2 Timoteo 1

Ibalula ya wuvili iya Pawulo kwa

Timoteo

Umulyango	Gina gakwali mu litaafili ili
1:1-2	UPawulo ikimuhunjila uTimoteo
1:3–2:13	Ikimuhonjesa uNguluvi kwa kiiva ya Timoteo na kimukhangasa inumbula
2:14–4:8	Umudimaaji isakulwa kidiima ishipuga sha vahuvililaaji na kikhaana amamanyiso ga wudehi
4:9-22	Aga kimaliisa

UPawulo ikimuhunjila uTimoteo

1 Ibalula iyi yihumile kunyangu one Pawulo, yuna nili mwanandeje wa Kilisito^a Yeesu, ngaja shina akhandi isakula uNguluvi. Wánihagulaga niyalaalise imola ya lutaahiso lwa wuumi kwa vaanu vina vikimuhuviilila uKilisito Yeesu. 2 Nikikuyandishila owe Timoteo yuna uli ngaja muswamu wangu mugani.

Imota, ulusungu nu wulindamafu kihuma kwa Nguluvi uWiheesu nu Kilisito Yeesu uMutwa weesu,^b five lumo noowe.

UPawulo ikimuhonjesa uNguluvi na kimujinia uTimoteo

3 Nikimuhonjesa uNguluvi yuna nikimusenjela kwa mahiiva amanofu, ngaja shina vamusenjelaga avambuyeesu vina valongolaga. Nikimuhonjesa uNguluvi shila luhaavi pina nikikukumbukha mu mafuunyo ishilo ni shiminsi. 4 Pina nikigakumbukha amaanyosi gaakho pina tihwesania, nina lihaahi mandu ilya kitangaana noowe, baheene nive nu wushendeefu mandu. 5 Khanji, nikilikumbukha ilihuuvi lyakho lya shiyooli. Ilihuuvi ilyo, akhandi analyope umaayi waakho uEwunike nu mbuyo uwa shidala uLoyisi umusava umaayi waakho, shiyooli na yuuwe unalyope. 6 Lulwene nikikukumbusa kiija, ujimbaje kishisenjela ishipeelwa shina wákupeelaga uNguluvi, pina nikhakuvishiile amawokho gangu. 7 Kiiva uNumbula yuna wátupeelaga uNguluvi asili wa kituviikha tive vatilaaji, leelo wa kitupeela ingufu, ulugano na kiyivavala.

8 Lino, usikhaveesaga ni nsoni kisibedela imola sa Mutwa weesu uYeesu Kilisito, khanji usikhawonaga nsoni kwa kiiva nili mu shifungo kwa kiiva ya mwene. Leelo ugugumilaje mu malava lumo noone kwa kiiva ya Mola iNofu, ngaja shina wipeelwa ingufu nu Nguluvi. 9 Umwene atukulwise, atuviishile tive vavalafu. Asikhagahile ilyo kwa kiiva ya njendo seesu inofu, leelo wágahaga kwa kiiva ya lugulumilo lwakwe ni mota yaakwe. Pina ashaanali kiwumba nyi, wágulumilaga kitupeela imota iyo kwa kimufilikha uKilisito Yeesu kiyinsa kitukulusa. 10 Lino, uNguluvi wáwonensa imota yaakwe kunyeesu, kwa kiyinsa uMukulusaaji weesu uKilisito Yeesu. Umwene wásimena ingufu sa mfwa, wáwonensa uwuumi wuna wungaya wudugo kwa nsila ya Mola iNofu.

11 One nabaagulwa nive mwanandeje, mumanyisaaji na mukhomaaji wa Mola iNofu iyo. 12 Mu ilyo nili mu malava, leelo nisiiwona nsoni kwa kiiva nimumeenye yuna nikimuhuviilila, khanji nimeenye kiija, ishiyooli sha Mola iNofu shina wánipeelaga,^c akwiliile kishiyangalila wunofu mbakha kifikha ilisiku lila lina uNguluvi akhavahiga avaanu. 13 Ugayinatilaje wunofu amamanyiso ga shiyooli gina nakupeelaga. Uwulanise ago na kisigala ni lihuuvi nu lugano mwa Kilisito Yeesu. 14 IMola iNofu yina wapelwagwa, uyiyangalilaje kwa ngufu sa Numbula uMunofu^d yuna ali mukhati yeesu.

15 Timoteo, owe umeenye avaanu woona va mu nyi ya Asiya vanileshile. Mukhati mu awo akwali uFegelo nu Helimogene. 16 Nilomba uMutwa avasungupile ava mu nanda ya Onesifolo, kwa kiiva wiila wiila akhandi ikiyiyishilisa inumbula yangu. Khanji, akhandi asiiwona nsoni kiyinsa kiniloleela pina nikhandi nili mu shifungo. 17 Leelo, pina akhayinsile mu lijumbi lya Luumi, wájimbile kinitavikha mbakha wányaagaga. 18 UMutwa uYeesu, amutanje uOnesifolo kipata ulusungu lwa Nguluvi uMutwa^e mu lisiku ilya kihigwa inyi. Na yuuwe umeenye wunofu aminshi gina anigahiile mu lijumbi lya Efeso.