4
Sachi rethe chongmintek
(Mat 13:1-9; Luk 8:4-8)
1 Hanchu, Galilee dil rakhama Jisu'n aminchu nôka, Loko a kôma juong intup ngei hah an tam rei sikin rukuonga a chuonga, an sunga, loko ngei hah chu dil rakhama tanga han an oma. 2 Hanchu, chongmintekin thurchi tam tak a rila, ankôm han:
3 “Rangâi roi! voikhat chu mi inkhatin bu rit rangin a sea. 4 Sachi arthea, senkhat lampui kolah a chula, va ngeiin an sak ripa. 5 Senkhat lungpherpha pil chungah a chula, pil an phân rei sikin a hong mong kelena, 6 Hannirse, nisa a hong insangin chu a em minjuota, ruzung a mathak hah anthuk loi sikin aram ripa. 7 Senkhat chu riling kara a chula, riling han a dipa, amara reng nei khaimaka. 8 Nikhomrese, senkhat chu pil sana a chula, a hong keia, a hong insôna, a vuia: senkhat somthumin, senkhat somrukin, senkhat rajakhatin a hong pung zoi” a tia.
9 Hanchu, Jisu'n a chong khar nan an kôma “Kuor nin dôn anin chu rangâi roi!” ati pe ngeia.
Chongmintiek ngei tumna
(Mat 13:10-17; Luk 8:9-10)
10 Hanchu, mun inthimngang na a om lain a kôma han a ruaisi ngei leh mi dang om ngei han chongmintek ngei ha rilminthar rangin an rekela. 11 Jisu'n an kôma, “Pathian Rengram chonginthup riat theina nin kôma pek ani.” Hannirese, “Mi dang pêntianga om ngei rangin chu chongmintek vei in misir pe an ni,
12 a ‘An en an en khoma an mu
loina rang leh;
An rangâi an rangâi khoma,
an riat thei loina rangin.
Ma ang ninon chu Pathian tiang maithak nôk an ta,
Aman lei ngâidam duoi ati’” a tia.
Jisu'n chongmintiek a ril mintharna
(Mat 13:18-23; Luk 8:11-15)
13 Hanchu, Jisu'n an kôma, “Hi chongmintiek hih nin riat thei loi mo? Ha anghan aninte kho angin mo chongmintiek dang ngei ngan khom nin riat thei ranga? 14 Sachi rethepu han Pathian chong arthe ani. 15 Mi tam tak chu, sachi lampui kola chul ang hah an ni, chong hah an riat suoleh soitan a honga an mulungrila om hah alak pe ngei ngâi. 16 Mi senkhat chu sachi lungpherpha chunga pil chunga chul angha an ni. Thurchi hah an riat lehan raisan takin an pom kelen ngâia. 17 Nikhomrese, ruzung inthuk an mathak loi sikin om sôt ngâi maka. Thurchi sika intakna mini nuamlôna, duktôngna mini a hong om le han chu anin let nok kelen ngâi. 18 Mi senkhat chu sachi riling kara chul angha an ni. Ha ngei hah chu thurchi arangâi ngei hah an ni, 19 nikhomrese, an ringnuna, rammuol hoina leh neina leh kho khoi adang an oina ngei a hong luta chong hah a dipa, mara musua ngâi mak. 20 Hannirseh, mi senkhat chu pil sa na a chul ang hah an ni. Chong hah an riata, an poma anra a: senkhat somthumin, senkhat somrukin, senkhat rajakhatin an hong pung zoi, a tia.”
Bêl nuoia meiser
(Luk 8:16-18)
21 Jisu'n an kôma ati pe ngei nôka, “Tumo, Meiser hong chôia adar na munah dar loia, bêl nuaia mo ani non chu zalmun nuoia mini a dar ngâia? adar namun na ke an va dar ngâi nimak mo? 22 Anthup murdi tang la musua la ni a ta, ihip murdi likpei la ni a ti. 23 Kuor nin dôn inchu rangâi roi!” a tia.
24 Hanchu, Jisu nanakin an kôma, “Nin chong rangâi hih asadimin mindôn roi! Mi nin zekna nanak hah Pathianin nangni zekna mang a ti, nangni min rik pe uol a ti. 25 Tu tukhom anei pu chu bok pek sa an ta, tukhom anei loi chu a nei viet te khom lak pe rip an ti,” a tia.
Chimu chongmintiek
26 Jisu'n thurchi a misir laitakin, an kôma, “Pathian Rengram chu hi anghin ani. Mi inkhatin a loia chimu arthea. 27 Hanchu a sea, a van ngama zana a inna an thoi a sûn ngei ha a va manga, a riat loi karin chimu hah a hong keia, ahong insôn zoia 28 Pil ha athen a kung hah amin sôna, mara amin neia; a motona akung a hong suoka masuole avui a, a nuktaka a ramal sip buvui a hong oma. 29 Bu hah amin tenah chu a at zora a hong tung zoi sikin a koite lakin bu at a phut ngâi anghan ani, a tia.
Ancham ru chongmintiek
(Mat 13:31-32; Luk 8:11-15)
30 Jisu'n an kôma, “Pathian Rengram hih imo a ang ei ti rang ani zoi? Khoi chongmintiek mangin mo ei ril minthar rang ani zoi? 31 Mi inkhatin ancham ru rammuola chimu murdi laia a chin tak ramal khat a laka, pila atu a. 32 Chomolte suole chu a hong monga, chimu murdi laia a liantak a hong ni ngâi. Machang lian tak ngei a hong neia, va ngei khom rubu an phana mahan an riek thei angha ani” a tia.
33 Ha anghan chongmintiek tamtak mangin an riat thei rang do-dorin Jisu'n loko ngei kôma thurchi a misir pe ngâia. 34 Chongmintiek ninon chu an kôma, thurchi misir ngâi maka; nikhomrese, a ruaisi ngei leh vei an om zorran chu itinreng a ril minthar pe ngei ngâia.
Jisu'n phaivuopui a min ngam
(Mat 8:23-27; Luk 8:22-25)
35 Mani nanaka han kholoi a hong nin chu Jisu'n a ruaisi ngei kôma, “Dil ral tianga son van kan ei ti” a tia. 36 Masuole chu loko ngei ha an maka, Jisu a lei insunga rukuonga han ruaisi ngei hah an luta, ama khom an tuonga. Rukuong dang ngei khom an om sa a. 37 Inningloi rengin phaivuopui rattak a hong tho a, tui dar insok khom hah rukuonga a luta a sip vang zoia. 38 Jisu chu lukham khamin rukuong remei tianga han a lei in a. Hanchu ruaisi ngei han an keithoia a kôma, “Minchupu kinin mang rang hi mina san loi rang mini?” an tia.
39 Hanchu, Jisu an thoia, phaivuopui hah a ngoa, “Mong inla, omchien roh” a tia. Hanchu, phaivuopui hah a monga anthimruoi zoi a 40 Masuole chu Jisun ruaisi ngei kôma “Khoi tho mo ma angtaka nin chi hi? taksôna reng nin la nei loi mini?” a tia.
41 Nikhomrese, an chi sabaka, “Hi mi hih tumo ani hi? Phaivuopui leh tuidar insok tena khomin a chong an dôn hi?” anin tia.