Mark 15

Jisu Pilat makunga an ding

(Mat 27:1-2,11-14; Luk 23:1-5; Jon 18:28-38)

¹ Hanchu, zing a hong ni leh chu inrangtakin, Ocheisi ngei leh Upa ngei leh Balam minchupu ngei leh Roijekpu ngei murdi leh an intônga an chonga. Jisu ha an khita an tuonga, Pilat kutah an banga. ² Pilat'n chong arekela, a kôm, “Juda ngei reng nini mo?” atia.

Jisu'n, “Mi ni ti zoi hate” ti'n a thuona.

³ Ochaisi ngei han abi tamtakin Jisu an nonna, ⁴ masikin Pilat'n Jisu chong a rekel nôka akôma, “Nangman nu thuonloi rang mo? nang an nonna ngei murdi hih rangâi roh!” a tia.

⁵ Jisu'n chu khoite thuon uol mak sikin Pilat'n a kamam sabak zoia.

Jisu athi ranga a roi an zekna

(Mat 27:15-26; Luk 23:13-25; Jon 18:39—19:16)

⁶ Hanchu, Pilat'n Kalkankut zora racham mi intang inah a om inkhat loko ngei'n an ti tak ha a mojok pe ngei ngâia. ⁷ Ha zora han mi inkhat arming Barabbas hah, mi puoloi pal ngei leh mi an that sika intang inah a oma. ⁸ Hanchu, loko ngei an sea, anta ranga a lei tho pe ngei ngâi anghan tho rangin an ngena. ⁹ Hanchu, Pilat'n ankôm, “Juda ngei reng hih nangni mojok pe inlang nin zot mo?” a tia. ¹⁰ Ocheisi ngei han an narsa sika Jisu hah akôm an hong tuong ani ti a riat minthara.

¹¹ Nikhomrese, Ochaisi ngeiin loko ngei han Barabbas a mojok pe ngei ranga ngen rangin an misieta. ¹² Hanchu, Pilatin ankôm, “Aninte, Juda ngei reng nin tipu hih imo ko lo rang ani zoi?” ti'n arkel ngei nôka.

¹³ Anni han, “Krosa jemdel roh!” ti'n an het nôka.

¹⁴ Pilat'n an kôma, “Khoitho mo? imo a tho minchai?” ti'n arkel ngei nôka.

Nikhomrese, anni han, “Krosa jemdel roh!” tin an het min ring uola.

¹⁵ Ha anghan, Pilat'n loko ngei raiminsan anuoma Barabbas hah a mojok pe ngeia. Hanchu, Jisu hah a jem suoleh chu Krosa jemdel rangin an kuta a pek ngei zoia.

Sipai ngeiin Jisu an pheneng

(Mat 27:27-31; Jon 19:2-3)

¹⁶ Hanchu, sipai ngeiin Jisu hah Raiot inmai khalai a an tuong luta, an champui loko murdi an koitupa. ¹⁷ Hanchu, puon senduk an minsila, riling tapor an phiera, an min khuma. ¹⁸ Masuole chu chibei an thoa, Juda ngei Reng, ringsot roh!” an tia. ¹⁹ Alua khiengrol leh an jema, an michila, khuk inbillin chibei an muka. ²⁰ Hanchu, an pheneng zoiin chu puon senduk hah an lik nôka, ama puon nanak hah an minsil nôka, Masuole chu Krosa jemdel rangin an tuong zoia.

Krosa Jisu jemdel'n aom

(Mat 27:32-44; Luk 23:26-43; Jon 19:17-27)

²¹ Hanchu, lampuiah mi inkhat ram renga khopui hong pan arming Simon an tônga, sipai ngeiin Jisu Kros ruput rangin an dandea. (Simon hah Cyrine Kurini mi, Alexander leh Rufus pa ani). ²² Hanchu, Jisu hah Golgotha an ti muna han an tuonga mahah “Luru mun” tina ani. ²³ Ha muna han Jisu hah vain, mura leh inpol an peka apang anhip na rangin, nikhomrese, Jisu'n nek jot maka. ²⁴ Masuole chu Krosa an jemdela, a puonsil ngei hah an nin sema, an chang rang chit riatna rangin taruo ansana. ²⁵ Jisu an jemdel zora hah zing dar kua ani. ²⁶ Hanchu, an nonna hah, “Juda ngei Reng” tin alu chunga an tara. ²⁷ Hanchu, Jisu leh munkhatin mi inru innik an jemdel sa, a chang tiang inkhat, avoi tiang inkhat. ²⁸ ^a [Ha anghan, Pathian Lekhabu'n, “Ama khom mi puoloi ngei laia telsan a om zoi” ai ti hah a hong tung zoi ani.]

²⁹ Hataka, mi anloi murdin an lu an nuka Jisu an eroa, “O hoi! Biakin set na ta, sûn thumin ni minding nok rang na! ³⁰ Atun juang chum inla, ne thenin insanjok roh!” an tia.

³¹ Ha angdenin Ocheisi ngei leh Balam minchupu ngei khomin Jisu an eroa, “Midang ngei chu a mojok ngâia, ama leh ama chu jok thei maka! ³² Tho atun chu Messiah, Israel ngei reng hih Kros ler renga a juong chum lei en rei u, hanchu, ama iem ei ti” an tia.

Ama leh an jemdel sa mi inik ngei khomin Jisu an ero sa.

Jisu thina roi

(Mat 27:45-56; Luk 23:44-49; Jon 19:28-30)

³³ Hanchu, sûnlai dar thum sunghin chu rammual ajing khapa. ³⁴ Dar inthum han chu Jisu rol inring takin a heta, “Eloi, Eloi, lama sabakthani?” a tia, mahah, “Ka Pathian, ka Pathian, khoithomo mini maksana?” tina ani.

³⁵ Ha muna inding ngei senkhatin mahah an riata, “Rangâi ta u, Elizah a koi ke!” an tia. ³⁶ Hanchu, an laia mi inkhat a tana, patzon, vain thur a michie in, tôkmol mongah a tara, a hong min neka, “La ot rei! Ama musum rangin Elizah mo a juong pe lei en rei u!” an tia.

³⁷ Masuole chu Jisu rol inring takin a heta, a râng a chat zoia.

³⁸ Hanchu, Biekinah puonjar khaltan hah inikin a chung renga a mong denin aker pata. ³⁹ Sipai ulian Kros motona andingpu hah Jisu a rang a chat lam hah amua “Hi mi hih Pathian Naipasal ani khet!” a tia.

⁴⁰ Ha muna, nupang senkhat khom alajanna renga thirin an oma; ha ngei hah Mary Magdalene, Mary, Jacob naipang leh Joseph nu leh Salomi ngei an ni. ⁴¹ Ha ngei hah Jisu Galili rama a om lain an jui ngâia, an san ngâi ani. Nupang tamtak Jerusalem ama leh a se ngei khom ngei hah an om sa.

Jisu an phum naroi

(Mat 27:57-61; Luk 23:50-56; Jon 19:38-42)

^42-43 Hanchu, kholoi a hong ninchu Arimathaia mi Joseph a honga. Ha mi hah Roijekpu ngei laia mi mirit om tak Pathian Rengram juong tung rang lei ngak mi ani (Incheril ni leh Sabbath rang sûn moton tet khom anisa), masikin Joseph'n ngam takin Pilat kôm a va sea Jisu ruok ha a va zonga. ⁴⁴ Pilat'n Jisu athi roi hah a riat lehan chu a akamam tataka, hanchu, sipai ulian inkhat a koia, Jisu thina asot zoi mo? ti'n arekela. ⁴⁵ Sipai ulian bai renga chong antharin a riat suole chu a ruok hah Joseph chôi rangin aphalpe zoia. ⁴⁶ Masuole chu Joseph'n rosompuon archoka, ruok hah a musuma, rosompuon leh han a tuoma, than lung hel khura amin jala, than bai hah lungin a hip a. ⁴⁷ Mary Magdalene leh Joseph nu Mary han Jisu ruok an minjalna hah an ena, an mu chiena.