Mark 5

Ramkhori sur Jisu'n amindam

(Mat 8:28-34; Luk 8:26-39)

¹ Jisu leh a ruaisi ngei hah Galilee dil ral, Gerasin ram an hong tunga. ² Hanchu, Jisu hah rukuanga renga a hong jok lehan, ramkhori a sur thaan tiang renga hong suak mi inkhatin a tônga. ³ Ha mi hah, thana omngâi ania. Tuten thir rui leh luo khomin khit thei mak ngeia; ⁴ Voi tamtak akut ake an lei khita, nikhomrese, an khitna zingjirui hah a pot sata, a kea thirkol ngei khom a khiak chit ngâia. A rât rei sikin tuten an mane theiloi ani. ⁵ Sunah, janah, thana leh tangah han a het a, lungin an at ngâi a.

⁶ Hanchu, alajan in Jisu rang a hong mu reng han a hongtana, amakungah an boka, ⁷ rol inring takin a het a, “Jisu, Pathian inchungtak Naipasal, khoimo milo rang niti? Duk mitho tet loi rangin Pathian rimingin nang ki ngen!” a tia. ( ⁸ Hih a ti na bi chu Jisu'n, a kôma, “Nangma ramkhori, amapa sung renga hih hong jok roh” a lei ti zoi sika ani).

⁹ Jisu'n a kôma, “Khoimo ni riming!?” ti'n arkela.

A kôm han, “Kirming chu (Mob) ‘isang isep’—a tam kin ni” tin a thuana. ¹⁰ A ngen nôka, ha ram renga hah ama a rujul pei loina rangin Jisu kôm han a ngen ngita.

¹¹ Hanchu, ha mun kola mual pangah sak a rok vok tamtak an oma. ¹² Masikin ramkhori ngei han, “Vok ngei kôma son mitîr inla, an sunga miminlut roh” ti'n Jisu kôm a ngena. ¹³ Ha angahan Jisu'n aphal pea. Hanchu ramkhori ngei hah Miriam sung renga an suaka vok ngei sungah an luta. Vok pal ngei hah an rengin isangnik dor an nia, an rengin rolah an tana, dila anin choma, an thi let zoi a.

¹⁴ Hanchu, vok avai ngei hah an tan na, khuo leh loi ngeia han thurchi hah tang an va hai a. Hante, neinun inkhel omlam en rangin loko ngei anse a. ¹⁵ Jisu kôm an tungin chu ramkhori isang isep surpu hah puon silin mulung sing vanga insungin an va mua, an chi zoia. ¹⁶ Hanchu, amu ngei han ramkhori surpa chunga sin omlam leh vok ngei thurchi an lei rila.

¹⁷ Hanchu, ha ngei han Jisu hah an ram renga suak rangin an ngen zoi a.

¹⁸ Hanchu, Jisu rukuonga a chuong rang totoin ramkhori surpa han Jisu kôma, “Nokôm hong ki ti!” tin a ngena.

¹⁹ Hannirse, Jisu'n phal maka. A Phal nekin, “Ni inmi ngei kôm senla, Pumapa'n sin nang a tho pe lam leh lungnang aminkham lam hah va ril roh” a tipea.

²⁰ Ha angahan, hapa hah a sea, Khopui som ngei hah a cheia, Jisu'n ata ranga sin a tho pe ngei hah a misira, ha a misir a riat ngei kei chu asan ankhel sabak hi an tia

Jairus' Nainupang leh Nupang Jisu puon tôn Nu thurchi

(Mat 9:18-26; Luk 8:40-56)

²¹ Hanchu, Jisu'n hah rukuong leh varal ahong kai nôka, dil pangah loko tamtak a kôm an hong intupa. ²² Hanchu, synagogue in ulianpu arming Jairus a honga, Jisu amu lehan, Jisu ke kungah an boka, a kôma, ²³ “Ka nai naipangnu ana sabaka, masikin juong inla, a hong har nôka a dam theina rangin nu kut in mi juong tôn pe roh!” tin a ngen ngita.

²⁴ Ha anghan, Jisu hah ama leh han an sea, loko tam takin an juia, an ep rei sikin an innengin an innenga.

²⁵ Mahan, nupang inkhat kum somleinik thi suoka damloi a oma. ²⁶ Doctor tam takin an dônsui suonuk khomin la dam thei maka. A sum dôn murdi a heklet zoia, nikhomrese dam nekin inrikin an rik pe uala. ²⁷ Hanu han Jisu thurchi a riata, loko karah Jisu nuka a honga, ²⁸ a mulung rillin, “A puan luo khom tôn inlang, dam kelen ki ti” a tia.

²⁹ Ha anghan a puan a tôna, a thi suak ha harenghan a mong pita; a nana hah mindam ani zoi tiin, an riat kelen zoia. ³⁰ Jisu'n a sung renga sinthotheina asuok ti a riat kelena, hanchu, loko laiah han a en titira, an kôma, “Tumo ku puon atôn?” Ti'n arekela.

³¹ A ruaisi ngeiin a kôma, “Loko ngeiin mador nang an neng reng nang an neng hih numu nimak mo khoi tho mo tumo ku puan atôn niti hih?” an tipea.

³² Hannirse, Jisun chu a puon tônpu mu rangin a en titira. ³³ Hanchu, nupangnu han a chunga Jisu sintho dan hah a riat inchu chi leh innik pumin a honga, a ke kunga khukinbillin, thurchi hah asadimin a rilleta. ³⁴ Jisu'n a kôma, “Ka nainupang, na taksona hin nang amindam ani, rathangngam takin senla, na nana renga hong dam riam taroh” a tipea.

³⁵ Jisu ala chonglai takin thangthei senkhat Jairus in renga an honga, Jairus kôm, “Na nainupang lua athi suazoi, Khoithomo Minchupu nala zel banga?” an tia.

³⁶ Jisu'n chu an chong hah uksak maka Jairus khom han, “Chi nonla, iem ngit roh” a tipea. ³⁷ Hanchu, Peter, Jacob leh anaipa John telloin chu tute ama jui rangin phal maka. ³⁸ Hanchu, Jairus inah an va tungin chu Jisu'n rahang rattaka chap ngei leh an ieka, anngui ngei hah ava mu ngeia. ³⁹ In sunga a luta, an kôma, “Khoi tho nin chapa? Khoithomo nin innguia? Hi naipang hi athi nimaka—a in keng ani!” a tia.

⁴⁰ Anni han ama an munuisana, masikin an rengin anottuor ngei leta, naipangnu a nu leh apa leh a ruaisi inthum ngei leh naipangnu jalna khaltana han an luta. ⁴¹ Hanchu, naipangnu kut hah a sura a kôma, “Talitha kumi” atia, mahah, “Bongnu, inthoi roh nang ki ti!” itina ani.

⁴² Hanchu, ha nupangte hah harenghan a hong inthoia, a lôn thei kelen zoia. (Amahah kum somleinik nupangte ani) Ha anghan a hong ninchu ankhel hi an ti sabaka. ⁴³ Nikhomreseh, Jisu'n tute ril tet loi rangin he abe khapa, hanchu, “An kôma asak rang imokhat pek roi” a tia.