Ibalula ya
Yaakobo
| Umulyango | Gina gakwali mu litaafili ili |
| 1:1 | UYaakobo ikivahunjila avahuvililaaji va Yeesu |
| 1:2-27 | Avahuvililaaji vasingamalaje mu lihuuvi mu luhaavi ulwa kijelwa, vave vaanu va kiyiyiisa mu njowo saanave |
| 2:1-26 | Avahuvililaaji vavasenjelaje wunofu avaanu woona, kusiina kibaagula, vaveesaje ni njendo inofu |
| 3:1–4:12 | Avahuvililaaji vaveesaje nu wumanyi mu njowo saanave na mu mafuunyo gaanave |
| 4:13–5:6 | Amamanyiso ulwa wusi |
| 5:7-20 | Kifuunya na kingʼangʼaanila ilihuuvi mu luhaavi lwa malava |
UYaakobo ikivahunjila aVayahuudi avahuvililaaji
1
1 Ibalula iyi yihumile kunyangu one Yaakobo, yuna nili muvanda wa Nguluvi nu Mutwa uYeesu Kilisito.a Nikivahunjila omwe Vayahuudi woona va fikholo ishumi na fivili, muna mupalankheene mu nyi nyinshi.Kigugumila mu lihuuvi uluhaavi lwa majelo
2 Vahuvililaaji vayangu, pina amajelo minshi gikivayinsila, shendeevaji mandu. 3 Mumeenye kiija, kijelwa kwa lihuuvi lyenyu, kukivagaha omwe mugugumile mu majelo. 4 Mugugumilaje shiisho, kwa kiiva kukivagaha mukhangale mu lihuuvi na musishepushilwa shoshoona mu njendo seenyu.
5 Leelo nda munyeenyu muna muunu yuna angaya wumanyi, isakulwa afuunye kwa Nguluvi, baheene uNguluvi asimupeele. UNguluvi ikivapeela avaanu ifiinu finshi kwa numbula mbalafu na asikivakhajila. 6 Leelo pina ikimulomba uNguluvi amuhuvililaje, asikhaveesaga nu muninu, kwa kiiva umuunu yuna ana muninu mu numbula, ihwanana na mavingu gina giyumfisiwa ni lipepo kuno na ukho mu bahali. 7 Umuunu yuna ali ndeeno, asikhayihuvililaga kiija, uMutwa uNguluvib akhamupeela shiinu shoshoona shina wálomba, 8 kwa kiiva ana mahiiva gavili, kusiina uluvala luna ayiimile.
Avapiina na vanya wusi
9 Umuhuvililaaji umupiina isakulwa kishendeeva, kwa kiiva uNguluvi amutupiishe. 10 Hata ndeeno kishendeeva kwa munya wusi, kuve kwa kiiva uNguluvi amuyisiise. Umunya wusi uyu asiishile ngaja wuluva wa mu lihakha. 11 Ilijuva pina liikhola, ifimelo fiyuuma, uwuluva wiigwa wusinojela khanji. Shiisho ndeeno hata umunya wusi woope, pina ashaanali iilava mu nsengo saakwe, umo mumwene ifwilila.
UNguluvi asikivakwehelesa avaanu ku wunansi
12 Shiba umuunu yuna igugumila mu lihuuvi uluhaavi lwa majelo, kwa kiiva pina akhagamena amajelo, uNguluvi akhamupeela uwuumi wa shiluta. Uwuumi uwo wuweene wukhava lutonoc lwakwe, ngaja uNguluvi shina wávatahisaaga woona vina vamugeene.
13 Uluhaavi luna umuunu ikwehelesewa kigaha uwunansi, asikhajovaga kiija, “Kikwehelesewa kuno kwihuma kwa Nguluvi,” kwa kiiva uNguluvi asikwehelesewa nu wunansi. Khanji uNguluvi asikimukwehelesa umuunu yoyoona kigaha uwunansi. 14 Leelo shila muunu iijelwa pina ikwehwa nu wupafu waakwe uwa kigaha uwunansi. 15 Wuhwanana nu washimaayi pina iipata ulwanda, paanyuma uwupafu wiisava uwunansi. Uwunansi uwo pina wakhangala wukimuleetela imfwa.
16 Vahuvililaaji vayangu vagani, musikhajangwaji. 17 Shila shiinu ishinofu shina tipeelwa, shiihuma kwa Nguluvi, uMuwumbaaji uwa fyona fina fimulikha kushaanya. Ifyo fina fimulikha, fisimulikha luhaavi loona, uluhaavi ulunji fiisima. UNguluvi asili ngaja fina fimulikha na kisima, umwene asiseetukha seetukha, munofu luhaavi loona. 18 Kwa kidobokha yumwene, wátugahaga tive vanaakwe kwa liswi lyakwe ilya shiyooli. Wágahaga ago, baheene tive fiwumbwa finofu kishila ifiwumbwa fyakwe fyona, tihwaneene ni sadaakha ya nkungulo iya wutasi yina yihumisiwa kunyaakwe.
Kipulikha iLiswi lya Nguluvi na kiliyinatila
19 Vahuvililaaji vayangu vagani, munipulisaaje wunofu! Munyeenyu asikhaveesaga akwali umuunu umupeefu kilogola angaya kihiviilila, leelo tangusiina ave ipuliisa. Khanji asikhakhalalaga nyangu, 20 kwa kiiva umuunu umunya nkhalasi asikwiliile kigaha gina idobokha uNguluvi. 21 Lino, wuleshi uwunansi woona nu wuvi wuna wushilile, na kiposheela kwa wuhuugu iliswi lila lina lyavyalwagwa mu numbula seenyu. Iliswi ilyo likwiliile kivakulusa omwe.
22 Khanji omwe musikhayijangaji kiija, musiive mwipulikha hela iLiswi lya Nguluvi. Leelo hata ndeeno omwe muveesaje mwisenga ngaja shina liijova. 23 Umuunu yoyoona yuna akhava ipulikha hela iLiswi lya Nguluvi, leelo asisenga shina liijova, uyo akhava ngaja umuunu yuna ikiyiloleela mu shilole. 24 Pina wáamala kiyiloleela, uluhaavi luna iwuukha pa shilole, luhaavi luulo isaamwa shina ashwali. 25 Leelo umuunu yuna iloleela wunofu indaji inofu ya Nguluvid yina yileeta uwuyeeshelo, umwene asiyimiililwe nda igugumila na kipuliisa iyo indaji asisaamwa shina wápulisaaga. Ndeeno umuunu nda ikigahuviilila ago, khanji ikigayinatila, uyo yumwene asiyimiililwe mu gala gina iigaha.
26 Umuunu nda ikiyiwona ana diini, leelo asikiyisivila mu malogolo gina gasifwaya, uyo ikiyijanga, idiini iyo yisikimutanga shiinu. 27 Idiini inofu yina uNguluvi uDaada isakula, umuunu aveesaje ikivatanga avaana avapiina na vashimaayi avafwile mu malava gaanave. Khanji ayivavalaje ni njendo imbi isa vaanu vina vasikimuhuviilila uNguluvi, kiija vasikhamuyasaaga.