1 Mu habhaazyo hɨnɨɨho, ɨmpʉga ɨngoosi ɨyamwabho ɨya bhantu yahabhʉngɨɨne nantele. Saga bhahali nɨ shalye. Ɨpo ʉYeesu ahabhakwizya abhasundwe bhaakwe, ahabhabhʉʉzya huje, 2 “Ɨli lisiku lya taatu abhantu ɨbha bhali peeka naatɨ, saga bhali nɨ shalye nashimo, mwa mwʉmwo ɨhubhalolela ɨnkʉmbʉ. 3 Nkashele ɨnjiga ɨmbaleshe bhabhalaje humwabho nɨ nzala, bhagaziliha mwi dala, nantele bhamo bhafumile hutali.”

4 Abhasundwe bhaakwe bhahamwamula bhahaga, “Ɨpa pi gona, nʉʉmo ʉmuntu wa gazyaga ɨntogito ɨzya kwɨlane abhantu bhonti ɨbha.”

5 ɄYeesu ahabhabhʉzɨɨlɨzya huje, “Muli nɨ ntogito zilɨnga?” Bhahamʼʉʉzya bhahaga, “Ɨpa tili nɨ ntogito pʉnga (7).” 6 ɄYeesu ahabhalajizya huje, abhantu bhonti bhakhale pansi. Aheega ɨntogito ziila pʉnga (7), ahanʼsalifya ʉNgʉlʉbhɨ, ahamensulanya. Ahabhapeela abhasundwe bhaakwe huje, bhabhagabhile abhantu. 7 Nantele, bhahali nɨ nswɨ ɨndoodo, nantele nyishe lwene. Zyope ahasalifya hwa Ngʉlʉbhɨ, ahabhalajizya huje, bhabhapeele abhantu.

8 Abhantu bhahalya, bhahanguta na sagazye. Abhasundwe bhahabhʉngaanya ɨvyalye vya vyahasyalile, gahamema amaseje pʉnga (7). 9 Abhantu bha bhahaliiye ɨshalye bhahali elufu zinɨ! ɄYeesu ahabhalaga abhantu bhaala huje, bhabhalaje humwabho. 10 Nalinaali lwene ahatʉʉha na bhasundwe bhaakwe mu waato, bhahabhala hu nsi ɨya hu Dalumanuuta.

11 ɄYeesu na bhasundwe bhaakwe lwa bhaafiha hu Dalumanuuta, aBhafalisaayo bhahɨnza hwa Yeesu. Bhahanda adaliihane nawo huje, bhamwʉbhɨle. Bhahanzaga huje, abhalolesye ɨshimanyishizyo sha shimanyisya huje, afumile hwa Ngʉlʉbhɨ.

12 ɄYeesu ahazugumila mu mwoyo. Ahayanga huje, “Yeenu amwɨ mubhantu mu habhaazyo ɨha muhwanza alole ɨshimanyishizyo? Ɨhubhabhʉʉzya amwɨ lyoli huje, anɨ saga ɨhubhapeela ɨshimanyishizyo nashimo abhantu abhɨ habhaazyo ɨha.” 13 Ahabhaleha, ahatʉʉha nantele mu waato. Ahanda ashʉʉle na bhasundwe bhaakwe, na lobhoshe hwi syɨla ɨlyɨnjɨ ɨlyɨ nsʉmbi.

14 Abhasundwe bha Yeesu bhahɨwɨɨlwe apaye ɨntogito zinyinji. Bhahali nɨ ntogito yeeka lwene mu waato. 15 ɄYeesu ahabhasunda huje, “Mwenyaaje haani na bhe maaso nʉ safu wa Bhafalisaayo nʉ wa Heloode ʉAntipa,* ʉsafu wa Bhafalisaayo nʉ wa Heloode ʉAntipa ɄYeesu ahalɨnganisyaga ʉsafu ʉwo nʉ sonsheelezi ʉbhiibhi wuula aBhafalisaayo nʉ Heloode ʉAntipa bhahabhombaga hwa bhantu. Ʉsonsheelezi wa Bhafalisaayo wahali wɨ manyizyo ɨzi lenga. Wope ʉHeloode ʉAntipa ahali nʼsonsheelezi wɨ madala mabhiibhi. Abhasundwe bha Yeesu saga bhahazyaganyaaga zyonti ʉYeesu zya hayangaga. ʉmwɨnɨ.”

16 Abhasundwe bhaakwe bhahanda abhʉʉzanye bhɨɨbho na bhɨɨbho. Bhahaga, “Ayanjile ɨsho hu nongwa ya je, saga tipayile ɨntogito ziila.” 17 ɄYeesu ahamɨɨnye zyonti zya bhakwepeelana, ahabhabhʉzɨɨlɨzya huje, “Yeenu amwɨ mukwepana huje, saga muli nɨ ntogito? Hwa huje nɨɨshi lwene saga muhuzyaganya na huzimanye nazimo? Amooyo geenyu makhome huzimanye zyonti zyɨ yanga? 18 Hwa huje amwɨ muli na maaso, saga mulola nahamo? Gope amakutu muli nago, leelo saga muhuzyaganya nazimo? Ɨshi, saga muhwizuha? 19 Ahabhaazyo haala anɨ nahamensulanyaaga ɨntogito zisaanu ziila na hubhapeele abhantu ashɨle elufu zisaanu, mwahabhʉngɨɨnye viseje vilɨnga vyɨ vyalye vya vyahasyalile?” Bhahamwamula bhahaga, “Tahabhʉngɨɨnye ɨviseje ishʉmi na vibhɨɨlɨ.”

20 “Lwa nahamensulanyaaga ɨntogito pʉnga (7) na hubhapeele abhantu ɨelufu zinɨ, mwahabhʉngɨɨnye amaseje galɨnga gɨ vyalye vya vyahasyalile?” Bhahamwamula bhahaga, “Amaseje pʉnga (7).”

21 Ɨpo ahabhabhʉzɨɨlɨzya ahaga, “Nɨɨshi saga muhuzyaganya nka zimo?”

22 ɄYeesu na bhasundwe bhaakwe bhahafiha hu shipanga ɨsha hu Betisayida. Abhantu bhamo bhahanʼeeta hwa Yeesu ʉnʼtonko ʉmo. Bhahanʼaabha ʉYeesu huje, amʼpalamansye na humʼponie. 23 ɄYeesu ahanʼkhata ʉnʼkhono ʉnʼtonko ʉla, ahabhala nawo panshɨnjɨ pa shipanga shiila. Ahanʼswɨlɨla amatɨ mu maaso, ahamʼɨɨha ɨnyoobhe mu maaso, ahamʼʉzɨɨlɨzya huje, “Ɨshi, wanda alole hohonti?”

24 Ʉmuntu ʉla aheenya, ahayanga huje, “Ɨhubhalola abhantu, lyoli bhaloleha nanshi amakwi ga gajenda.”

25 ɄYeesu ahabhɨɨha ɨnyoobhe nantele mu maaso, ʉmuntu ʉla ahasimishizya ahwenye. Ahanda alole ɨvintu vyonti shinza. 26 ɄYeesu ahamʼʉʉzya huje, “Bhalaga hu khaaya, ʉjendele hwʉhwu, ʉsahabhale hu Betisayida.”

27 ɄYeesu na bhasundwe bhaakwe bhahasogola hu Betisayida, bhahabhala hu vipanga ɨvya mu pɨɨpɨ na hu Kayisaliiya-Filiipi. Lwa bhajenda mwi dala, ʉYeesu ahabhabhʉzɨɨlɨzya abhasundwe bhaakwe huje, “Ɨshi, abhantu bhayiga anɨ nɨ weenu?” 28 Bhahamwamula bhahaga, “Bhamo bhayiga, awe we Yoohani ʉMwozi, bhamo bhayiga, we Eliya ʉnʼkuwi wa Ngʉlʉbhɨ ʉwɨ mandɨ. Bhamo bhayiga ʉli nʼkuwi ʉmo mwa bhakuwi bha Ngʉlʉbhɨ abhanjɨ abhɨ mandɨ.” 29 Ahabhabhʉzɨɨlɨzya huje, “Ɨshi amwɨ muyiga anɨ nɨ weenu?” ɄPeeteli ahamwamula ahaga, “Awe we Kilisiti.” † ɄKilisiti hwa huje ʉmuntu ʉla ʉYehoobha amʼɨshɨɨye huje, abhalongozyaje na bhafyʉle abhantu. 30 ɄYeesu ahabhasunda ahaga, “Musahasheele ahumʼʉʉzye ʉmuntu wowonti huje, anɨ nɨ Kilisiti.”

31 Ɨpo ʉYeesu ahanda hubhamanyizye abhasundwe bhaakwe huje, “Anɨ nɨ Mwana Wa Muntu, ɨhwanziwa alabhe hu minji. Nantele, lyoli, abhagoosi, abhalongozi bha bhasayi bha Ngʉlʉbhɨ‡ Bhaazya izwi Bhasayi bha Ngʉlʉbhɨ hu Ɨngalulanyo yɨ mazwi amajenu hu wandilo wɨ shitaabu ɨshi. na bhamanyizyi abhɨ ndajizyo zya Moose bhahaihaana na hungoje. Leelo isiku ɨlya taatu afume afwe hwanɨ, nahaizyʉha.” 32 ɄYeesu ahabhabhʉzyaga abhasundwe bhaakwe ɨnongwa ɨzyo apazelu. ɄPeeteli lwa wʉmvwa, ahanʼkwizya panshɨnjɨ, ahanda hunʼonganye. 33 ɄYeesu ahagaluha, ahabheenya abhasundwe bhaakwe. Ahanʼonganya ʉPeeteli huje, “Epa hwitagaalila lyanɨ, Seetano! Ʉsɨɨbha zya saga zya Ngʉlʉbhɨ, lyoli zyonti zya bhantu.”

34 Ahabhʉngaanya ɨmpʉga ya bhantu peeka na bhasundwe bhaakwe huje, bhɨnze hwa mwene. Ahabhabhʉʉzya huje, “Ʉmuntu wowonti ʉla ahwanza humbɨnjɨɨlɨzye anɨ, saga ahwanziwa huje, ahwisaagaje yʉʉyo, lyoli ahwifumyaje anyeemule ɨshikhobheehanyo shaakwe,§ Anyeemule ɨshikhobheehanyo shaakwe hwa huje hunʼtinishe ʉNgʉlʉbhɨ hu mwoyo gwonti na bhe haani afwe hu nongwa ya Yeesu. nka yandaje humbɨnjɨɨlɨzye anɨ. 35 Hwope ʉmuntu ʉya hwanza ahwifyʉle ʉwʉʉmi waakwe, ahaihuwuteezya. Lyoli ʉla wa fumya ʉwʉʉmi waakwe hu nongwa ya humbɨnjɨɨlɨzye anɨ na hu nongwa yɨ Nongwa ɨNyinza afume hwa Ngʉlʉbhɨ, ahaihuwufyʉla. 36 Ʉmuntu ahaihuhaaga hantu heenu, nkashele ahaihuwaaga ʉtabhazi wonti ʉwa mu nsi ʉmu, lyoli ahaihuwuteezya ʉwʉʉmi waakwe ʉwa wiila na wiila? 37 Ɨshi, ʉmuntu agafumya hantu heenu ahagoosi ataane nʉ wʉʉmi waakwe? Saga halɨɨho nahamo! 38 Mu habhaazyo ɨha abhantu ha bhabhomba ɨmbiibhi, saga bhahunʼsaaga ʉNgʉlʉbhɨ. Lwɨ hwiha na bhantumi abhasangalusu mu mwamu wa Yise waanɨ, anɨ nɨ Mwana Wa Muntu nahaihunʼolela ɨnsoni ʉmuntu wowonti wa hundolela ɨnsoni anɨ nɨ manyizyo zyanɨ pa bhantu ɨbho.”