1 Lwʉnʉʉlwo ʉBoohasi ahabhala, ahakhala pa lyango ʉgwa tʉʉshile pi booma paala, abhantu pa bhahabhʉngaanaga. Enya! Ʉnʼume ʉla ʉBoohasi wa hayangaga huje, ahali holo wa mu pɨɨpɨ haani nʉ Elemeeleki, ahashɨzanya pɨnɨɨpo. ɄBoohasi ahanʼkwizya ahaga, “Holo waanɨ, ɨnza ɨpa ʉkhale tiyanje.” Wope ʉnʼume ʉla ahabhala, ahakhala papaala. 2 Ɨpo ʉBoohasi ahabhakwizya abhagoosi ishʉmi abha pi booma paala huje, bhabhe bhasimishizi (bhakeeti). Abhagoosi bhaala bhahabhala, bhahakhala. 3 ɄBoohasi ahamʼʉʉzya ʉholo waakwe ʉla huje, “Ɨshi ʉNaʉmi ʉya weelile afume hu nsi ɨya hu Moabu hwa hakhalaga, ahwanza akazye ʉnʼgʉnda gwa gwahali gwa holo weetu, ʉElemeeleki. 4 Nasɨɨbhaga huje, hwahali shinza ahubhʉʉzye ɨnongwa ɨzi. Ɨshi nkashele ʉhwanza huje, ʉkale na gombole ʉnʼgʉnda ʉgwo, ʉyanje pilongolela pa bhagoosi ɨbha na bhantu abhanjɨ bha bhahwɨli ɨpa. Hwa huje awe we ʉkhondɨɨye abhe wa hwande agombole ʉnʼgʉnda ʉgwo, anɨ ɨndi wa bhɨɨlɨ.” Wope ʉla ahaga, “Ɨnza gombole ʉnʼgʉnda ʉgwo.”

5 ɄBoohasi ahamʼʉʉzya ʉmuntu ʉla huje, “Nantele, ʉmanye huje, nkashele awe we wʉ kala ʉnʼgʉnda ʉgwo hwa Naʉmi, ʉnza hugaale na yʉ Luti ʉMʼmoabu ʉmʼfwɨle wa Maaloni huje, ʉnʼgʉnda ʉgwo gusagale mu shikholo sha Maaloni.” 6 Ɨpo ʉmuntu ʉla ahaga, “Nkashele sha zili, saga ɨngagombola, pɨpo ɨnza nangaanye ʉpyano wa bhaana bhaanɨ. Shinza huje, ɨlleshele awe ʉgombole weneewe, anɨ napootwa.” 7 Amiiho ga Bhaizilaeeli ɨnsiku ziila, nkashele ʉmuntu ahwanza agombole, awe ataane (akalane) ɨshʉʉma, ɨshimanyizyo shaakwe shahali ʉmwanɨɨsho nʼgʉnda akʉʉla ɨshilaatʉ shaakwe shimo, na humʼpeele ʉla ʉwa gombola. ABhaizilaeeli bhahabhombaga shɨɨsho abhonesye huje, bhʉmvwɨnwe shinza. 8 Ɨpo ʉmuntu ʉla ahamʼʉʉzya ʉBoohasi huje, “Ɨshi ɨlleshele awe we ʉkale ʉnʼgʉnda ʉgwo.” Ɨpo, ahakʉʉla ɨshilaatʉ shaakwe shimo, ahamʼpeela shɨɨsho ʉBoohasi.

9 Wope ʉBoohasi ahabhabhʉʉzya abhagoosi na bhantu bhonti bha bhahali pɨnɨɨpo huje, “Ɨshi amwɨ mwabha mwɨ bhasimishizi sanyʉʉnʉ. Mwalola huje, naakala ɨvintu vyonti hwa Naʉmi, vya vyahali vya nʼume waakwe ʉNaʉmi, ya fwiye ʉElemeeleki na bhaana bhaakwe, ʉMaaloni nʉ Kiliyooni. 10 Nantele, ʉLuti ʉMʼmoabu, ʉyo ahali mʼfwɨle wa Maaloni, wope nanʼgaala, waabha nʼshɨ waanɨ, afume sanyʉʉnʉ. Ɨsho sha tahaishijendeelezya ɨshʉʉma mu shikholo sha Elemeeleki huje, itaawa lyakwe lisahateeje hwa bhaana shikholo abhe mu makalaata ga bhantu mwi booma ɨli. Amwɨ mwabha mwɨ bhasimishizi isiku ɨlya sanyʉʉnʉ.”

11 Abhagoosi bhaala na bhantu bhonti bha bhahali paala bhahɨɨtɨha bhahaga, “Lyoli atɨ tabha tɨ bhasimishizi. ɄYehoobha anʼtʉʉle ʉnʼshɨ waaho ʉnʉ wa wanʼgaala apaapile abhaana abhinji nanshi ʉLaaheli nʉ Leeya,* ʉLaaheli nʉ Leeya Bhashɨ bha Yaakobo (ʉIzilaeeli). Bhahali na bhaana ishʉmi na gabhɨɨlɨ. Bhaazya Wandilo (Mwanzo) 35:22-26. bha bhahali shifumo sheetu tibhaana Izilaeeli. Ʉhabhe muntu wɨ shʉʉma mu shikholo sha Bhaefulaati, na manyishe pi booma pa Beseleheemu. 12 Abhaana bhaala ʉYehoobha ahaihupeela hwa nʼshɨ ʉnʉ, bhahanyaame nanshi sha bhahanyaamile abhaana bha Peelesi. Bhaazya Luti 4:18-22. ɄPeelesi ʉla abhapaafi bhaakwe bhahali yʉ Yuuda nʉ Tamali.”

13 Ɨpo ʉBoohasi ahamwega ʉLuti, ahabha nʼshɨ waakwe. ɄYehoobha ahanʼtʉʉla ʉLuti, wope ahabha pa mwamu, ahapaapa ʉmwana ʉnʼsahaala. 14 Abhashɨ ɨbha pi booma ɨlyo bhahamʼʉʉzya ʉNaʉmi bhahaga, “Asayiwaaje ʉYehoobha ya piiye awe ʉholo ʉwa mu pɨɨpɨ ʉyo ahaihusʉnga. Ʉmwana ʉnʉ ʉnʼsahaala ahamanyishe mu nsi ɨya hu Izilaeeli. 15 Ʉmwana ʉyo anza hugwɨzye hu mwoyo na husʉnje lwa wagogoloha. ɄLuti ʉyo apapiiye ʉmwana, akʉndɨle. Akhondɨɨye ashɨle abhaana abhasahaala pʉnga (7).” 16 Ɨpo ʉNaʉmi ahamwega ʉmwana ʉla, ahamʼpagatila, na hwande hunʼsʉnje nanshi ʉmwana waakwe.

17 Abhashɨ abhapalamani bhahamʼpeela itaawa huje, yʉ Obedi, hwa huje ya hwavwa, bhahayanga bhahaga, “Ʉmwana apapwilwe hwa Naʉmi.”

ɄObedi ʉyo, ahamʼpaapa ʉYeese. ɄYeese ahamʼpaapa ʉDaudi.