1 ɄYeesu ahanda hubhamanyizye abhantu nantele panshɨnjɨ pa nsʉmbi. Ɨmpʉga ɨngoosi haani ɨya bhantu yahamʼʉnganiiye. Ɨpo ʉmwene ahatʉʉha mu waato, na khale muula huje, bhagandi humʼbiganye. Abhantu bhahasagala panshɨnjɨ pa nsʉmbi. 2 Ahabhamanyizyaga ɨmanyizyo ɨnyinji hu holanyo. Mu manyizyo zyakwe ahagaga, 3 “Mwɨ tejeelezyi! Ʉmʼvyala mbeyu ʉmo ahabhalile asanse ɨmbeyu ɨyɨ ngano. 4 Luula lwa sansa, zimo zyahagwɨla mwi dala, ɨnyonyi zyahɨnza, zyahazikompa na huzimile. 5 Ɨmbeyu zimo zyahagwɨla mu longo ʉnʼdoodo pi lyalawe, zyahamela nalinaali mu longo ʉnʼdoodo. 6 Ɨpo isanya lwa lyahalama, lyahʉʉmɨha ʉlongo guula, zyope ɨngano zyahanyaala na hwʉme, pɨpo saga zyahali na malandazi amatali pansi. 7 Ɨmbeyu zimo zyahagwɨla mu mimvwa, amimvwa ɨgo gahamela, gahazipuuta, zyahapootwa ahwele. 8 Leelo, ɨmbeyu zimo zyahagwɨla mu longo gwa gubholile, zyahamela, zyahakula na hwele haani. Ɨmo yahapaapa amashʉmi gataatu, ɨyamwabho yahapaapa amashʉmi nʼtanda, nantele ɨyamwabho yahapaapa ɨmya yeeka!”

9 Ɨpo ʉYeesu ahabhabhʉʉzya huje, “Ʉmuntu wowonti ʉya hwʉmvwa, azyaganyaaje na lembe mwɨgo ga nabhamanyizya.”

10 Pamandɨ ʉYeesu ahasagala na bhasundwe bhaakwe ishʉmi na bhabhɨɨlɨ na bhasundwe abhamwabho. Ɨpo bhahamʼʉzɨɨlɨzya hu nongwa ɨzyɨ holanyo, bhahaga, “Ɨshi, ɨholanyo zyaho zilɨngaanisya yeenu?” 11 Ahabhaamula ahaga, “Amwɨ mwɨ hubhavundulila ɨzya humfise ɨzyɨ wumwɨnɨ ʉwa Ngʉlʉbhɨ. Leelo, abhantu abha panzɨ ɨhubhabhʉʉzya zyonti hu holanyo, 12 nanshi sha zyahasimbwilwe huje,

13 Ɨpo ʉYeesu ahaga, “Ɨshi leelo, pa saga muhuyaaganya ɨholanyo ɨnɨ, zibhala bhe bhʉlɨ bhʉlɨ hu zyamwabho? 14 Ʉmʼvyala mbeyu muntu ʉya bhaleetela abhanjɨ amazwi ga Ngʉlʉbhɨ. 15 Abhantu bhamo lwa bhatejeelezya izwi lya Ngʉlʉbhɨ, bhalɨngaana nʉ longo ʉgwa mwi dala. Bha bhaala nkashele bhʉmvwa lwene izwi lya Ngʉlʉbhɨ, ʉSeetano ahwɨnza, ahwefwa izwi liila mu mooyo gaabho. 16 Abhanjɨ bhalɨngaana nʉ longo ʉgwa pi lyalawe. Lwa bhʉmvwa izwi lya Ngʉlʉbhɨ, bhahulyambɨɨlɨla hu nseho zyonti nalinaali lwene, 17 leelo saga bhahulibhɨɨha mu mwoyo. Lyoli bhali nanshi imelela lya saga lili na malandazi. Alɨngaane nɨɨsho bhajimbiilila hashe lwene, amayɨmba lwa gahubhaaga hu nongwa yi zwi, bhahululeha ʉlwɨtɨho nalinaali lwene. 18 Bhamo bhalɨngaana nʉ longo ʉgwa mu mimvwa, bhahulyʉmvwa na hulyambɨɨlɨle izwi lya Ngʉlʉbhɨ. 19 Leelo, abheene bhasɨɨbha haani ɨzya mu nsi, ilenga ɨlya bhe nɨ shʉʉma ɨshinji peeka na zilishe ahwanze ɨvintu ɨvinza ɨvyamwabho. Ɨzyo zihubhabhɨɨha huje, bhapootwe hulibhombele ɨmbombo izwi. 20 Leelo, bhamo bhalɨngaana nʉ longo gwa gubholile. Ɨbha bhahulyʉmvwa izwi lya Ngʉlʉbhɨ na hulyambɨɨlɨle na hulibhombele ɨmbombo. Ɨpo pa lipaapa na galulanye abhantu ɨbho bhabhombaje ɨnyinza, nanshi ɨmbeyu ɨmo yahapaapile amashʉmi gataatu, ɨyamwabho amashʉmi nʼtanda, ɨmo ɨmya yeeka.”

21 ɄYeesu ahayibhʉʉzya ɨmpʉga ɨla ɨya bhantu huje, “Bhʉlɨ, alɨɨho ʉmuntu ʉya khozya ɨkolobooyi na bhɨɨshe hwi zʉngʉlʉ yɨ shitala, awe ahuyikwinshila mu nsonta? Bhʉlɨ, saga abhɨɨha pamwanya pa mbeeje na huje, ɨkhozyaje mwonti? 22 Ɨsho sha shɨɨsho hu holanyo, lyolyonti liila lya lifisiilwe, lifisiilwe huje, lisakulwe na bhe pazelu. Nantele, lyolyonti liila lya likwinshiliilwe, likwinshiliilwe huje, likwinkuliwe. 23 Ʉmuntu wowonti ʉya hwʉmvwa, azyaganyaaje na lembe mwɨgo ga nabhamanyizya.”

24 Ɨpo ʉYeesu ahonjela hubhabhʉʉzye huje, “Tejelezyaji haani! Shishiila shʉ hwifumya hulitejeelezye izwi, sha shɨɨsho wope ʉNgʉlʉbhɨ sha hupeela ʉmanyi, nantele anza huhwonjeelezye hulimanye haani. 25 Ʉla wa hulitejeelezya izwi lya Ngʉlʉbhɨ na hulimanye, ʉNgʉlʉbhɨ ahumwavwa na humwonjele hulimanye tee. Ɨpo nkashele ʉmuntu saga atejeelezya izwi lya Ngʉlʉbhɨ, ni doodo lya limɨɨnye, lifyʉlwa.”

26 ɄYeesu ahonjela hubhabhʉʉzye huje, “Ɨmbabhʉʉzye ɨholanyo ɨyamwabho huje, ɨmbamanyizye ʉwumwɨnɨ wa Ngʉlʉbhɨ sha wuli. Ʉmuntu ʉmo ahavyalile ɨngano mu nʼgʉnda. 27 Pasanya na nʉsiku, abhe adamuuye awe agonile, ɨmbeyu ɨla ɨbha ɨli amele na kule, ʉmʼvyala mbeyu na manye sha zili. 28 Ʉlongo gwʉgwo gukuzya ɨngano ɨla na paapizye. Nasʉʉti ɨdugula itʉndʉ iduvya, nkashele yanda alembe, hu malishilo ɨfumya itwe lya libha nɨ ngano muuhati. 29 Ɨngano ɨla lwa yeela, nantele yʉʉma, ɨpo ahwanda agwedule nɨ ngwedulo.”

30 ɄYeesu ahonjela hubhabhʉʉzye huje, “Ɨshi tiwulɨngaanisye ʉwumwɨnɨ wa Ngʉlʉbhɨ nɨ yeenu? Tiwulɨngaanisye nɨ holanyo bhʉlɨ? 31 Wulɨngɨɨne nɨ mbeyu yi longoti, yɨ ndoodo ashɨle ɨmbeyu zyonti zya zivyalwa mu magʉnda. 32 Nkashele yaamela, ɨbha likwi ligoosi ashɨle amakwi gonti aga mu magʉnda. Libha nɨ nsamba ɨngoosi nɨ nyonyi zyope zibhɨɨha ɨvyansʉ mu nsamba zyakwe.”

33 ɄYeesu ahabhaletelaga amazwi ga Ngʉlʉbhɨ hu holanyo ɨnyinji nanshi zyɨnɨɨzi, nanshi sha bhahagaganyaaga. 34 Saga ahayangaga nabho sinta holanyo. Leelo, lwa bhali bheene na bhasundwe bhaakwe, ahabhalanganyizyaga zyonti.

35 Isiku lyɨnɨɨlyo, nalyabheela yaakwe, ʉYeesu ahabhabhʉʉzya abhasundwe bhaakwe huje, “Saali, tifwɨmɨɨle ɨnsʉmbi, tibhale hwi syɨla ɨlyɨnjɨ.” 36 Bhahayileha ɨmpʉga ɨya bhantu, bhahatʉʉha mu waato mwa hali ʉYeesu, bhahasogola peeka nawo. Pahali nɨ nyaato ɨzyamwabho zya bhahalongozɨɨnye nabho. 37 Ɨhaala ɨhali haani yahanda avugule mu nsʉmbi muula. Ʉvwalanganu wuula wahawubuhanyaaga ʉwaato, amɨnzɨ gahanda ahwitishile na meme mu waato. 38 Mu habhaazyo hɨnɨɨho, ʉYeesu ahagonelɨɨye hwisinda mu waato, ahasugamiziizye itwe pi sugamilo. Abhasundwe bhaakwe bhahanʼdaamuzya, bhahaga, “Mʼmanyizyi, hwa huje saga ʉsaaga lwonti, atɨ lwa tifwa?” 39 Lwʉnʉʉlwo ʉYeesu ahadaamuha na huyikhajile ɨhaala ɨla, ahawukhajila ʉvwalanganu huje, “Pʉʉma myɨ!” Ɨhaala ɨla yahaleha avugule, hwahabha myɨ lwonti. 40 Lwʉnʉʉlwo ʉYeesu ahabhabhʉʉzya abhasundwe bhaakwe huje, “Yeenu amwɨ mwogʉʉpe haani? Ɨshi tije amwɨ musɨɨle abhe nʉ lwɨtɨho lwonti?” 41 Abheene bhahogʉʉpe haani, bhahanda abhʉzɨlɨzanye huje, “Ɨshi ʉnʉ yʉ naanu, aje ɨhaala nʉ vwalanganu vihumwʉmvwa lwene?”