Mark 6

Nazareth mi ngeiin Jisu hengin a om

(Mat 13:53-58; Luk 4:16-30)

¹ Jisu'n ha mun hah a maka, a omna ngâi khuo tiang ase nôka, a ruaisi ngei khomin an jui tita. ² Sabbath nin chu Synagogue a mi a minchua. Mahan mi tamtak an oma; a chongril an riat inchu kamam a om tatak an tia, “Hi mi hin hi thurchi ngei hih kho renga mo ai riat?” an tia. “A kôma, khoi varna mo pekin a om hih? Kho angin mo sininkhel a sin thei hi? ³ Mary naipasal, mistri sin ngâi, a laibung ngei khom Jacob, Joseph, Juda leh Simon ngei nimak mo? A sarnu ngei khom ei kôma an om ngâi nimak ngei mo?” an tia. Masuole chu ama hah an dem zoia.

⁴ Jisu'n an kôma, “Deipu chu a khuo leh a sungsuok ngei leh a inmi ngei laiah tiloi inchu mun tinah mirit an pek ngâi a tia”.

⁵ Ha muna han chu damloi tomte chunga kut tôna amin dam tiloi chu ite sininkhel dang sin thei khaimak. ⁶ Loko ngeiin taksôna an nei loi sikin akamam oka.

Jisu'u ruasi somleinik ngei a tîrsuokna

(Mat 10:5-15; Luk 9:1-6)

Hanchu, Jisu'n ha revela khua ngei achei titira, loko ngei aminchu tira. ⁷ Hanchu, ruaisi somleinik ngei a koi mintup ngeia inik, inikin a tîrsuoka. Ramkhori ngei chunga rachamneina a peka, ⁸ an kôma, “Nin cheina khiangrol tiloi chu ite vaipol khom, choli khom, nin zepah sum khom chôi no roi. ⁹ Kekhok chu bun ungla, hannirse, kanchili insak chu chôi noroi” ti'n chong a be ngeia. ¹⁰ Hanchu, ama nanakin an kôma, “Nangni an min tungna in takah han ha mun nin mak maka chu om tit roi. ¹¹ Hanchu, tu khuo khomin nangni an modôm noa nin chong an rangâi non chu makrak ungla, nin kea rabab a kop ngei hah khong liai roi maha anta rangin inning roi tina ani.”

¹² Ma anghan an se nôka, loko ngei insirna rangin thurchi an rila. ¹³ Ramkhori tamtak an rujulpeia, damloi tamtak Oliv sariek an pola an min dam zoia.

Baptispu Johan thina roi

(Mat 14:1-12; Luk 9:7-9)

¹⁴ Hanchu, Jisu riming mun tinah an thang zit sikin Reng Herod'n a lei riata. Mipui senkhatin chu, “Baptistpu John hah a hong ring nok zoi! Masikin ke hi sininkhel sin theina ranak hi a dôn,” an tia.

¹⁵ A dang ngeiin chu, “Elizah ani” an tia.

Midang nokin chu “Tiana Deipu ngei anga inkhat ani” an tia.

¹⁶ Mahah a lei riata, Herod ti'n chu, batistpu Johan ani! “Alu ka tana nikhomrese, a hong ring nôk ani!” a tia. ¹⁷ Herod lele'n Johan hah amin sura, khitbelin jel inah a lei khum ani. Herod tin hi anga a tho nachu, anaipa Phillip lomnu Herodias hi alomnu rangin anei nôk sika ani. ¹⁸ John'n Herod kôma, “Nanaipa lomnu ni nei nôk hih Balam ni mak!” ti'n a lei ril tit ngâia.

¹⁹ Masikin Herodias han Johan amumaka a that nget rang a bôka nikhomrese, Herod sikin that thei maka. ²⁰ Herod in John hah misa leh minthiang ani ti a riat sikin a chia, a mojok ngâi ani. Johan chongril a riat racham asan inzel ngâi khomrese, a chongril rangâi rang a nuom ngâi ani.

²¹ Hanchu, Herod a suok nikhua a hong tung inchu sorkar ulian ngei leh sipai ulian ngei leh Galilee rama mi lian ngei rangin bukhalai otna aminsûka, ha nin chu Herodias in chuminren aman zoia. ²² Herodias nainupang a hong luta, a lama, Herod leh a khuolmi ngei rai aminsan oka. Masikin, Reng han naipangnu kôma han, “Khoi mo a dôn nu nuom? Nu nuom tak nang pek ki ti” a tia. ²³ Chonginkham tamtak neiin a kôma, “Khokhoi khom mini zong kei chu ke rengram phalkhat ten khom nang pek rangin chong ken kham” a tia.

²⁴ Hanchu, naipangnu hah a joka, anu kôma, “Khoi mo ko zong rang?” ti'n ava rekela.

Anu'n, “Baptistpu John a lu” ti'n a lei ti pea.

²⁵ Masuoleh chu, naipangnu hah innot takin a sea, Reng kôma han, “Atun Baptistpu Johan a lu mairanga mini pek rangin ku nuom” ti'n a zonga.

²⁶ Hanchu, reng hah a mulung duk atông oka, nikhomrese, a khuolmi ngei makungah chong alei inkham sika han makhal thei khaimaka. ²⁷ Masikin reng han a otpu sipai inkhat a tîr kelena, Johan a lu hong lak rangin chong a peka. Hanchu, aman intang ina a sea. Johan lu ava tana; ²⁸ Masuole chu, mairanga a hong chôia, naipangnu kôma a peka, naipangnu han anu a va pek zoia. ²⁹ Ha roi hah a ruaisi ngeiin an riat lechu an honga, Johan ruok hah an chôia, an phum zoia.

Jisu'n mi isang ranga avaina roi

(Mat 14:13-21; Luk 9:10-17; Jon 6:1-14)

³⁰ Hanchu, tirton ngei hah Jisu kôm an kir nôka, an sintho murdi leh an minchu murdi Jisu kôm an rila. ³¹ Loko ase a hong an tam rei sikin Jisu leh a ruaisi ngei chu bu nek manmak ngeia. Masikin ankôma, “Tho ei then veia ei om theina rangin se ei ta van ngam rei u” a tia. ³² Hanchu, mun inthimna panin an theiviek in rukuonga an se zoia.

³³ Nikhomrese, loko tam takin an se lai an mua, anni ngei ti an riat kelena, khuotin renga mi ngei lampui tin hin an hong tana, Jisu leh a ruaisi ngei hah an lei chontana. ³⁴ Hanchu, Jisu hah rukuong renga a juong chuma inchu loko tamtak a mua, belri a holpu boi angha anni sikin inriang amu ngei tataka, riatruo tamtak a ril ngeia. ³⁵ Hanchu, kholoi a hongni zoia, a ruaisi ngei hah Jisu kôm an honga, a kôm, “Mahih mun inthim ke ania, nisa khom ase ok zoia, ³⁶ Anni ngei hih ei kol ei kienga, loia mo, khua mo tîr inla, an sakrua imokhat rochok rese ngei” an tia.

³⁷ Jisu'n an kôma, “Nangnin sakrua imokhat pek ngei roi,” ti'n a thuona.

Hanchu, annin a kôma, “Vaipol (denarius^a) rajannik man varchokin kin pek ngei rang mini?” ti'n an rekela.

³⁸ Masikin Jisun an kôma, “Vaipol kho dor mo nin dôn? Se ungla, va en roi” a tia.

Hanchu, an dôn dor an riat le chu, “Vaipol ranga leh nga inik” tin an rila.

³⁹ Masuole chu, Jisu'n, loko ngei hah an lop lopin minsen ungla, sul chunga minsung ngei rangin ruaisi ngei he a bea. ⁴⁰ Ha angin loko ngei hah athen thenin rajakhat lopin leh, somranga lopin an minsung ngeia. ⁴¹ Masuole chu Jisun vaipol ranga leh nga inik hah a laka, invân tiang tangin Pathian kôm raisan chong rila. Masuole chu vaipol hah a khoia, loko ngei sem pe rangin a ruaisi ngei kutah a peka. Nga khom hah an renga sem pe ngei rangin a pek sa a. ⁴² Mitinin an saka an khop chita. ⁴³ Hanchu, an sak suoloi vaipol har leh nga ronoi tabong somleinik ruaisi ngeiin an rut minsipa. ⁴⁴ A vai ngei hah mi ulian pasal korong isang ranga anni.

Jisu tuichunga alônna

(Mat 14:22-23; Jon 6:15-21)

⁴⁵ Hanchu, loko ngei aminchin suole varal tianga Bethsaida khuah a motona lei se rangin ama nanakin a ruaisi ngei rukuonga amin chuong ngeia. ⁴⁶ Loko ngei hah chong abe joi inchu chubai thona nei rangin muol chunga a sea. ⁴⁷ Kholoi a hong ninchu rukuong hah dil anlaina takah a oma, ama chu athen veiin tanga a oma. ⁴⁸ Hanchu, an rukuong jap hah an mulung jing okin a mua, phaivuo hah anôk tiang asêm sikin. Hanchu, jing kolinsaluam rangto in dil chunga lônin anni tiang a hongpana, anni ngei khelpai rang angin a oma. ⁴⁹ Nikhomrese, anni han dil chunga a lôn an mu inchu mirluoi mini an tia, an het ra-raka. ⁵⁰ Ama an mua, an rengin an rathataka.

Harenghan Jisu'n an kôma, “Phukdai takin omroi. Keima ke kini, chino roi!” atipe ngeia. ⁵¹ Hanchu, an kôm rukuonga han a chuong sa a, phaivuo hah a monga. Ruaisi ngei chu an kamam sabak a, ⁵² An mulung anngar rei sika isang ranga avaina roi omzia diktak hah an riat thei loi sikin.

Jisu'n Genesaret rama damloi ngei amindam

(Mat 14:34-36)

⁵³ Hanchu, dil ral an inkanna, Genesaret rama an tunga, mahan an rukuong an thunga. ⁵⁴ Rukuong renga an chuma joiin Jisu ani ti mi ngeiin an riat kelena. ⁵⁵ Ha ram pumpuia mi ngei an hong tan huhuaka, a omna an riatna tena a kôma damloi ngei an zampher pumin an hong rojona. ⁵⁶ Hanchu Jisu ase na muntina, khuah mo, khopuia mo, loia mo, bazara akhom damloi ngei an hong tuonga, a puon mor lua tôn thei rangin phalna an ngenna. Ha anghan atôn murdi chu an dam paka.