨndajizyo ɨzya Ngʉlʉbhɨ ashɨle ɨvipʉga ɨvyɨnjɨ vyonti. 6 Zya zinaziizye huje, ɨndongwe asanyʉʉnʉ, lwʉ lusʉʉbhɨlo lwanɨ ʉlwɨ lufingo ʉlwo ʉNgʉlʉbhɨ lwa halapile hwa bhamaama bheetu. 7 Bhope abhantu abhɨ vikholo vyetu ishʉmi na vibhɨɨlɨ bhasʉʉbhɨla huje, ʉNgʉlʉbhɨ ahaihubhabhombela nanshi sha halapile. Sha shɨɨsho bhahumʼpuuta ʉNgʉlʉbhɨ hu dandamazu pasanya na nʉsiku. Awe mwɨnɨ wɨ nshɨnshɨ, ʉlusʉʉbhɨlo ʉlwu, lwa luhubhabhɨɨha aBhayahuudi huntaake ɨleelo ɨli! 8 Yeenu amwɨ mulola hukhome ahwɨtɨshe huje, ʉNgʉlʉbhɨ abhajiiye hubhazyʉsye abhafwe?

9 Ɨmandɨ nanɨ nahalolaga huje, shinza abhombe lyolyonti ɨlya hunʼkhaane ʉYeesu ʉwa hwi booma ɨlya hu Nazaleeti. 10 Ɨshi, ɨgo ga gɨɨgo nahabhombile lwɨ ndi hu Yelusaleemu. Ʉhwo nahabhakʉngaga abhooziwa abhinji mu hoobhe hwi khone ɨlya bhalongozi bha bhasayi bha Ngʉlʉbhɨ. Nantele, abhanjɨ lwa bhalongwaga afwe, nanɨ nahɨtɨhaga huje, bhafwanje. 11 Nahabhombaga hahinji lwene hubhalavye mu nyumba zyonti ɨzya puutile na manyiilile huje, lumo bhaganʼiga ʉYeesu. Ɨlyoyo lyanɨ lyahali ligoosi tee hu bheene. Hu nongwa ɨyo, nahabhalaga hubhalavye na mu mabooma aganjɨ aga hu nsi ɨzyɨnjɨ.”

12 Ɨpo ʉPaulo ahajendeelela ayanje ahaga, “Abhalongozi bha bhasayi bha Ngʉlʉbhɨ bhahampeelile ikhone igoosi ɨlya hubhalavye abhooziwa. Isiku limo nahabhala hwope hwi booma ɨlya hu Damesiki. 13 We mwɨnɨ, lwɨ ndi mwi dala, mu saala nʼtanda ɨya pasanya ɨshi, nahalola ʉnʼkhozyo ʉnʼgoosi ashɨle ʉnʼkhozyo gwi sanya. Ʉnʼkhozyo ʉgwo gwahandawushila tee anɨ afume hu mwanya peeka na bhamwetu ɨmbali zyonti. 14 Tenti tahagwa pansi. Ɨpo nahʉmvwa izwi lihumbʉʉzya mu njango yeetu ɨyɨ Shiebulaniya liyiga, ‘Sauli! Sauli! Yeenu ʉhundavya? Lwʉ lwa naanɨ nɨ Mwɨnɨ, ʉhwivwalazya weewe!’

15 Anɨ nahabhʉzɨɨlɨzya nahaga, ‘Mwɨnɨ, awe we naanu?’ ɄMwɨnɨ ahanaamula ahaga, ‘Anɨ nɨ Yeesu wʉ hundavya. 16 Ɨshi bhʉʉha, ɨmɨɨlɨla! Ɨlloleshɨɨye awe huje, ʉbhe mʼomvi waanɨ, nantele nʼsimishizi waanɨ. Ʉhaibha nʼsimishizi wa gonti ɨgo ʉgalolile na gaala ga nahaihulanga. 17 Ɨshi, ɨhusonteelezya hu Bhayahuudi abhamwenyu na hu bha saga Bhayahuudi. Nantele nahaihufyʉla afume hwa bhantu ɨbha. 18 Ʉbhaavwe amanye ɨlyoli na leshe ahwɨtɨshe ilenga. Bheepe mu longozi wa Seetano ʉwɨ hiisi, bhatʉʉshe mu wumwɨnɨ wa Ngʉlʉbhɨ, pɨpo mu wumwɨnɨ wa Ngʉlʉbhɨ muli ʉnʼkhozyo hwa bhantu. Bhabhombe ɨsho huje, bhakhobhoshelwe ɨmbiibhi zyabho na bhe peeka na bhasangalusu bhonti bha bhasangalusiiwe hwi dala ɨlya hunɨɨtɨshe.’ ”  Bhaazya ɨMbombo Zya Bhasontwa 9:1-19; 22:6-16.

19 ɄPaulo ahajendeelela ayanje ahaga, “Ɨshi mwɨnɨ Agilipa, lwa naalola ɨndoleshelo ɨzyo afume hu mwanya, nahamanya huje, anɨ saga ɨhondɨɨye akhaane. 20 Lyoli nahanda abhalʉmbɨɨlɨle abhantu abha hwi booma ɨlya hu Damesiki, pamandɨ aBhayahuudi abha hu Yelusaleemu na hu mukowa gwonti ʉgwa hu Yudeeya. Nantele nahabhalʉmbɨlɨlaga na bhantu bha saga Bhayahuudi. Nahabhakhajizyaga alaate ɨmbiibhi zyabho, hunʼgalushile ʉNgʉlʉbhɨ na bhombe zya zilolesya huje, bhalaatile ɨmbiibhi zyabho. 21 Ɨzyo zya zyahambombele huje, aBhayahuudi abhamwetu bhahate lwɨ ndi mu lubhaga lwɨ nyumba ɨmfinjile ɨya Ngʉlʉbhɨ, na jele hungoje. 22 Leelo, ʉNgʉlʉbhɨ anavwizye afishe ahabhaazyo ɨha. Nahasimishizyaga ɨnongwa zya Yeesu ʉKilisiti hwa bhonti abhatabhazi na bhapɨɨna. Nagamo amazwi aganjɨ gɨ yanga, lyoli gagaala ɨgo abhakuwi nʉ Moose ga bhahayanjile huje, gahaifumila. 23 ɄMoose na bhakuwi bhonti ɨbho bhahayanjile huje, ʉKilisiti ahailaviwa na gogwe. Nantele ahaibha wa hwande azyʉshe afume hwa bhafwe huje, alʉmbɨɨlɨle ɨnongwa ɨzyɨ fyʉli hwa Bhayahuudi na hwa bha saga Bhayahuudi. Ʉfyʉli ʉwo nʼkhozyo hwa bhonti.”

24 ɄPaulo lwa jendeelela ahwiyʉʉmɨle, ʉFeesito ahayanga hwi zwi igoosi ahaga, “We Paulo! Ʉli mʼbwalusu! Amanyile hwaho hwonti huhuteezya ɨnjeele!”

25 ɄPaulo ahamwamula ahaga, “We Feesito ʉwɨ nshɨnshɨ, anɨ saga ɨndi mʼbwalusu! Amazwi gɨ yanga gɨ lyoli, nantele gɨ njeele zyonti. 26 Wope ʉmwɨnɨ ʉAgilipa agamɨɨnye shinza amazwi ɨga. Nanɨ ɨmɨɨnye lwonti huje, hwɨgo nalimo nka lyeka lya saga alimɨɨnye, pɨpo gonti gahabhombɨɨshe pa pazelu. Hu nongwa ɨyo ɨmbajiiye ayanje pitagaalila lyakwe sinta lyoga.” 27 Ɨpo ʉPaulo ahamʼʉzɨɨlɨzya ʉmwɨnɨ ahaga, “Mwɨnɨ Agilipa, bhʉlɨ, ʉhugɨɨtɨha ɨgo abhakuwi bhahayanjile? Anɨ ɨmɨɨnye huje, ʉhugɨɨtɨha.”

28 Wope ʉAgilipa ahamʼʉzɨɨlɨzya ʉPaulo ahaga, “Bhʉlɨ, ʉyiga ʉnza hungalulanye aje, ɨmbe Nʼkilisiti hu habhaazyo hashe nanshi ɨha?” 29 ɄPaulo ahamwamula ahaga, “Ɨhunʼaabha ʉNgʉlʉbhɨ aje, hubhe hu habhaazyo hadoodo awe ahatali, awe peeka na bhantu bhonti ɨbha bha bhahuntejeelezya sanyʉʉnʉ, mubhe nanshi anɨ shɨ hwɨndi, leelo sinta pinywe na manyololo ɨga.”

30 Ɨpo ʉmwɨnɨ ʉAgilipa, ʉnʼgoosi wɨ mukowa ʉFeesito, ʉBeenike peeka na bhanjɨ bha bhahakhɨɨye peeka nabho, bhahɨmɨɨlɨla na sogole mwi koloti liila. 31 Lwa bheepa paala, bhahabhʉʉzanya bheene bhahaga, “Ʉmuntu ʉnʉ lyoli saga abhombile lyolyonti lya likhondɨɨye hunʼkʉnje mu hoobhe awe hunʼgoje.” 32 Ʉmwɨnɨ ʉAgilipa ahamʼʉʉzya ʉFeesito ahaga, “Ʉmuntu ʉnʉ nka saga apilulaga ɨnongwa yaakwe huje, ɨbhale alongwe hwa mwɨnɨ ʉnʼgoosi ʉKayisali, handɨ ayiguliilwe.”