Mark 3

Jisu'n kut khat thi amin dam

(Mat 12:9-14; Luk 6:6-11)

¹ Hanchu, Jisu ha Synagogue a se nôka, mahan mi inkhat a kut phalkhat thi a lei oma. ² Hanchu, Sabbath ni ani sikin Jisu ral ngeiin ama an dem theina rangin Sabbath ni mi a min dam pupui mo ti'n an en richika. ³ Jisun kut phalkhatthi kôma han, “Moton tiang juong inding roh,” a ti pea. ⁴ masuole chu Jisu'n loko ngei kôma han, Ei Balam Sabbath ni khoi mo ei tho rangin mi a phal? Asa sin mo, asie mo? Mi ringna mojok mo, nonte mi minmang mo?

Ti'n arkela. Hannirse an daireka. ⁵ Anni hah a en ngeia a taksi oka nikhomrese, an mulung ngar reina leh an dikloi reina hah a riat sikin asan a jâm a minzala. Masuole chu ha pu kôma han, “Nu kut lang roh” ati pea. Ama a kut alanga hanchu a dam nok zoia. ⁶ Hanchu Pharisai ngei hah synagogue renga an joka, Herod pâl a mi senkhat ngei leh an chonga, Jisu an that rang lam an mintua zoia.

Jisu dil panga mi a mindam naroi

⁷ Hanchu, Jisu leh a ruaisi ngei ha Galilee dil tiang an se kelena, loko tam tak in an jui sa a. Ha mi ngei ha Galilee ram renga, Judea ram renga, ⁸ Jerusalem renga, Idumea ram renga, Jordan ral nisua tiang renga Tyre leh Sidôn khua kolvela hong ngei ani. Ha mi ngei hah Jisu sininkhel an lei riat sika hong anni. ⁹ Loko tam sika ama an neng rei loina rangin Jisu a ruaisi ngei kôma, rukuong inkhat lei khai pe rangin chong a bea. ¹⁰ Mi tam tak a min dama, ha anghan ana ngei murdi ama an tôn thei na rangin an inbûmlula. ¹¹ An sunga ramkhori dôn ngei khomin ama an mu racham inbokin, “Nangma Pathian Naipasal ha nini!” ti in an het ngâia.

¹² Hanchu, Jisun ramkhori ngei kôma han, chong ngartakin, tumo aini ha tute kôma an misir loina rangin he abe ngeia.

Jisu tirton somleiniek ngei athang roi

(Mat 10:1-4; Luk 6:12-16)

¹³ Hanchu, Jisu muôl chunga a sea, ama'n a nuom ngei kei a koia. Anni ngei ha an juia. ¹⁴ Masuole somleinik ngei a thang a, “Ha ngei ha tirtonngei ti in riming a phuoa, an kôma, ko kôma om rangin nang ni ka thang ani,” chong ril rang khom nangni tîr suak ka ta, ¹⁵ ramkhori ngei rujul pei theina ranak khom nei nin ti a ti pe ngei a.

¹⁶ Somleinik a thang ngei ha hi ngei hih an ni; Simon (Peter ai phua pu); ¹⁷ Zebedee naipasal Jacob leh anaipa John (Boanerges a phua ngei hah, ma ha “Khunri nai ngei tina ani”); ¹⁸ Andrew, Phillip, Bartholomai, Matthew, Thomas, Alpheaus naipasal Jacob, Thaddeaus, cananite mi Simon, ¹⁹ a min sûr pu Judas Iscariot.

Jisu leh Belzabul

(Mat 12:22-32; Luk 11:14-23—12:10)

²⁰ Hanchu, Jisu ha in tiang a kir nok zoia. Loko ngei hah an juong intûp nôka, Jisu leh a ruaisi ngei ha sak zong zora lua man mak ngeia. ²¹ Mahah a insung mi ngeiin an riatin chu ama tuong rangin anin thoka, loko ngeiin, “Achang ke ani zoi!” an tipe ngei sikin.

²² Balam minchupu senkhat Jerusalem renga juong ngei han, “Belzabul ke ani! Ramkhori ngei reng keh, ramkhori rijulpei theina ranak a kôma a pek ngâi” an tia.

²³ Hanchu, Jisu'n anni hah a koia, chongmintekin chong a rila; “Kho angin mo soitan in soitan arjul thei ranga, ²⁴ Rambung khom athenin an doiin chu ha rambung hah inding thei no nih. ²⁵ Inkua khat khom athenin an doiin chu inding thei no nih. ²⁶ Ha anghan, soitan khom athenin an doiin chu inding thei loin a inmang rang ani.

²⁷ “Tute'n mirat inah lutin a neinun lak pe thei ngâi mak, mirat hah an khit bakin ke a neinun an muruk thei ngâi.

²⁸ “Nangni ki ril Miriam nai ngei hih an siatna murdi leh Pathian an rilsiatna murdi la ngâidam ni ati. ²⁹ Nikhomrese, tukhom Rathanthiang lele ero pu chu ngâidam reng om khai no ni, tuonsôt siatna a sin ani sikin” a tia. ( ³⁰ Mahah Jisu'n, “Ramkhori a nei ke” an ti sika a ti ani.)

Jisu Nu leh Anaipa ngei

(Mat 12:46-50; Luk 8:19-21)

³¹ Hanchu, Jisu nu leh anaipa ngei an honga. Khalaia anin dinga, ama koi rangin mi an tîra. ³² Jisu kola loko an insunga, ha mi ngei han a kôma, “En roh, Nu nu leh na naipa ngei leh na sarnu ngeiin nang an roka, khalaiah son an om,” an ti pea.

³³ Jisu'n an kôma, “Tu ngei mo ku nu le ka naipa ngei?” Ti'n a thuona ³⁴ Hanchu, a kola ansung ngei hah a en ngeia, an kôma, “En ngei roh! Hi ngei hih ku nu leh ka naipa, ngei anni! ³⁵ Tukhom Pathian nuom lam a sintho keichu ka naipa ngei, ka sarnu ngei, ku nu ngei an ni” a tia.