¹ Hanchu, Jisu Biakin renga a hong jok lai han a ruaisi ngei laia mi inkhatin a kôm, “Minminchupu, enta! A lung leh a in ngei kamam a om lam hi” atia.

² Jisu'n akôma, “Hi in roiinpui ngei hi nu mu na? Hi lung ngei hih misim la ning a ta, inkhat luo khom hih a mun hin mak rang hi om no nih” atia.

³ Hanchu Biakin mai tianga Oliv muola ansung lai han akôma, Peter, Jacob, John leh Andrew inrukin an honga, ⁴ “Mahah khotikamo a hong om rang? Maleh ha ngei ha a hong tung rangin khoimo minsina a om rang? Miril roh” an tia.

⁵ Jisu'n an kôma, “Tuten nangni an huang loina rangin indin roi. ⁶ Mi tam takin, ‘Krist ki ni’ ti'n ki rimingin hong an ta, mi tamtak rang huang an ti. ⁷ Hanchu, anaina mo, alana mo ral ruhu thurchi nin riat leh khom nin jamminjal noroi. Mahah chu a om nget rang ani, nikhomrese, a mongna chu la ni tak no ni. ⁸ Jat leh Jat landoi an ta, ram leh ram landoi an ti, rengram leh rengram landoi an ti. Mun tinah ningnu hong ata, maitam la chul a ti. Mahah naiha phutna anghan ning a ti.

⁹ “Hannirse, nin indin rang ani. Surin la om nin ta, roizek munah tuongin la om nin ti. Synagogue ngeia jem la ni nin ta, an ni ngei ranga Thurchisa nin misir pe theina rangin kirming sikin roizekpu ngei leh reng ngei makungah lan ding nin ti. ¹⁰ Amongna ala hong tung man, Thurchisa hih mi murdi kôma misirin a om bak nget rang ani. ¹¹ Surin nin oma, roizek munah tuongin nin om tikin, nin tirang lei mindônin aphak man nin jamminzal no roi, a zora takah min riatna nangni peka, a om tak hah ti roi; nin ti rang hah nangni nin chong ninonia, Rathanthiang chong a ni rang ani. ¹² Ureng khomin that rangin anaipa la minsur a ta, pa khomin anai ngei la minsur sa a ta, nai ngei khomin an nu leh pa ngei doi an ta, that an ti. ¹³ Keima sikin mitinin nangni la mumak an ti. Nikhomrese, tukhom a mong dena tuongdiar chu min ringin om a ti.

¹⁴ “‘Intakna ichi om tak leh porinche’ ha anding loina ranga anding la mung nin ti.” (apore murdi riat reseh) “Ha tikin chu Judai rama om ngei hah mual chunga rot rese ngei. ¹⁵ In chunga om khomin chumin a in sunga neinun zuong lak no reseh. ¹⁶ Loia om khomin a puan lak rangin in sunga kir no reseh. ¹⁷ Nupang naivong ngei leh naite pomlai ngei rangin chu ha nikhua ngei hah nikhuo ichi om tak ning a ti. ¹⁸ Ha zora hah phalbi a tung loina rangin chubai tho roi. ¹⁹ Ha nikhua ngeia intakna inthang ha chu Pathianin rammuol a sinphut renga avien sûn tena rammuolin an lei riat ngâi murdi nekin anchungtak ani rang sikin. Ha anga ha chu khotiklai khomin om nok tet khai no nih. ²⁰ Nikhomrese, ha nikhuo ngei hah Pumapa amin bong ani; ninorese chu tute ring no ni ngei. A mi zen ngei sikin ha nikhuo ngei hah amin bong ani.

²¹ “Hanchu, tutukhomin nin kôma, ‘Enta, hin Messiah a om mo!’ ‘Enta, son a om!’ an ti khomin—takson no roi. ²² Messiah rothol leh Deipu rothol an la suok rang sikin. Pathian a mi zen ngei tena khom an theia anin chu an huong theina rangin sininkhel om ngei leh neinun inkhel om ngei khom tho an ti. ²³ Nangni chu indin roi! A zora ahong tung man khokhoi khom nangni ke lei ril let zoi ani.

²⁴ “Ha intakna ngei zora avun suo nukin chu ha nikhuo ngeia hachu nisa hong jing a ta, tha khom var khai no nia, ²⁵ arsi ngei invân renga joungtak an ta, invân sinthotheina ngei khom hong iniknat a ti. ²⁶ Masuole chu Miriam Naipasal hih sinthotheina liantak leh inlalna lian takin sum laia zuong atih. ²⁷ Ma tikin chu, Pathianin rammuol rikil minlia, kolmong renga kolmong denin rammuol pumpuia a mi zen ngei mintup rangin a vantirton ngei tîrsuok atih.

²⁸ “Ha chongmintek hah theichang kung renga inchu roi. Amachang a hong innoia a buo ahong incherin chu kholum anai zoi ti nin riat ngâi. ²⁹ Ma angdenin nangni khomin maha a hong tung nin mu tika chu mahah a hong nai zoia, inkot renga a om zoi ti riat roi. ³⁰ Hanchu, ha ngei murdi hah a tung maka chu atunlai ruolthoithar ngei hih thi reai noni ngei, ti hih riat tit roi. ³¹ Pil leh invân boi a ta, hannirse ko chong chu inmang tet no ni.

³² “Hannirse, ha nikhuo leh a zora chu Kapa telloiin chu tuten riat mak ngei, invâna vantirton ngei khomin, Naipasal khomin. ³³ Indin ungla, intung chianin om roi, a zora hah nin riat loi sikin. ³⁴ Mi'n a in a makraka, a suak ngei racham min neia, an sintho rang apek chita, inkot min otpu khom intung chiana om ranga chong a mak pea, ram lataka khuolse angha ani. ³⁵ Masikin intung chianin om roi, in pumapa hong rang zora hah—kholoia mo, jana mo, arkhuona mo, zinga mo, a hong tung rang nin riat loi sikin. ³⁶ Han ninon chu intung loin hong tung duoi a ta, nin in chungin nang ni mu duoi ni. ³⁷ Nin kôma ki ti hih mi murdi kôma ki ti ani, intung chianin om roi!” atia.