Mark 12

Grep ruhuon leh adônsuipu ngei chongmintiek

(Mat 21:33-46; Luk 20:9-19)

¹ Hanchu, Jisu'n chongmintiekin ankôm thurchi a misira, “Voikhat chu mi inkhatin grep ruhuon a thoa, a minkula, grep somna rang khur a choia, in insang a sina. Hanchu, loi a dônsui ngâi ngei kôm a chuon inlo rangin a peka, ram dangah khuol ava se zoia. ² Hanchu, grep pot zora a hong nin chu a changtum lak rangin a dônsuipu ngei kôm a suak inkhat a tîra. ³ A dônsui ngeiin a suak hah an lei sura, an jema, kut korongin an min sea. ⁴ Hanchu, aman suak dang a tîr nôka; ha khom hah alu an lei mophop pea maimok an lei sak bita. ⁵ Ma ang denhan suak dang a tîr nôka, amapa chu an lei thata. Suak dang tamtak khom senkhat an lei jema, senkhat an lei thata. ⁶ Hanchu, inkhat nai moroi tak ala dôna; ‘Ka naipasal hi chu merît lei tho nget an ti’ ti'n a naipasal hah anuktakah a tîra. ⁷ Hannirseh, ha ruhuon dônsui ngei han, ‘Hipa hih ruhuon Pumapa naipasal ani hi. Hong ungla, that ei ta, archon hih ei lua rang!’ tin an inzeka. ⁸ Ha anghan anaipasal hah an sura, an thata a ruak khom grep ruhuan pêntiang an paia.

⁹ “Aninte, ruhuon Pumapa han khoimo alo ngei rang ni zoi?” ti'n Jisu'n arkela. “Hong a ta, ha mi ngei hah that a ta, grep ruhuon hah a dônsui rangin midang rang pek a ti. ¹⁰ Hi Pathian chong hih nin pore loi mini?

‘In a sin ngeiin lung an peia mangmunboia an dar hah

a kila lung kam omtak a chang zoi

¹¹ Mahah Pumapa tho ani;

Ei mitmuah rangin chu ankhel sabak na!’” ti hih a tia.

¹² Hanchu, Juda ruaipu ngei ama sur rangin an boka; ha chongmintiek hah anni demna a misir ani ti an riat sikin. Hannirse, loko ngei an chi sikin ama an maka, an rot zoi.

Chôiruol roia rekelna

(Mat 22:15-22; Luk 20:20-26)

¹³ Hanchu, a chongril na renga min ok rangin pharisee senkhat leh Herod pala mi senkhat ngei akôm an tîra. ¹⁴ Ha mi ngei hah akôm an honga, “Minchupu, mi diktak ni nia, mi ngei in imo an mindôn rang kangdoi loiin, tute khom nezen uol loi'n theidorin Pathian chong ni minchu ngâi, aninte, Rom Reng Kaisar kôma chôiruol hih anthiang mo, inthiang mak mo? kin pek rang mo, kin pek loi rang mo?” an tia.

¹⁵ Nikhomrese, Jisu'n an buti hah a riat chiena, ankôma, “Khoithomo mi min ok rang nin tho hi? Duli inkhat hah hong chôi ngan hi roi, lei en rong” a tia.

¹⁶ Hanchu, an hong chôi pea, ama kôm han, “Tu rimil leh tu riming mo ani hi?” ti'n arkela.

Anni ngei han, “Kaisar” ti'n an tia.

¹⁷ Hanchu, Jisu'n ankôma, “Kaisar ta chu Kaisar pek roi, Pathian ta chu Pathian pek roi” ati pe ngeia.

Masuole chu Jisu chunga an kamam sabaka.

Thina renga inthoinokna rekelna

(Mat 22:23-33; Luk 20:27-40)

¹⁸ Hanchu, inthoinokna omak ti ngâi Sadukei ngei Jisu kôma an honga, ¹⁹ “Minchupu, Mosia balam hih kin ta rangin a mizieka; ‘Tutukhomin nai nei loin a lomnu thi san senla, anaipa han ha meithai hah anei nget rang ani, nai an neia athipu ulianpa nai ngeia be ani theina rangin’ ti hi. ²⁰ Voikhat chu laibung sari an oma; ulian takin lomnu a neia, nai nei loin a thia. ²¹ Masuole a inikna khomin a lua nôka, nai nei loi denin a thi nôka. A inthumna khom ha angden ani a, ²² a naipang ngei khom ha angden an ni leta; laibung sari ngei han ha nupang hah an lua paka, tute'n nai nei pui loin an thi san reaia. Anuktaka chu nupangnu khom hah a thia. ²³ Inthoinokna tikin tu lomnu tak mo ani rang ani zoi? Ha sari ngei laka han an rengin an lua paka” an tia.

²⁴ Jisu'n ankôm, “Nin mindôn minchai zoi! Khoithomo abi nin riat mo? abi chu Pathian chong leh Pathian sinthotheina nin riat loi sika ani. ²⁵ Athi ngei anin thoinok tenah chu invâna vantirton ngei angin om ei ta, Lomnu lompa om khai no nih. ²⁶ Hanchu, ithi ngei keithoia an om rang thurchi chu, Mosia lekhabua chimbuk thurchi a han Pathianin, “Keima Abraham Pathian, Isaak Pathian, Jacob Pathian ki ni” tia a chongpui hah nin la pore tet ngâi loi mini? ²⁷ Ama chu aring ngei Pathian ke ani, ithi ngei Pathian ni mak. Nin mindôn nin min chai ok!” ti'n A tipe ngei ia.

Chongpek Roiinpui tak

(Mat 22:34-40; Luk 10:25-28)

²⁸ Balam minchupu inkhatin an chong a riata. Jisu'n Sadukai ngei hah sa takin an chong a thuon ngei ti a riatin chu a honga, Jisu kôm, “Chongpek ngei laiah a khotak hi mo akam om tak?” ti'n arkela.

²⁹ Jisu'n akôma, “Akam a om tak chu mahih ani, ‘Israel ngei rangâi roi! Pumapa ei Pathian vei hih Pathian ani. ³⁰ Pumapa na Pathian chu nu mulungril murdin nartha murdin, ni mindôna murdin, na ratna murdin lungkham roh’ ti hi. ³¹ A innikna akam a om nok chu mahih ani, ‘Nangma lung nen kham anghan nu bunga mi ngei khom lungminkham roh’ ti hi. Hi innik ngei neka Chongpek roiinpui uol reng omak” tin a thuona.

³² Balam minchupu han Jisu kôma, “Ani ai hate Minchupu! Ni ti anghan Pumapa vei hih Pathian ania, ama penah chu pathian dang reng omak. ³³ Masikin Pathian chu miriamin a mulungril murdin, a mindôna murdin, a ratna murdin a lungkham nget rang ania, mapenah ama lungkham an mu anghan a bunga mi ngei ha a lungkham nget rang ani. Pathian kôma pumhal inbolna leh inbolna dang ngei nekin khom ha chongpek innik ngei dôn hah akam a om uol” a tia.

³⁴ Hanchu, inthar takin a thuon ti Jisu'n a riata, akôm, “Pathian Rengram le inla mak che,” ati pea.

Masuole chu tuten chong reng rekel ngam khai mak ngeia.

Messiah roi an rekel

(Mat 22:41-46; Luk 20:41-44)

³⁵ Hanchu, Jisu'n Biakinah a minchu ngei lai han an kôma, “Kho angin mo Balam minchupu ngeiin Messiah chu David ruia mi ani an ti thei? ³⁶ David ha Rathanthiang mangin:

‘Pumapa'n ku Pumapa kômah,

Ka changtiang insung tit roh,

Na ral ngei ne kepha nuoia ka dar maka chu’ ati ani.

³⁷ David han ama hah ‘Pumapan’ ati ke, masikin kho ang in mo Messiah hih David ruia mi ani thei ranga?” a tia.

Jisun balam minchupu ngei renga indîn ranga a rilna

(Mat 23:1-36; Luk 20:45-47)

Loko tam takin Jisu chongril hah raisan takin an rangâia ³⁸ Anni aminchu ngeia, ankôma, “Balam minchupu ngei renga indîn roi, anni chu kanchili inchuol haka leng an nuom ngâia, bazar muna mirît an pek ngei, ³⁹ Synagogues sukmun asa ngei, khohoi muna, mun ahoitak ngei an thang ngâi. ⁴⁰ Meithai ngei sum an saka an in ngei an muruka, mi huongna rangin asot tatakin chubai an tho ngâia. Masika han an duk tông intak uol ok ati” a tia.

Meithainu tholom

(Luk 21:1-4)

⁴¹ Hanchu, Jisu Biakinah tholom dôngna kola an sunga tholom dôngna han loko ngeiin tholom an thak ngei hah a ena. Mi nei tamtakin sum tam tatak an thaka. ⁴² Hanchu, meithai inriangte a honga damali inik a thaka, maha tom tak ani. ⁴³ Masuole chu Jisun a ruoisi ngei a koitupa, an kôma, “Nangni ki ril; tholom dôngna tholom a thaka murdi ngei nekin hi meithai inriangte hih a thak min tam uol tak ani. ⁴⁴ Midang ngeiin chu an nei minieng, an mang miniang ngei an thaka, aman chu anriang lama anei, a dônsun te hah hoi loia a thak let ani” atia