1-4 Ɨnsiku ziila, aBhafalisaayo na Bhayahuudi abhamwabho bhonti saga bhahalyanga ɨshalye sinta asamvye afume mu makhooholo, ahwizushe amiiho ga bhagoosi bhaabho sha gahali. Nka bhafumile hu lembuka, bhahasamvyaga nasʉʉti shɨ hwanziwa, nka bhalya hamo. Nantele, bhahizuhaga amiiho gaabho agamwabho aminji gɨ halɨ, nanshi ahwozye ɨmpɨndɨ, amafulila nɨ vyɨlɨɨlo ɨvyɨ shaaba. Isiku limo, aBhafalisaayo na bhamanyizyi abhɨ ndajizyo zya Moose bhamo bhahɨnza afume hwi booma ɨlya hu Yelusaleemu, bhahamʼʉngaanila ʉYeesu. Bhahabhalola abhasundwe bha Yeesu bhamo bhalya ɨshalye sinta asamvye shɨ hwanziwa mu miiho gaabho.

5 Ɨpo aBhafalisaayo na bhamanyizyi abhɨ ndajizyo zya Moose bhahamʼʉzɨɨlɨzya ʉYeesu bhahaga, “Yeenu abhasundwe bhaaho saga bhahwizuha amiiho ga bhagoosi bheetu, lyoli bhalya hu nyoobhe ɨnyaavu?” 6 ɄYeesu ahabhaamula ahaga, “Amwɨ muli bhagulugulu. ɄNgʉlʉbhɨ ahayanjile lyoli ashɨlɨle hwa nʼkuwi waakwe ʉYesaaya hu nongwa yeenyu huje,

9 Muli na madala aminza aga khaane ɨndajizyo zyakwe ʉNgʉlʉbhɨ huje, nka mwizuhaje amiiho geenyu! 10 ɄNgʉlʉbhɨ ahalajiziizye ashɨlɨle hwa Moose huje, ‘Ʉnʼtinihaje ʉso nʉ bhɨɨnyu.’  Bhaazya aFume (Kutoka) 20:12; ɨNyiizuho (Kumbukumbu la Torati) 5:16. Nantele, ahajile, ‘Ʉmuntu wowonti ʉla ahunʼiga ʉyise awe ʉnyina, ɨhwanziwa huje, afwanje.’  Bhaazya aFume (Kutoka) 21:17; ɨMbombo Zya Bhalaawi (Mambo ya Walawi) 20:9. 11 Leelo amwɨ, mumanyizya muyiga, ‘Shinza lwene nkashele ʉmuntu ahumʼʉʉzya ʉyise waakwe awe ʉnyina waakwe huje, “Ɨvintu ɨvi nɨnzaga huhwavwe, ɨshi vyabha kolibani,” ’ hwa huje mpeesya hwa Ngʉlʉbhɨ. 12 Amanyizye ɨsho, muhumʼɨɨha huje, saga asimwavwaje nahamo ʉyise waakwe awe ʉnyina waakwe. 13 Shɨɨsho sha mugalulanya ɨndajizyo zyakwe ʉNgʉlʉbhɨ huje, amwɨ mubhajiiye hwizushe amiiho geenyu mwɨmwɨ. Nantele, mubhomba nyinji lwene zya zilɨngɨɨne nɨɨzi.”

14 ɄYeesu ahabhʉngaanya ɨmpʉga ya bhantu nantele huje, “Mubhantu amwɨ mwenti ntejelezyaji, nantele muzyaganyaaje zyɨ yanga. 15 Nahamo ahantu ha hahunʼtʉʉha ʉmuntu na humʼpeele ʉwaavu. Handɨ zya zifuma hu mwoyo gwa muntu zya zihumʼpeela ʉmuntu ʉwaavu. 16 Ʉmuntu wowonti ʉya hwʉmvwa, azyaganyaaje na lembe mwɨgo ga nabhamanyizya.” * Amazwi ɨga saga galɨɨho mu nsimbo zimo ɨzyɨ mandɨ ɨzyɨ Shiyunaani, Ʉmuntu wowonti ʉya hwʉmvwa, azyaganyaaje na lembe mwɨgo ga nabhamanyizya.

17 Lwa wayileha ɨmpʉga ya bhantu na tʉʉshe mu nyumba, abhasundwe bhaakwe bhahamʼʉʉzya huje, ayiilule ɨholanyo ɨla. 18 Ɨpo ahaga, “Ɨshi amwɨ saga muli nɨ njeele ɨzya huyimanye ɨholanyo ɨla? Saga mulola huje, ahantu haala hahunʼtʉʉha ʉmuntu saga hagamʼpeela ʉwaavu? 19 Ɨshalye saga shikhomaana nʉ mwoyo, shishɨzanya lwene mu vyanda na hwepe mu mʼbɨlɨ.” Ayanje ɨsho, ʉYeesu ahalolesyaga huje, ɨshalye shonti shɨtɨshɨlɨɨlwe alye.† ɨshalye shonti shɨtɨshɨlɨɨlwe alye Mu ndajizyo zya Moose, aBhaizilaeeli saga bhahɨtɨshɨlwaga alye ɨvyalye vimo nanshi ɨngʉlʉbhɨ nɨ haawa. Bhaazya ɨMbombo Zya Bhalaawi (Mambo ya Walawi) 11. 20 Ɨpo ahonjezya huje, “Zya zifuma hu mwoyo gwa muntu, zya zihumʼpeela ʉmuntu ʉwaavu. 21 Hwa huje muuhati mu mwoyo mwa mufumila ɨnsɨɨbho ɨmbiibhi, ʉbhembusu, ʉwiibha, ʉgoji, 22 ʉweegu, ʉwiimi, ʉbhiibhi, ʉgulugulu, ʉvutusu, ʉmwone, ɨndigo, amabaado nʉ kwesu. 23 Ɨmbiibhi zyonti zyɨnɨɨzi zifuma muuhati mu mwoyo gwa muntu zya zihunʼeetela ʉmuntu ʉwaavu.”

24 ɄYeesu na bhasundwe bhaakwe bhahasogola mu mukowa ʉgwa hu Galilaaya, bhahabhala hu mukowa ʉgwa hu Tiilo. Huhuula ahʉʉbha mu nyumba aje, nʉʉmo ʉmuntu wa manye huje, alɨɨho. Leelo, abhantu bhahabha sha bhanʼolile. 25-26 Huhuula, hwahali nʉ nʼshɨ ʉmo wa saga ahali Nʼyahuudi. Lyoli ahali wɨ shifumo ɨsha Bhasilofoyiniike mu nsi ɨya hu Siiliya. Ʉmwalɨ waakwe ahali ni pepo ikhandamanu. Ʉnʼshɨ ʉyo lwa wʉmvwa huje, ʉYeesu ali pa pɨɨpɨ, ahamwɨnzɨla, ahasugamila pa manama gaakwe. Ahanʼaabha huje, amwefwe ʉmwalɨ waakwe ipepo liila. 27 ɄYeesu ahamʼʉʉzya ahaga, “Saga shinza ahweje ɨshalye sha bhaana na ponyezye ɨmbwa. Abhaana bhakute nasʉʉti.” ‡ Lumo ʉYeesu ahagaga abhaana hwa huje Bhayahuudi. Nantele, ahagaga ɨmbwa hwa huje bha saga Bhayahuudi. 28 Ɨpo ʉnʼshɨ ʉla ahamwamula ʉYeesu huje, “Mwɨnɨ, lyoli zyʉ yanga zili shɨɨsho. Leelo, abhaana lwa bhalya, ɨmbwa zyope zisebheelezya ɨvyalye vya vilagala pansi pa meeza.” 29 ɄYeesu ahamwamula huje, “Ɨpo wayanga shinza. Ɨshi sogolaga, ipepo limwepile ʉmwalɨ waaho.” 30 Ʉnʼshɨ ʉla ahaweela hu khaaya, ahega ʉmwalɨ waakwe aponile, alambalɨɨye pa shitala, mwinza lwene, ipepo limwepile.

31 Lwʉnʉʉlwo ʉYeesu ahasogola na bhasundwe bhaakwe mwi booma ɨlya hu Tiilo, ahashɨlɨla hu Siidoni, ahaweela hu Nsʉmbi ɨYa Hu Galilaaya, hu nsi ɨya hu Dekapooli. 32 Ʉhwo hwahali nʉ muntu ʉmo, ya hali nʼdinde, nantele mʼbwibwi. Abhantu bhamo bhahanʼeeta hwa Yeesu. Bhahanʼaabha ʉYeesu amʼɨɨshɨle ɨnyoobhe huje, amʼponie. 33 ɄYeesu ahamwefwa pa mpʉga ya bhantu, ahabhala nawo panshɨnjɨ mwene. Ahamʼɨɨha ɨnsamba zyakwe mu makutu ga muntu ʉla. Ahaswɨla amatɨ pa hasamba haakwe, ahamʼpaha pa mɨlɨ. 34 Aheenya hu mwanya, ahanʼsaajila, ahamʼʉʉzya ahaga, “Efaata!” Hwa huje, “Iguha!” 35 Pɨnɨɨpo, ʉmuntu ʉla ahiiguha amakutu, ahanda ayanje na hwʉmvwe shinza lwene.

36 ɄYeesu ahayikhajiizya ɨmpʉga ya bhantu huje, bhagandi humʼʉʉzye ʉmuntu nʉʉmo zya bhombile. Ahabhakhaanaga, leelo bhahonjelaga haani ayanje zyɨzyo hwonti. 37 Bhahabha nɨ nswigo ɨngoosi haani. Bhahayangaga bhahagaga, “Zyonti zya bhombile, nyinza. Ahubhaponia abhantu bha saga bhahwʉmvwa huje, bhʉmvwaje amakutu, bha saga bhayanga huje, bhayangaje!”