Mark 14

Jisu that rang lam an mintuona roi

(Mat 26:1-5; Luk 22:1-2; Jon 11:45-53)

¹ Hanchu, Kalkan kut leh cholboi vaipol kût rang sûn nik motonah Ocheisi ngei leh Balam minchupu ngeiin Jisu inruktea sura that rang lampui an phan banga. ² Nikhomrese, “Khohoi sûngin chu ninorese, loko laiah inzelna om duoi ni” an tia.

Bethania Jisu Sariak Polin aom

(Mat 26:6-13; Jon 12:1-8)

³ Hanchu Bethania, Simon pangrang inah Jisu a oma, bu a nek laitakin nupang inkhat nart sariak mirimhoi man luttak alabaster bilor sipmat a hong chôia, a bilor hah a khoia, Jisu luah a buaka. ⁴ Ha muna loko senkhat chu anning a thika, “Khoitho mo hi sariak mirimhoi hih an inchek hi? ⁵ Denarius ^a razan thum neka tama zuora a sum hah inriang ngei sem thei ke ai ni,” an tia. Masuole chu a chunga an chier zoia.

⁶ Hannirseh, Jisu'n an kôma, “Atheiin mak roi! Khoitho mo nin zel hi? Ka ta rangin neinun satak leh enhoi tak a tho ani. ⁷ Inriang ngei chu nin kôma an om tit an nia, nin jot titikah nin san thei. Ania keima chu nin kôma hin om tit no ning. ⁸ A theilamdor a tho ani; ka takpum hih phum ranga lei cherela mirimhoi alei buok ani. ⁹ Ha anghan, nangni ki ril, rammuol pumpuia Thurchisa an misirna muntina hinu sintho khom hi an riat tit na rangin misir sa ngâi” an ti.

Judas'n Jisu minsur rang a nuomna

(Mat 6:14-16; Luk 22:3-6)

¹⁰ Hanchu, ruoisi somleinik ngei laia mi inkhat, Judas Iscariot han Jisu amin sur theina rangin Ocheisi ngei kôm ava sea. ¹¹ Anni an lei riat lehan chu an rai alei san sabaka, sum pek rangin an inkhama. Masuole chu Judas han Jisu ha an kuta a bang theina rang chuminren a rok zoia.

Jisun a ruaisi ngei leh kalkankut bukhalai an ot

(Mat 26:17-25; Luk 22:7-14,21-23; Jon 13:21-30)

¹² Hanchu, cholboi vaipol khalai otni sûn masataka kalkankut khalai otna ranga belrite an that ngâi ni han a ruaisi ngeiin akôma, “Kalkankut khalai hih khonmo nang va minsûk pui unglang nu nuom?” ti'n arkela.

¹³ Masuole, a ruaisi ngei mi inik a tîra an kôma, “Khopuia se ungla, pasal bela tui rokot nangni tông a ti. ama hah jui ungla, ¹⁴ a lutna taka in pumapa kôma, ‘Miminchupun, khon mo ku ruaisi ngei leh kalkankut kin sakna rang khaltan hah?’ ati, va ti roi. ¹⁵ Hanchu, ama rengin khaltan chunginchuon inzar lianpa, neinun om sei, mintuodiem sei nangni min mung a ta, mahan eita rangin vaminsûk roi” atia.

¹⁶ Hanchu, ruaisi ngei ha anin pheta, khopuia han an sea, Jisu'n a ril ngei lam takin neinun murdi ha an va mua, kalkankut khalai hah an va minsûk zoi.

¹⁷ Hanchu, kholoi a hong nin chu Jisu hah ruaisi somleinik ngei leh an se zoia. ¹⁸ Hanchu, khalai an ot laitakin Jisu'n, “Nangni ki ril; nin laia mi inkhat, ko kôma sak misakpuipu lele hin mimim sur a ti” a tipe ngeia.

¹⁹ Hanchu, ruaisi ngei an mulungduk atôngpe ngeia, an then, thenin, “Keima mini?” Ti'n an rekel paka.

²⁰ Jisu'n an kôma, “Nangni somleinik laia inkhat, khenga vaipol mipur puipu hi ani. ²¹ Pathian Lekhabu'n, Miriam Naipasal hih thi a ti, a lei ti ang takin a thi rang ani, hannirse, Miriam Naipasal minsurpu chungroi chu antak sabak rang! Ha miriam hah chu anzir loi nisenla chu arangin asa uol rang ani” a tia.

Pumapa Janbu

(Mat 26:26-30; Luk 22:14-20; 1Kor 11:23-25)

²² An sak lain Jisu'n vaipol a laka, satvur chong a ril zoiin a khoia a ruaisingei, a peka, “Sak roi, ma hi ka taksa ani” a tia.

²³ Masuole chu kilat a laka, Pathian kôm, raisan chong a ril zoiin chu anni a pek ngeia; an rengin an nek pak zoia. ²⁴ Hanchu, Jisu'n ankôm, “Mahih ki thisen mi tamtak ranga a suok, Pathian chonginkham thar mindetna ani. ²⁵ Dik takin nangni ki ril; Pathian Rengrama vain thar ke nek ni a tung makah chu hi vain hih nek nok khai noning” a tia.

²⁶ Masuole, minpakna la inkhat an thoa, Oliv muala an se zoia.

Peter Ipdel rang alei ril Masana

(Mat 26:31-35; Luk 22:31-34; Jon 13:36-38)

²⁷ Hanchu Jisu'n an kôma, “Nin rengin rot reai nin ta, mi mak reai nin ti, Pathian Lekhabu'n, ‘Pathian'n belri holpui hah that a ta, belri ngei ha chekinchai chit an ti’ a ti sikin. ²⁸ Nikhomrese ken thoinok suoleh chu Galili ramah nin motonah lei se ki ti” a tia

²⁹ Peter'n akôma, “A dang ngeiin nang maksan reai khomrese ngeia, keiman chu nang mak tet no ning!” ti'n a thuona.

³⁰ Jisu'n Peter kôm, “Nang ki ril; avian zan voinik ar a khuong man nangman voithum mi ipdel ni ti,” a tipea.

³¹ Peter chong ana uoalin a thuona, akôm, “Ni thina thisa rang khomin nang ipdel riek noning!” a tia.

Ruaisi dang ngei khomin ha ang denin an ti paka.

Gethsemania Jisu chubai thona

(Mat 26:36-46; Luk 22:39-46)

³² Hanchu, Gethsemani an ti mun hah an hong tung lehan, Jisu'n a ruaisi ngei kôma, “Chubai ko thosung kar hin lei insung roi,” a tipe ngeia. ³³ Peter, Jacob leh Johan ngei hah akôm a tuong ngeia, asan rathanvaiin a mulung duk a tông tatak zoia. ³⁴ Male, an kôm, “Ku mulung duk ana rei sikin athi rang ang dorin ke ko omzoi. Hin om ungla, intung chian roi” a tia.

³⁵ Hanchu moton tiang ava se uol vieta, pila an boka ha tuongna rang zora ha ani theia ninchu aloi theina rangin chubai a thoa. ³⁶ “Abba! O ka Pa nangma rangin chu neinuntin anithei let. Hi tuongna kilat hih ko kôm renga mikhaipei pe roh. Nikhomrese, keima ka racham niloi in Nangma na racham in nirese” a tia.

³⁷ Masuole chu a hong kira, ruoisi inthum ngei hah an innin ahong mu ngeia, hanchu, Peter kôm nala in tit mo, “Simon darkar khat lua khom intung chienin nin om thei loi mini?” ³⁸ “Huongna nin lut loina rangin intung chienin om ungla chubai tho roi. Ratha'n chu ajota taksa'n inchu ajual” a tia.

³⁹ Hanchu, voikhat ava se nôka, ati den hah vati in chubai ava tho nôka. ⁴⁰ Masuole chu a ruaisi ngei tiang a hong kir nôka, an lei in denin a hong mu ngei nôka; an mit reng ameng thei khai loi sikin, akôm ati rang khom an riat khailoi ani.

⁴¹ Hanchu, a voithumna a hongkir nokin chu ankôm, “Atun ten khom solinngam in nin la in dena? Ahun zoi! A zora a hong tung zoi! Enta u, Atun, Miriam Naipasal hih misia ngei kutah ipek ani rang ani. ⁴² Inthoi ungla, se eiti zoi. Enta u, hin mi minsur rangpu hih a hong nai zoi” a tia.

Jisu an sur

(Mat 26:47-56; Luk 22:47-53; Jon 18:3-12)

⁴³ Hanchu, Jisu ala chong laitakin A ruaisi somleinik ngei laia Judas hah a hong tung kelena. ama leh, Ocheisi ngei leh balam minchupu ngei, upa ngei leh loko ngei an hong tîr ngeia, chemsei leh tôkmol chôi in an hong tung sa a. ⁴⁴ A minsur rangpu han, “Abiang ku tum tak hah nin rokpu ning a ti, sur ungla, tuong kelen roi, enkol roi” tin minsinna a lei ril sei ani.

⁴⁵ Judas hah a hong tung lehan chu Jisu kôm a vase kelena “Minchupu!” ti'n abiang a tuma. ⁴⁶ Masuole chu Jisu an sur zoia. ⁴⁷ Hataka inding ngei laia mi inkhatin chemsei a kelsuoa, Ochei Inlaltak suak, a kuor a tukthakpea. ⁴⁸ Masuole chu Jisu'n anni ha a rokoka, an kôma “Chemsei leh tôkmol chôiin inru sur rang angin misur rangin nin hong mo hi? ⁴⁹ Aningtin Biakin ngeia nangni minchu rangin nin kôm ko om ngâia, hannirse, misur mak choia. Ania, Pathian chong a hong tung indikna ranga ani hi” a tia.

⁵⁰ Masuole chu a ruaisi ngei han ama an mak raka, an tan khip zoi.

⁵¹ Hanchu, ruotharte inkhat, rosompuon vei invo'n Jisu a zuia. Ama sur sa rang an tia, ⁵² nikhomrese, a puon hah mak rakin a korongin a tan pata.

Jisu Roizekna an Ding

(Mat 26:57-68; Luk 22:54-55,63-71; Jon 18:13-14,19-24)

⁵³ Masuole chu, Jisu hah Ochei Inlaltak inah, an tuonga, mahan Ocheisi ngei leh Balam minchupu ngei leh Upa ngei khom an hong intup sa kelena. ⁵⁴ Peter alajanin a zuia, Ochei Inlaltak khalai denin a sea. Mahan a ngakpu ngei laiah mei ava uot sa a. ⁵⁵ Hanchu, Ocheisi ngei leh roizekpu ngei murdi han Jisu an that theina rangin achaina an man theina rang abi an mazama, nikhomrese, man mak ngei. ⁵⁶ Mi tam takin milakin an nonna, nikhomrese, an nonna chong hah intok thei mak ngeia.

⁵⁷ Male, mi senkhat an indinga milakin Jisu an nonna, ⁵⁸ “Hi mi hin, ‘Biakin kut leh sin hih set kata, sûn thumin a dang kuta sin niloi in minding ki ti’ a ti kin riat” an tia. ⁵⁹ Maha khom hah an nonna chong intok uol maka.

⁶⁰ Hanchu, Ochei Inlaltak hah an motonah a van dinga, chong arekela, Jisu kôma, “Nang an nonna roia hin ite thuonna ne nei loi rang mini?” a tia.

⁶¹ Nikhomrese, Jisu chu a daireka, ite'n makhal maka. Ochei Inlaltak han akôm, “Nangma Satvur Pathian Naipasal Messiah hah ni ni mo?” tin arkel nôka.

⁶² Jisu'n akôma, “Ki ni, Miriam Naipasal hih Ratinchung chang tianga insunga, invâna sûm laia zuong la mung nin ti” tin a thuonna.

⁶³ Masuole chu Ochei Inlaltak han a puonsil ngei a potkhera, “Riatpuipu a dang nang khai mak meh! ⁶⁴ Pathian anti leh a rilsiat ti chu nin riat zoia, kho angin mo nin mindôn” a tia. An rengin ama hah thi rang ruo piel ani an ti paka.

⁶⁵ An laia senkhatin amai an michila, amai an hip pea, an jema. Akôma, “Miril roh tumo nang a jem?” an tia. Mapenah misurngâi ngei khomin an minsuitir pumin leh an bentira.

Peter'n Jisu a ipdel

(Mat 26:69-75; Luk 22:56-62; Jon 18:15-18,25-27)

⁶⁶ Hanchu, Peter hah thang tianga ruhuon sunga ala om lain Ochei Inlaltak suak nupang inkhat a honga. ⁶⁷ Peter mei lei uot hah amu leh chu a en ririna, akôma, “Nangma khom Nazareth Jisu leh munkhata om ngâi nini” a tipea.

⁶⁸ Hannirseh, Peter'n a ipdel a, “Riat mu-ung, Khoimo ni ti reng riat thei mu-ung” tin a thuona, masuole mokot pêntiang ava zoka ar khom akhuong kelen zoi.

⁶⁹ Hanchu, nupang han ava mu nôka, a kola inding ngei kôm han, “Hi pa khom hih an laia mi inkhat ani sa” ati nôka. ⁷⁰ Hannirseh, Peter'n ipdel nok reka.

Anangkana uol vieta chu a kola an ding ngeiin Peter kôm, “Galili rama mi nini sa sikin nang khom an laia mi nini nget” ti'n an dei a.

⁷¹ Hannirseh, Peter'n ankôm, “Chongdik rillin khomak ken sam ani! A dik nonchu Pathianin duk mi pek reseh! Ha miriam nin ti hah riat reng riat tatak ngâi mu-ung!” a tia.

⁷² Masuole han chu ar voinikna a hong khuong nok zoia, hanchu, Peter han Jisun a kômah, “Ar voinik a khuong man nangman voithum ipdel ni ti” ai ti pe chong hah a hong riatsuok nôka. Ha chong hah a mindôn lehchu a chap ngu-ngui zoia.